अमेरिकेत शाळेत गोळीबार! तीन विद्यार्थी आणि एका शिक्षकाचा मृत्यू, हल्लेखोरांचं वय पाहून बसेल धक्का

अमेरिकेत पुन्हा एकदा गोळीबाराची घटना समोर आली आहे. एका प्राथमिक शाळेत झालेल्या गोळीबारात तीन मुले आणि शिक्षकाचा मृत्यू झाला आहे. अमेरिकेच्या वायव्य भागातील ओरेगॉनमध्ये ही घटना घडली आहे. या घटनेत हल्लेखोरही मारला गेला आहे. 'बेंड' (Bend) पोलीस विभागाचे प्रमुख माईक क्रँट्झ यांनी पत्रकारांना सांगितले की, "मृत्यूमुखी पडलेल्यांमध्ये 5, 8 आणि 11 वर्षे वयोगटातील तीन मुले आणि एका शिक्षकाचा समावेश आहे." पोलिसांनी हल्लेखोराची ओळख पटवली आहे. हल्लेखोराचं वय फक्त 16 वर्ष असून तो ओरेगॉनचा रहिवासी असल्याची माहिती पोलिसांनी दिली आहे. पोलिसांनी दिलेल्या माहितीनुसार, हल्लेखोराला गोळ्या घालून ठार करण्यात आले आहे.

पोलीस प्रमुख माईक क्रँट्झ यांनी सांगितले की, "संशयित व्यक्ती 16 वर्षांची असून ती 'बेंड' येथील रहिवासी आहे. शाळेत प्रवेश करताना एका स्थानिक नागरिकाने त्याला पाहिले आणि त्याचा पाठलाग करत शाळेच्या आत जाऊन त्याला रोखण्याचा प्रयत्न केला, यादरम्यान त्या नागरिकाने संशयितावर गोळ्या झाडल्या."

'बेंड' पोलीस विभागाच्या प्रवक्त्या शीला मिलर यांनी सांगितले की, सुरुवातीला एका कारवर गोळीबार झाल्याची माहिती पोलिसांना मिळाली होती. त्यानंतर काही मिनिटांतच, शाळेच्या आत एक हल्लेखोर घुसल्याचे अनेक फोन आले.

स्थानिक वेळेनुसार दुपारी 1 वाजता हे फोन आले होते. यानंतर काही मिनिटातच पोलीस अधिकारी तिथे दाखल झाले. त्यानंतर त्यांना "गोळीबार करणाऱ्या व्यक्तीला गोळ्या घालून ठार मारण्यात आले आहे," अशी माहिती वॉकी टॉकीवरुन मिळाली.

CNN आणि CBS News या दोन्ही वृत्तवाहिन्यांनी, कायदा अंमलबजावणी यंत्रणेच्या हवाल्याने या घटनेत चार जणांचा, ज्यामध्ये तीन मुले आणि एका प्रौढ व्यक्तीचा मृत्यू झाल्याचे वृत्त दिले आहेत. मिलर यांनी सांगितले की, 'सिल्व्हर रेल एलिमेंटरी' (Silver Rail Elementary) शाळेत 400 ते 450 मुले शिकतात आणि तिथे 40 हून अधिक कर्मचारी काम करतात.

गोळीबारानंतर शाळेत लॉकडाउन लागू करण्यात आला होता. 'बेंड-ला पाइन स्कूल डिस्ट्रिक्ट'ने (Bend-La Pine School District) सांगितले की, पोलीस अधिकारी विद्यार्थ्यांना बसमधून सुरक्षितपणे दुसऱ्या ठिकाणी घेऊन जात आहेत, जिथे कुटुंबे आपल्या मुलांना पुन्हा भेटू शकतील.