भयंकर! दहा वर्षांच्या मुलीने 18 महिन्याच्या बाळाला इमारतीतून खाली फेकले, गोरेगावाील घटना
10 वर्षीय मुलीने शेजारी राहणाऱ्या 18 महिन्यांच्या बाळाला इमारतीतून खाली धक्का दिल्याची माहिती समोर आली आहे.
मुंबईतील गोरेगाव येथे धक्कादायक घटना समोर आली आहे. शिवशाही सोसायटीत सहाव्या मजल्यावरुन पडून अवघ्या 18 महिन्याच्या मुलीचा दुर्दैवी मृत्यू झाला आहे. बुधवारी रात्री ही घटना घडली आहे. या प्रकरणी पोलीस अधिक चौकशी करत आहेत. तसंच, शेजारी राहणाऱ्या 10 वर्षीय चिमुकलीवर संशय आहे.
14 ऑक्टोबर रोजी रात्री जेवण झाल्यानंतर चिमुकली घराबाहेर सहाव्या मजल्यावरील पॅसेजमध्ये खेळायला गेली होती. त्यावेळी 10 वर्षांची मुलगीही उपस्थित होती. यादरम्यान चिमुकली अचानक खाली कोसळली. धक्कादायक म्हणजे, 18 महिन्याची मुलगी खाली पडल्यानंतर अल्पवयीन मुलगी निघून गेली त्यानंतर थोड्याच वेळात पॅसेजमध्ये सायकल चालवत असल्याचे सीसीटीव्हीत दिसते.
बुधवारी साधारण 9 वाजण्याच्या सुमारास ही घटना घडल्याचे सांगितले जाते. सीसीटीव्ही फुटेजमध्ये ही घटना कैद झाली आहे. एका वृत्तसंस्थेने दिलेल्या माहितीनुसार, 10 वर्षांची अल्पवयीन मुलगी 18 महिन्यांच्या मुलीला खाली फेकताना दिसत आहे. नंतर कॉरिडॉरच्या बाजूला पळून जाताना दिसत आहे. या प्रकरणी पोलिसांनी अपघाती मृत्यूची नोंद केली असून या प्रकरणाचा तपास करण्यात येत आहे.
अधिकाऱ्यांनी दिलेल्या माहितीनुसार, पीडितेचे कुटुंब 1 ऑक्टोबर त्या इमारतीत राहायला आले होते. दोन्ही कुटुंबामध्ये यापूर्वी एका मांजरावरुन वाद झाला होता. एका पोलिस अधिकाऱ्याने दिलेल्या माहितीनुसार, सीसीटीव्ही फुटेजमध्ये एक लहान मुलगी सहाव्या मजल्यावरुन खाली पडताना दिसतेय. काही क्षणानंतर अल्पवयीन मुलगी घटनास्थळावरुन पळून जाताना दिसतेय. त्यानंतर त्याच मजल्यावरील पॅसेजमध्ये सायकल चालवताना दिसत आहे.
सूत्रांनुसार, अल्पवयीन मुलीच्या पालकांनी त्यांची मुलगी मानसिक आरोग्याच्या समस्यांनी त्रस्त असल्याचे म्हटलं आहे. मात्र पीडित मुलीच्या कुटुंबीयांनी या प्रकरणी कारवाई आणि न्यायाची मागणी केली आहे.
