मुंबईकरांचा खोळंबा कायम, महत्त्वाच्या उड्डाणपुलाला ब्रेक; कारण आलं समोर
बांधकामाआधीच पुलाच्या आराखड्याची फेरतपासणी करण्याचा निर्णय महापालिकेने घेतला आहे.
चुनाभट्टी रेल्वे फाटकामुळे लोकल वेळापत्रकावर होणारा परिणाम आणि रस्त्यावरील वाहतूककोंडीवर तोडगा काढण्यासाठी पालिकेचा उड्डाणपुल उभारण्याचा निर्णय घेण्यात आला आहे. मात्र बांधकाम करण्याआधीच फेरतपासणी करण्याचा निर्णय घेण्यात आला आहे. यासाठी आयआयटी मुंबईची नियुक्ती केली जाणार आहे. यासाठी मुंबई महानगरपालिका 18.70 लाखांचे शुल्क मोजणार आहे.
दिवा, कुर्ला, चुनाभट्टी आणि शिवडी येथील प्रत्येक फाटक दिवसाला ३० ते ३५ वेळा उघडबंद होते. यामुळे लोकल वेळापत्रकावर परिणाम होतो. परिसरातील रस्ते वाहतूकही विस्कळीत होते. त्यामुळे तेथे उड्डाणपूल उभारण्याचा निर्णय महापालिकेने घेतला. मात्र, बांधकामापूर्वी आराखड्याची तज्ज्ञ संस्थेकडून छाननी करण्याचे पालिकेने ठरवले आहे. आयआयटी
मुंबईकडून पुलाची संरचनात्मक सुरक्षितता, तांत्रिक गणिते आणि प्रस्तावित बांधकाम पद्धती योग्य आहे का, याची तपासणी केली जाणार आहे.
या फेरतपासणी सल्लागार सेवेचा कालावधी २४ महिने ठेवण्यात आला आहे. त्यामुळे पुलाचे काम नेमके कधी सुरू होणार आणि किती विलंब होणार, याबाबत प्रश्नचिन्ह निर्माण झाले आहे. तसंच, या उड्डाणपुलासाठी ऑक्टोबर 2024 मध्ये निविदा काढली होती. या कामाचा अंदाजित खर्च 37.41 कोटी रु. होता. मंजुरीच्या टप्प्यापर्यंत तो 41.77 कोटी रुपयांवर गेला.
असा असेल चुनाभट्टी रेल्वे उड्डाणपूल
पुलाची लांबी रेल्वे क्षेत्रावर : 36 मीटर
पुलाची लांबी महापालिका क्षेत्रावर : 254 मीटर
पुलाची रुंदी रेल्वे क्षेत्रावर : 11.30 मीटर
पुलाची रुंदी महापालिका क्षेत्रावर : 8.5मीटर
बांधकामाचा प्रकार: आरसीसी व लोखंडी बांधकाम
घाटकोपर पुलाचा यू-टर्न
घाटकोपरसाठी नव्या रेल्वे उड्डाणपुलाचे बांधकाम सुरू झाले. पण बांधकाम सुरू केल्यानंतर अवघ्या काही दिवसांतच तीन खांब पाडण्याची नामुश्की प्रशासनावर आली आहे. उड्डाणपुलाच्या आराखड्यात त्रुटी निर्माण झाल्या कारणाने सुमारे 30 टक्के काम पूर्ण झाल्यानंतर आधीच उभारण्यात आलेले तीन खांब अंशतः पाडण्यात येत आहेत. वाहतुकीची भविष्यातील गरज लक्षात घेऊन हा बदल करण्यात येत असून महाराष्ट्र रेल्वे इन्फ्रास्ट्रक्चर डेव्हलपमेंट कॉर्पोरेशनकडून (महारेल) अधिक उंचीवर पुन्हा बांधकाम होणार आहे.
