विरारकरांची लोकलच्या गर्दीतून सुटका होणार, बोरीवली स्थानकात मोठे बदल, नागरिकांचा प्रवास आरामदायी होणार

विरारकरांना लोकल प्रवास हा नेहमीच गर्दीतून आणि धक्काबुक्की करत करावा लागतो. चर्चेगेट-विरार प्रवासाला दोन तास तरी लागतात. लांबचा प्रवास मात्र तोही गर्दीतून करावा लागत असल्याने प्रवाशांना मोठा त्रास सहन करावा लागतो. मात्र आता प्रवाशांचा लोकल प्रवास सुखद होणार आहे.

पश्चिम रेल्वेने बोरीवली स्थानकात दोन नवे प्लॅटफॉर्म उभारण्याचे नियोजन अंतिम केले आहे. यामुळे अंधेरी-विरार विभागात 30 ते 40 अतिरिक्त लोकल सेवा सुरू करण्याचा मार्ग मोकळा होणार आहे. बोरीवली-विरार पाचवी-सहावी मार्गिका प्रकल्पाचा भाग म्हणून प्लॅटफॉर्म क्रमांक 3च्या उत्तर टोकाला 330 मीटर लांब आणि सात मीटर रुंद होम प्लॅटफॉर्म उभारण्यात येणार आहे.

या प्लॅटफॉर्मवरुन विरारसाठी सुरू आणि विरारहून संपणाऱ्या लोकल चालविण्याचे नियोजन आहे. त्यामुळे मुख्य मार्गिका मोकळी राहण्यास मदत होईल. तसेच गोरेगाव-बोरीवली हार्बर मार्गिका विस्ताराचा भाग म्हणून प्लॅटफॉर्म क्रमांक 1च्या दक्षिणेला 330 बाय ७मीटरचा प्लॅटफॉर्म उभारण्यात येणार आहे. सध्या येथे स्टेबलिंग मार्गिका असून, त्या स्थलांतरित केल्यानंतर काम सुरू होईल. याशिवाय प्लॅटफॉर्म क्रमांक 10ची उत्तर दिशेला 85मीटर आणि दक्षिण दिशेला 110 मीटर लांबी वाढविण्यात येईल.

अंधेरी, विरार स्थानकांमध्येही नवे प्लॅटफॉर्म

अंधेरी आणि विरार स्थानकात पूर्वेकडील बाजूला प्रत्येकी एक नवीन प्लॅटफॉर्म उभारण्याची योजना आहे. पाचवी-सहावी मार्गिका स्वतंत्र झाल्यानंतर विरार-डहाणू लोकलला मेल-एक्स्प्रेसच्या मार्गिकेची वाट पाहावी लागणार नाही. त्यामुळे वेळेचे नियोजन सुधारून 30 ते 40 अतिरिक्त लोकल चालविता येतील.

बोरीवलीहून बोरीवलीहून विरारची लोकल मिळाल्याने सांताक्रूझ-अंधेरीच्या प्रवाशांनाही फायदा होईल. सध्या चार मार्गिकांवर लोकल व लांब पल्ल्याच्या गाड्या धावतात. दोन मार्गिका वाढल्याने मेल-एक्स्प्रेस गाड्यांना बोरीवलीबाहेर थांबविण्याची गरज कमी होऊन वेग वाढण्यास मदत होईल.