...म्हणून मुंबईतील नगरसेवकांना हवी 300% सॅलरी Hike; मागणी मान्य झाल्यास नेमका किती होणार मासिक पगार? निवृत्तनंतर पेन्शन देण्याचीही मागणी
महाराष्ट्रात नगरसेवकांना तांत्रिकदृष्ट्या लोकप्रतिनिधी म्हणून मासिक मानधन दिले जाते. हे मानधन महानगरपालिकांच्या वर्गवारीनुसार निश्चत केले जाते. महापालिकांच्या अ प्लस, अ, ब, क, ड अशा श्रेणी आहेत.
मुंबई महापालिकेच्या नगरसेवकांना सध्या मिळणाऱ्या 25 हजार रुपयांच्या मानधनात वाढ करून ते एक लाख रुपये करण्यात यावे या मागणीचा नगरसेवकांनी पुनरुच्चार केला आहे. शिवसेना (ठाकरे) पक्षाच्या नगरसेविका दीपमाला बढे यांनी ही मागणी केली असून यापूर्वी समाजवादी पक्षाच्या एका नगरसेविकेनेदेखील ही मागणी केली होती. माजी नगरसेवकांसाठी निवृत्तीवेतन (पेन्शन) योजना लागू करण्यात यावी अशीही मागणी बढे यांनी केली आहे.
मागणी नगरसेवकांनी लावून धरली
पालिकेसह राज्यातील अ दर्जाच्या महापालिकांच्या नगरसेवकांना दरमहा 25 हजार रुपये मानधन मिळते. तर ब आणि क श्रेणीतील नगरसेवकांना 10 ते 15 हजार रुपये मानधन मिळते. तर मुंबई महापालिकेच्या नगरसेवकांना बेस्टचा बसप्रवासही मोफत मिळतो. तसेच तब्बल 1 कोटीचा नगरसेवक निधी आणि प्रभागातील कामे करण्यासाठी 60 लाखांचा निधी मिळतो. मात्र नगरसेवकांच्या मानधनात वाढ करावी अशी मागणी मुंबई महापालिकेच्या नगरसेवकांनी लावून धरली आहे.
कशासाठी हवी आहे वेतनवाढ?
शिवसेना (ठाकरे) पक्षाच्या भांडूपमधील नगरसेविका दीपमाला बडे यांनी याबाबतची ठरावाची सूचना मांडली आहे. त्यांनी म्हटले आहे की, महानगरपालिकेच्या नगरसेवकांना त्यांच्या प्रभागातील विकासकामे कार्यक्षमतेने पार पाडण्यासाठी, सध्या देण्यात येणारे प्रतिमाह 25 हजार इतक्या मानधनाऐवजी एक लाख प्रतिमाह इतके मानधन देण्यात यावे. बृहन्मुंबई महानगरपालिकेच्या माजी नगरसेवकांसाठी निवृत्तीवेतन (पेन्शन) योजना लागू करण्यात यावी अशीही मागणी त्यांनी केली आहे. म्हणजेच, 25 हजारांवरुन 1 लाख मानधन करण्याची मागणी ही 300 टक्के मानधन वाढवून देण्याची आहे.
227 नगरसेवकांच्या मानधनाचा खर्च किती येईल?
मुंबई महापालिकेचे 227 नगरसेवक असून 10 नामनिर्देशित नगरसेवक आहेत. या नगरसेवकांना दर महा एक लाखाचे मानधन दिल्यास त्याचा खर्च दरमहा 2 कोटी 37 लाखांवर जाणार आहे. तर हाच खर्च वार्षिक 28 कोटीवर जाणार आहे. माजी नगरसेवकांना निवृत्तीवेतन देण्याची मागणी केल्यास त्याचा मोठा ताण पालिकेच्या तिजोरीवर येणार आहे. त्यामुळे नगरसेवकांच्या या मागणीवर प्रशासन काय उत्तर देते याकडे आता सगळ्यांचे लक्ष लागले आहे.
कोणत्या महापालिकांमध्ये किती मानधन मिळते?
महाराष्ट्रात नगरसेवकांना तांत्रिकदृष्ट्या 'पगार' मिळत नाही. त्यांना लोकप्रतिनिधी म्हणून मासिक मानधन दिले जाते. हे मानधन महानगरपालिकांच्या वर्गवारीनुसार निश्चत केले जाते. महापालिकांच्या अ प्लस, अ, ब, क, ड अशा श्रेणी आहेत. मुंबई महापालिका ही एकमेव महापालिका आहे जी अ प्लस श्रेणीत येते. मुंबईतील नगरसेवकांना दरमहा ₹25 हजार मानधन मिळते. 'अ' श्रेणीमध्ये पुणे आणि नागपुरचा समावेश होतो. येथील नगरसेवकांना दरमहा ₹20 हजार मानधन दिले जाते.
'ब' श्रेणीत ठाणे, नाशिक आणि पिंपरी-चिंचवड महानगरपालिकांचा समावेश होतो. येथील नगरसेवकांना दरमहा ₹15 हजार रुपये मानधन मिळते. 'क' श्रेणीअंतर्गत नवी मुंबई, कल्याण-डोंबिवली, वसई-विरार आणि छत्रपती संभाजीनगरच्या महापालिका असून येथील नगरसेवकांना दरमहा ₹10 हजार मानधन मिळते. 'ड' श्रेणीत इतर उर्वरित लहान महानगरपालिकांचा समावेश आहे. 'ड' श्रेणीतील नगरसेवकांना दरमहा ₹7500 मानधन दिले जाते.
