उर्वशी रौतेलाच्या टीमचा AI कंपनीविरोधात कायदेशीर पवित्रा; 7,000 कोटी रुपयांच्या नुकसानभरपाईची मागणी
उर्वशी रौतेला पुन्हा एकदा चर्चेत आली आहे. एका एआय (AI) कंपनीविरुद्ध कायदेशीर कारवाई केली जात असल्याचा दावा तिच्या टीमने केला आहे.
अभिनेत्री उर्वशी रौतेला पुन्हा एकदा चर्चेत आली आहे. यावेळी तिच्या चर्चेत येण्यामागे कोणताही चित्रपट नसून आर्टिफिशियल इंटेलिजन्सशी संबंधित वाद आहे. उर्वशीच्या टीमने लॉस एंजिलिसस्थित एका AI कंपनीविरोधात कायदेशीर कारवाई सुरू केल्याचा दावा केला असून, तिची ओळख, छायाचित्रे आणि व्हिडिओ कथितरीत्या परवानगीशिवाय वापरल्याचा आरोप करण्यात आला आहे. या प्रकरणात उर्वशीच्या टीमकडून तब्बल 7,000 कोटी रुपयांच्या नुकसानभरपाईचा दावा करण्यात येत असल्याचे सांगितले जात आहे. मात्र, संबंधित AI कंपनीचे नाव अद्याप सार्वजनिक करण्यात आलेले नाही.
नेमका आरोप काय?
उर्वशीच्या टीमच्या म्हणण्यानुसार, संबंधित कंपनीने अभिनेत्रीचे नाव, फोटो आणि व्हिडिओ तिच्या परवानगीशिवाय व्यावसायिक कारणांसाठी वापरल्याचा आरोप आहे. या वापरातून कंपनीने मोठ्या प्रमाणावर व्यावसायिक मूल्य निर्माण केल्याचेही टीमकडून सांगण्यात आले आहे. IANS ला दिलेल्या निवेदनात उर्वशीच्या टीमने कायदेशीर मार्गाचा अवलंब करण्याची माहिती दिली. अभिनेत्रीची ओळख आणि तिच्या कंटेंटचा परवानगीशिवाय व्यावसायिक वापर सहन केला जाणार नसल्याचे टीमने स्पष्ट केले आहे. या प्रकरणात नुकसानभरपाईची रक्कम सुमारे 7,000 कोटी रुपये असल्याचे सांगितले जात असले, तरी पुढील कायदेशीर प्रक्रियेत या दाव्याचे स्वरूप आणि रक्कम कशी निश्चित केली जाते, हे महत्त्वाचे ठरणार आहे.
सेलिब्रिटींच्या AI वापराचा मुद्दा पुन्हा चर्चेत
AI तंत्रज्ञानामुळे फोटो, व्हिडिओ आणि आवाज तयार करणे किंवा त्यात बदल करणे पूर्वीपेक्षा सोपे झाले आहे. मात्र, याच तंत्रज्ञानाचा परवानगीशिवाय सेलिब्रिटींच्या चेहऱ्याचा, आवाजाचा किंवा ओळखीचा वापर करण्यासाठी केला जात असल्याच्या तक्रारीही वाढत आहेत. डीपफेक व्हिडिओ आणि AI-जनरेटेड कंटेंटमुळे मनोरंजन क्षेत्रातील कलाकारांच्या गोपनीयतेचा, प्रतिमेचा आणि व्यावसायिक हक्कांचा प्रश्न अधिक गंभीर झाला आहे.
सलमान खाननेही व्यक्त केली होती चिंता
AI च्या गैरवापराबाबत अभिनेता सलमान खाननेही अलीकडे चिंता व्यक्त केली होती. ‘बिग बॉस 20’च्या एका एपिसोडमध्ये AI च्या माध्यमातून एखाद्या व्यक्तीचा आवाज किंवा व्हिडिओ बदलून त्याने प्रत्यक्षात न केलेली किंवा न बोललेली गोष्ट त्याच्याशी जोडली जाऊ शकते, असे त्याने सांगितले होते. सलमानने AI च्या माध्यमातून तयार होणाऱ्या बनावट व्हिडिओंचा उल्लेख करताना स्वतःचाही अशा प्रकारच्या कंटेंटमध्ये वापर झाल्याचे सांगितले होते.
उर्वशी रौतेलाच्या प्रकरणामुळे पुन्हा एकदा सेलिब्रिटींच्या नाव, प्रतिमा आणि डिजिटल ओळखीचा AI कंपन्यांकडून होणारा वापर कितपत कायदेशीर आहे, हा महत्त्वाचा प्रश्न चर्चेत आला आहे. या प्रकरणातील पुढील कायदेशीर घडामोडींवर आता लक्ष लागले आहे.
