चेंबूरमध्ये झाड कोसळून झालेल्या विहानच्या मृत्यूसाठी जबाबदार कोण? 2 महिन्यांनी चौकशी अहवाल सादर, म्हणाले 'असं एकच कारण...'
चेंबूरमध्ये झाड कोसळून शाळकरी मुलाच्या मृत्यू प्रकरणी चौकशी अहवाल महापालिकेकडे सुपूर्द करण्यात आला आहे. यामध्ये एकच कारण जबाबदार नसल्याचे सांगण्यात आले आहे.
चेंबूरमध्ये झाड कोसळून शाळकरी मुलाच्या मृत्यू प्रकरणी अखेर चौकशी अहवाल महापालिकेकडे सुपूर्द करण्यात आला आहे. यामध्ये एकच कारण जबाबदार नसल्याचे सांगण्यात आले आहे. चेंबूरमध्ये 30 जून रोजी शाळेच्या बसवर पिंपळाचे मोठे झाड कोसळून 11 वर्षीय विहान श्रीवास्तव याचा मृत्यू झाला होता. या दुर्घटनेच्या सखोल चौकशीसाठी मुंबई महापालिकेने स्वतंत्र समिती नियुक्त केली होती. या समितीने आपला अहवाल महापालिका प्रशासनाकडे सादर केला आहे.
मुंबई विद्यापीठाचे माजी कुलगुरू आणि वनस्पतीशास्त्रज्ञ प्रा. संजय देशमुख यांनी चौकशी अहवाल तयार केला. दोन महिन्यांहून अधिक काळ चाललेल्या चौकशीनंतर सोमवारी हा अहवाल महापालिका प्रशासनाकडे सादर करण्यात आला असून, झाड कोसळण्यामागे एकच कारण किंवा केवळ नैसर्गिक आपत्ती जबाबदार नसल्याचे अहवालात नमूद आहे.
दुर्घटनेच्या वेळी रस्त्याच्या दोन्ही बाजूंना वाहने पार्क करण्यात आली होती, अशी चौकशीत माहिती समोर आली आहे. झाड कोसळण्याच्या घटनेच्या वेळी पार्क केलेली वाहने अधिक वेगाने हलवण्यात आली असण्याची शक्यताही अहवालात व्यक्त करण्यात आली आहे.
झाड कोसळण्याच्या तात्कालिक कारणांपलीकडे जाऊन मुंबईतील वृक्षसंपदेचा आणि पर्यावरणीय परिस्थितीचा अभ्यास केला आहे. झाडांच्या आरोग्याचे आणि कोसळण्याच्या धोक्याचे शास्त्रीय पद्धतीने मूल्यांकन करण्याची शिफारस करण्यात आली आहे. झाडांच्या मुळांच्या परिसराचे संरक्षण करण्यावर भर दिला आहे.
रस्त्यांवरील खोदकाम, बांधकाम आणि भूमिगत सुविधांची कामे करताना झाडांच्या मुळांना धोका पोहोचणार नाही, याची काळजी घेण्याची सूचनादेखील देण्यात आली आहे. मातीची स्थिती, पाण्याचा निचरा आणि हवामानातील बदल यांचा झाडांच्या स्थिरतेवर होणारा परिणाम तपासण्याची शिफारस आहे. केवळ वरवरची पाहणी करून झाड सुरक्षित असल्याचा निष्कर्ष न काढता दीर्घकालीन निरीक्षण करण्याची गरज व्यक्त केली आहे.
मुंबईतील विविध रस्त्यांवर उपलब्ध जागा, रस्त्यांचे स्वरूप आणि शहरी पर्यावरण लक्षात घेऊन योग्य वृक्षप्रजातींची लागवड करण्याची शिफारस करण्यात आली आहे. मुंबईतील वृक्ष व्यवस्थापन आणि त्याभोवतालच्या पायाभूत सुविधांच्या नियोजनात मूलभूत बदल करण्याची सूचनाही दिली आहे.
नेमकं काय झालं होतं?
30 जून 2026 रोजी मुंबईत पावसाने जोरदार हजेरी लावली होती. यावेळी चेंबूरमध्ये वार्ड नंबर 11 मधील रस्त्यावरुन जाणाऱ्या एका स्कूल बसवर (Bus accident) मोठं झाड कोसल्याने भीषण अपघात झाला. या बसमधील 10 लहान मुले झाडाखाली अडकली होती, यातील सर्वांना बाहेर काढले. मात्र, विहानचा दुर्दैवी मृत्यू झाला. यानंतर महापालिका आयुक्त अश्विनी भिडे यांनी नियुक्त केलेल्या समितीने पायाभूत सुविधा प्रकल्पांमुळे बाधित होणाऱ्या झाडांच्या संरक्षणासाठी कंत्राटदार आणि संबंधित महापालिका विभागांना जबाबदार धरण्याची शिफारस केली होती.
