कांद्याची सालं फेकून देऊ नका, केसासाठी या तीन पद्धतीने करा वापर, कोंडा व केसगळतीही थांबेल

भारतीय जेवणात कांदा हा महत्त्वाचा पदार्थ आहे. कांद्याची फोडणी दिल्याशिवाय भाजी चविष्ट होऊच शकत नाही. पण तुम्हाला माहितीये का कांद्याचे शरीरासाठी अनेक फायदे आहेत. अनेक जण कांदा सोलून त्याची साले कचऱ्याच्या डब्यात फेकून देतात. पण तुम्हाला माहितीये का कांद्याची साले तुमच्या केसासाठी फायदेशीर ठरू शकतात.

कांद्याच्या सालीत व्हिटॅमिन ए, सी आणि ई सह अँटी ऑक्सिडेंट्स, सल्फर आढळले जाते. ते केसांसाठी फारच फायदेशीर आहे. त्यामुळं आज आम्ही तुम्हाला केसांसाठी कांद्याची सालं कशी वापरायची याबाबत सांगणार आहोत. यामुळं केसांची चमक पुन्हा मिळते आणि कोंडा निघून जाते.

केसांसाठी तेल बनवा

तुम्ही कांद्याच्या सालींपासून केसांची वाढ वाढवणारे तेल बनवू शकता. यासाठी, एका पातेल्यात खोबरेल तेल आणि कांद्याच्या साली घाला. दोन्ही घटक कमीतकमी 10-15 मिनिटे शिजवा, जोपर्यंत सालींचा रंग काळपट होऊ लागत नाही. यानंतर, तेल थंड होऊ द्या. ते गाळून एका बाटलीत साठवून ठेवा. हे तेल आठवड्यातून दोनदा तुमच्या टाळूला आणि केसांना लावा. 2-3 तासांनंतर शॅम्पूने केस धुवा. यामुळे केस मजबूत होतात.

केसांसाठी डाय बनवा

हेअर डाय बनवण्यासाठी, एका कढईत कांद्याची साले घालून तेलाशिवाय परतून घ्या. साले पूर्णपणे करपून काळी होईपर्यंत परतत राहा. नंतर, या काळ्या सालींची पूड करा. या पूडमध्ये १ चमचा कोरफडीचा गर (अ‍ॅलोवेरा जेल) घालून पेस्ट बनवा. तुमच्या आवडीनुसार तुम्ही खोबरेल तेलही वापरू शकता. ही पेस्ट ब्रशच्या साहाय्याने केसांना लावा. एक ते दीड तासानंतर केस धुवा. नियमित वापरामुळे केस काळे होतात आणि त्यांना नैसर्गिक चमक येते.

कांद्याच्या सालीचे पाणी

एका पातेल्यात 2 ग्लास पाणी आणि कांद्याची साले घाला. दोन्ही घटक किमान 20 मिनिटे चांगले शिजवा. पाण्याचा रंग हलका तपकिरी होईल. रंग बदलल्यावर गॅस बंद करा आणि ते थंड होऊ द्या. आता, या पाण्याने आपले केस आणि टाळू पूर्णपणे स्वच्छ धुवा. यामुळे तुमच्या केसांना नैसर्गिक चमक येईल आणि कोंडा घालवण्यासही मदत होईल.