जंगलात आढळला महिला हवालदाराचा मृतदेह; चिमुरड्या लेकाने सांगितला घडलेला प्रकार!

कोकणातील सिंधुदुर्ग जिल्ह्यात महिला पोलीस हवालदार स्मिता माने यांच्या संशयास्पद मृत्यूने खळबळ उडाली आहे. कणकवली पोलीस ठाण्यात कार्यरत असलेल्या स्मिता यांचा मृतदेह बिडवाडी-हुंबरने परिसरातील जंगलात गळफास घेतलेल्या अवस्थेत आढळला. या प्रकरणात त्यांचे पती आणि पोलीस शिपाई सचिन माने यांना पोलिसांनी अटक केली आहे. स्मिता यांच्या बहिणीने पतीवर शारीरिक आणि मानसिक छळाचे गंभीर आरोप केले आहेत. काय घडलंय नेमकं? सविस्तर जाणून घेऊया.

जंगलात आढळला महिला हवालदाराचा मृतदेह

स्मिता माने या सिंधुदुर्ग जिल्ह्यातील कणकवली पोलीस ठाण्यात महिला हवालदार म्हणून कार्यरत होत्या. त्या मागील दोन दिवसांपासून बेपत्ता असल्याची माहिती समोर आली होती. अखेर बिडवाडी-हुंबरने परिसरातील जंगलात त्यांचा मृतदेह गळफास घेतलेल्या अवस्थेत आढळला. या घटनेने पोलीस दलासह संपूर्ण परिसरात खळबळ उडाली. स्मिता आणि त्यांचे पती सचिन या दोघांचीही नुकतीच वैभववाडी पोलीस ठाण्यात प्रशासकीय बदली झाली होती. नव्या ठिकाणी जाण्यासाठी सामानाची बांधाबांध करण्याकरिता त्यांनी रजा घेतल्याची माहिती वृत्तांत देण्यात आली आहे.

पतीवर शारीरिक आणि मानसिक छळाचा आरोप

स्मिता यांच्या बहिणी रेश्मा जाधव यांनी पोलिसांकडे तक्रार दाखल केली आहे. या तक्रारीनुसार, सचिन माने हे पत्नीच्या चारित्र्यावर संशय घेत होते आणि त्यांचा सातत्याने शारीरिक व मानसिक छळ करत असल्याचा आरोप आहे. या त्रासाला कंटाळून स्मिता यांनी आत्महत्या केली असावी किंवा त्यांच्या मृत्यूमागे घातपात असावा, असा संशय नातेवाइकांनी व्यक्त केला आहे. या आरोपांच्या आधारे पोलिसांनी सचिन माने यांच्याविरोधात गुन्हा दाखल करून त्यांना सोमवारी रात्री अटक केली.

‘पप्पांनी मम्मीला बेल्टने मारलं’

या प्रकरणातील सर्वाधिक धक्कादायक बाब तक्रारीत नमूद करण्यात आली आहे. स्मिता यांच्या नातेवाइकांनी त्यांच्या घरी भेट दिली असता जमिनीवर कापलेले लांब केस आढळल्याचे सांगण्यात आले. तसेच स्मिता यांच्या मुलाने वडिलांनी रात्री आईला पट्ट्याने मारहाण केली आणि त्यामुळे ती स्नानगृहात पडल्याचे नातेवाइकांना सांगितल्याचा उल्लेख तक्रारीत आहे. या माहितीची स्वतंत्र पडताळणी आणि संबंधित पुराव्यांची तपासणी पोलिसांकडून केली जात आहे.

बेपत्ता झाल्याची तक्रार पतीनेच केली होती

स्मिता माने बेपत्ता झाल्यानंतर सचिन माने यांनी ८ ऑक्टोबर रोजी पोलिसांत तक्रार दाखल केल्याचे वृत्त आहे. पत्नी कोणालाही न सांगता घरातून निघून गेल्याचे त्यांनी नातेवाइकांनाही सांगितले होते. त्यानंतर पोलिसांकडून शोध सुरू असतानाच जंगलात त्यांचा मृतदेह आढळला. या घटनाक्रमामुळे प्रकरणातील संशय अधिक वाढला. पोलिस आणि न्यायवैद्यक पथकाने घराची पाहणी करून काही वस्तू जप्त केल्या आहेत. त्यामध्ये कथित मारहाणीसाठी वापरलेला पट्टा, स्मिता यांचा मोबाइल आणि जमिनीवर आढळलेले केस यांचा समावेश होता.

शवविच्छेदन अहवालानंतर मृत्यूचे कारण स्पष्ट होणार

स्मिता माने यांचा मृतदेह शवविच्छेदनासाठी कोल्हापूर येथील सीपीआर रुग्णालयात पाठवण्यात आला आहे. शवविच्छेदन अहवाल आणि न्यायवैद्यक तपासणीचे निष्कर्ष आल्यानंतर मृत्यूचे नेमके कारण स्पष्ट होण्यास मदत होईल. अटक करण्यात आलेल्या सचिन माने यांना न्यायालयात हजर करण्याची प्रक्रिया सुरू असल्याचे वृत्त आहे. या प्रकरणाचा पुढील तपास कुडाळचे पोलीस निरीक्षक विकास बडवे करत आहेत. नातेवाइकांनी केलेले आरोप, घटनास्थळावरील पुरावे आणि वैद्यकीय अहवाल यांच्या आधारे पोलिस पुढील कारवाई करणार आहेत.