पुन्हा भाडेवाढीचे संकट! रिक्षा-टॅक्सीचालकांकडून दरवाढीची मागणी, काय आहे कारण आणि किती करणार दरवाढ?
सर्वसामान्यांच्या खिशाला कात्री बसण्याची शक्यता आहे. कारण पुन्हा एकदा रिक्षा-टॅक्सीचालकांकडून दरवाढीची मागणी करण्यात आली आहे.
मुंबईकरांसाठी महत्त्वाची बातमी आहे. मुंबईत असंख्य लोक हे रिक्षा टॅक्सीने दररोज प्रवास करतात. या ग्राहकांचया खिशाला कात्री बसण्याची शक्यता आहे. कारण रिक्षा-टॅक्सीचालकांकडून पुन्हा एकदा दरवाढीची मागणी करण्यात आलीय. दोन दिवसांपूर्वी सीएनजीच्या दरात वाढ झाल्यामुळे रिक्षा-टॅक्सीच्या दरात वाढ करण्याची मागणी करण्यात आली आहे.
गेल्या सहा महिन्यांत सीएनजीच्या दरात प्रति किलो 8 रुपयांची वाढ झाली आहे. नोव्हेंबर महिन्यात पुन्हा सीएनजीच्या दरात प्रति किलो 1 रुपयाची वाढ झाल्यामुळे सीएनजीचा दर आता प्रति किलो 90 रुपयांवर पोहोचला. त्यामुळे इंधन खर्च वाढल्याने रिक्षा-टॅक्सी चालवणे परवडत नसल्याची चालकांची तक्रार आहे. त्यामुळे रिक्षा - टॅक्सीची भाडेवाढ करण्यात यावी अशी मागणी जोर धरत आहे.
मुंबईकरांच्या खिशावर किती भार वाढेल?
दैनंदिन प्रवासासाठी मोठ्या प्रमाणात मुंबईकर रिक्षा - टॅक्सीचा पर्याय निवडतात. त्यामुळे रिक्षा - टॅक्सी चालक यांनी किती रुपयांची दरवाढची मागणी केली आहे, हे जाणून घेणे महत्त्वाचे असणार आहे. कारण याचा थेट परिणाम मुंबईकरांच्या महिन्याच्या बजेटवर होणार आहे. तर रिक्षाच्या किमान मीटर भाड्यात 2 रुपयांनी तर टॅक्सीच्या किमान मीटर भाड्यात 3 रुपये वाढ करण्याचीही मागणी करण्यात आली आहे.
रिक्षा - टॅक्सी चालकांनी सांगितलं की, सीएनजी दरवाढीचा थेट परिणाम चालकांच्या रोजच्या उत्पन्नावर होत आहे. शिवाय वाहन देखभाल खर्च, कर्जाचे हप्ते आणि घरखर्च भागवताना चालकांची आर्थिक कसरत होत आहे. त्यामुळे त्यांना ही दरवाढी करण्याची गरज भासतेय.
महत्त्वाचे म्हणजे 2 सप्टेंबरपासून मुंबई महानगर प्रदेश परिवहन प्राधिकरणाकडून (MMRTA) यापूर्वीच रिक्षाच्या किमान भाड्यात 1 रुपये आणि टॅक्सीच्या भाड्यात 2 रुपयांची वाढ केली आहे. त्यामुळे पुन्हा एकदा दरवाढ केल्यास सर्वसामान्यांना मोठा फटका बसणार आहे. तर महानगर गॅसकडून सातत्याने होणाऱ्या दरवाढीमुळे चालकांवर आर्थिक बोजा वाढत असल्याचे संघटनांचे म्हणणे आहे. सीएनजी दरवाढीच्या तुलनेत प्रवासी वाहतुकीचे भाडे वाढवण्याची चालकांनी मागणी केली आहे.
मुंबईतील सीएनजी दरवाढ
कालावधी | प्रति किलो दर |
| मे – पहिली वाढ | ₹८४
| मे – दुसरी वाढ | ₹८६
| सप्टेंबर | ₹८८
| ऑक्टोबर | ₹८९
| नोव्हेंबर | ₹९०
