एकाच ट्रीपमध्ये समुद्र, किल्ले अन् जंगल सफारी, राज्य सरकारचं नवं पर्यटन धोरण; तुम्हाला काय आणि कसा फायदा होणार जाणून घ्या
सामान्यपणे भटकंती म्हटलं की एकाच पर्यटनस्थळी जाऊन पुन्हा घरी यायचं आणि मग दुसऱ्या ठिकाणी पुढल्या वेळी प्लॅन करायचा. पण आता नव्या धोरणामुळे एकाच ट्रीपमध्ये अनेक पर्यंटनस्थळं पाहता येणार आहेत. ती कशी हे जाणून घेऊयात...
राज्य सरकारने पर्यटनस्थळांना एकमेकांशी जोडण्याचा निर्णय घेतला आहे. यामुळे पर्यटकांना मोठा फायदा होणार आहे. एखादे पर्यटनस्थळ पाहून परतण्याऐवजी एकाच सफरीत आसपासची अनेक ठिकाणे पाहता यावीत, यासाठी हे नवीन धोरण लागू केलं जाणार आहे. 'विकसित महाराष्ट्र 2047' अंतर्गत 1 एप्रिल 2026 ते 31 मार्च 2030 या चार वर्षांत राज्यात 100 पर्यटन सर्किट विकसित करण्याचा आराखडा पर्यटन विभागाने जाहीर केला आहे. नेमका याचा काय आणि कसा फायदा होणार आहे जाणून घेऊयात सविस्तरपणे...
एकत्र जोडली जाणार ठिकाणं
या सर्किटमध्ये समुद्रकिनारे, किल्ले, धार्मिक स्थळे, वन्यजीव, जलपर्यटन आणि शहरातील ऐतिहासिक ठिकाणे एकत्र जोडली जाणार आहेत. त्यामुळे पर्यटकांना एका ठिकाणाहून दुसन्या ठिकाणी सहज जाता येईल आणि त्यांचा मुक्कामही वाढेल. दरम्यान, अजिंठा-वेरूळ, लोणार, महाबळेश्वर-पाचगणी, रायगडचे किल्ले, नाशिकची धार्मिक व द्राक्ष पर्यटनस्थळे, शिर्डी, कोल्हापूर, सिंधुदुर्ग-मालवण, ताडोबा आणि मेळघाट यांनाही अशा सर्किटमधून जोडले जाणार आहे. रस्ते, रेल्वे, हवाई आणि जलमार्गाने जोडणीसोबत आरोग्य, पोलिस मदत, इंटरनेट आणि पर्यटकांसाठी माहिती व्यवस्था उपलब्ध करण्याचे नियोजन आहे.
रात्रींचा मुक्काम वाढविण्यासाठी होमस्टे, रिसॉर्टची सुविधा
पर्यटकांना एक ते पाच रात्रींचा मुक्काम करता यावा यासाठी हॉटेल निवासस्थाने, भोजन आणि मनोरंजनाच्या सुविधा उपलब्ध करण्यावर भर दिला जाणार आहे.
3 पर्यटनस्थळे बंधनकारक
नव्या निकषांनुसार प्रत्येक पर्यटन सर्किटमध्ये किमान तीन प्रमुख पर्यटनस्थळे, एन्ट्री पॉइंट, असेम्बली पॉइंट आणि किमान एक प्रमुख वाहतूक केंद्र असणे आवश्यक आहे. सर्किट एका जिल्ह्यात किंवा अनेक जिल्ह्यांत विस्तारू शकते, पर्यटनस्थळांमधील अंतर पर्यटकांच्या प्रवासासाठी व्यावहारिक असणे अपेक्षित आहे.
नवी मुंबई-उरणला संधी
डीपीएस फ्लेमिंगो लेक, वाशी खाडी, बेलापूर किल्ला, नेरुळ-सीवुड्सचा किनारा, उरणमधील करंजा, पीरवाडी, मोरा जेट्टी, शेवा आणि जेएनपीए परिसर जल व निसर्ग पर्यटनासाठी जोडता येऊ शकतात. पुढे घारापुरी लेणी, मुंबई बंदर आणि दक्षिण मुंबईतील ऐतिहासिक ठिकाणे जोडल्यास मुंबई-नवी मुंबई-उरण-धारापुरी असा आकर्षक पर्यटन मार्ग तयार होऊ शकतो. ठाणे खाडी, येऊर, उपवन आणि संजय गांधी राष्ट्रीय उद्यानही या साखळीत जोडता येणार आहे, अशी माहिती नवी मुंबई महापालिकेच्या एका अधिकाऱ्याने दिली.
नवी मुंबईत काय पाहणार?
फ्लेमिंगो लेक, वाशी खाडी, बेलापूर किल्ला, नेरुळ-सौवुड्स किनारा, करंजा, पीरवाडी, मोरा जेट्टी, शेवा, जेएनपीए
