मुंबईतील महत्त्वाच्या उड्डाणपुलाचा विस्तार होणार; वाहतुक कोंडी फुटणार तर, या नागरिकांना होणार फायदा!
सायन (शीव) उड्डाणपुलाचा विस्तार होणार आहे. त्याचा फायदा मुंबईतील रहिवाशांना होणार आहे.
अनेक महिन्यांपासून रखडलेला शीव (सायन) उड्डाणपूलाचे अखेर उद्घाटन झाले आहे. या उड्डाणपुलामुळं वाहतूक कोंडीपासून मुंबईकरांची सुटका होणार आहे. त्याचबरोबर प्रवाशांना आणखी दिलासा देण्याचा निर्णय महानगरपालिकेने घेतला आहे. शीव उड्डाणपुलाचा आता आणखी विस्तार होणार आहे. या नव्या पुलाच्या कामात आणखी दोन मार्गिका बांधण्यात येणार आहेत.
पालिका डॉ. बाबासाहेब आंबेडकर मार्गावरील (शीव सर्कलजवळ) शीव उड्डाणपुलाचा विस्तार करीत आहे. या नव्या मार्गिकेमुळं ठाणे, चेंबूर, शीवमार्गे दक्षिण मुंबई, छत्रपती शिवाजी महाराज टर्मिनसकडे जाणारा प्रवास वेगवान होणार आहे. या नव्या पुलासाठी पालिका 130 कोटींचा खर्च करीत असून डिसेंबर 2027 पर्यंत हा पूल बांधून पूर्ण करण्याचे उद्दिष्ट आहे.
डॉ. बाबासाहेब आंबेडकर मार्गावरील शीव सर्कल परिसरात गर्दीच्या वेळी वाहतूककोंडी होते. सध्या या पुलाला तीन मार्गिका आहेत. ठाणे पूर्व उपनगराकडे उत्तर दिशेने जाणाऱ्या गाड्यांसाठी दोन मार्ग आहेत आणि दक्षिण मुंबईकडे जाणाऱ्या वाहनांसाठी एक मार्गिका आहे. या पुलाला समांतर अतिरिक्त दोन मार्गिका उभारण्याचा निर्णय पालिकाने घेतला आहे.
सध्या अतिरिक्त दोन मार्गिकांची पायलिंगसह काही कामे सुरू झाली असून 25 टक्के कामे पूर्ण झाली आहेत. या दोन अतिरिक्त मार्गिका असलेल्या पुलाची लांबी 1 हजार 320 मीटर आणि रुंदी 7.5 मीटर आहे.
शीव पुलाचा विस्तार हा मध्य रेल्वेच्या समन्वयाने बांधण्यात येणार आहे. या विस्तारित मार्गिकांमुळं शीव सर्कलजवळील वाहतुककोंडी फुटेल. तसंच, या मार्गिकांवरुन ठाण्याहून आल्यानंतर दक्षिण मुंबईकडे छत्रपती शिवाजी महाराज टर्मिनसकडे जाणाऱ्या एकूण पाच मार्गिका उपलब्ध होतील.
त्यामुळे दररोज गर्दीच्या वेळी होणाऱ्या वाहतूक कोंडीतून सुटका होण्यास मदत होणार आहे. नवीन पुलाच्या उभारणीमुळे अतिरिक्त जागा उपलब्ध होऊन रेल्वे मार्गिकेचा विस्तार करणे शक्य होणार आहे. मात्र पालिकेने या पुलाच्या मार्गिकांचा विस्तार करण्याचा निर्णय घेतला आहे.
