...म्हणून मी नागपूर-मुंबई 'दुरांतो'वर दगडफेक केली; आरोपीने सांगितलं धक्कादायक कारण! पोलिसही थक्क
या व्यक्तीने केलेल्या दगडफेकीमध्ये दुरांतो एक्सप्रेसच्या तीन डब्यांचं नुकसान झालं. हा सारा घटनाक्रम झाल्यानंतर पळून गेलेल्या आरोपीचा शोध घेण्यासाठी पोलिसांची एक टीम तयार करुन तपास करण्यात आला. नेमका हा आरोपी कसा सापडला आणि त्याने या कृत्यामध्ये काय कारण सांगितलं जाणून घ्या...
नागपूरवरून सुटलेल्या आणि मुंबईकडे येणाऱ्या दुरांतो एक्स्प्रेसवर दगडफेक करणाऱ्या व्यक्तीला अटक करण्यात आली आहे. विशेष म्हणजे या व्यक्तीने वैयक्तिक कारणामधून आलेल्या निराशेमधून रेल्वेच्या मालमत्तेचं नुकसान केल्याचं समोर आलं आहे. दुरांतो एक्स्प्रेसच्या तीन एसी कोचच्या काचा फोडणाऱ्या भामट्याला अजनी रेल्वे सुरक्षा दल आणि विशेष तपास शाखेने अटक केली आहे. अटकेनंतर त्याने या कृत्यामागील खरं कारण सांगितलं आहे.
आरोपीने सांगितलं कारण
नागपूरमध्ये दुरांतोवर दगडफेक करणाऱ्या व्यक्तीचं नाव नरेंद्र कुमार हिसाबीलाल सिरसाम असं असून तो 35 वर्षांचा आहे. नरेंद्र हा मूळचा मध्य प्रदेशमधील मंडला येथील नैनपूर तालुक्यातील रामगडीमध्ये राहणार आहे. तो बांधकाम मिस्त्री म्हणून काम करतो. कामानिमित्त तो पत्नीसह बोरखेडी परिसरात आला होता. अटकेनंतर बायकोशी भांडण झाल्यानंतर मद्यधुंद अवस्थेत आपण रागाच्या भरात दगडफेक केल्याची कबुली आरोपीने दिल्यामुळे रेल्वे सुरक्षा दलाचे अधिकारीही चक्रावले.
सीसीटीव्ही फुटेजने खुलासा
रेल्वे सुरक्षा दलाने दगडफेकीच्या घटनेची चौकशी केल्यानंतर बोरखेडी नगरपंचायतचे सीसीटीव्ही फुटेज तपासले असता घटनेच्या वेळी आरोपी रेल्वे रुळाकडे जाताना दिसला. तसेच दोन व्यक्तींनी तो घटनेच्या वेळी रेल्वे रुळाकडे जाताना पाहिल्याचे रेल्वे सुरक्षा दलाच्या अधिकाऱ्यांना सांगितले. त्यामुळे रेल्वे सुरक्षा दलाला आरोपीविरुद्ध सबळ पुरावे मिळाले आहेत.
कसा सापडला आरोपी?
दुरंतोवर दगडफेक झाल्यामुळे रेल्वे सुरक्षा दलाने चौकशी सुरू करून अज्ञात आरोपीविरुद्ध रेल्वे अॅक्ट 153, 147 नुसार गुन्हा दाखल केला. रेल्वे सुरक्षा दलाचे वरिष्ठ विभागीय सुरक्षा आयुक्त मनोज कुमार यांनी या घटनेच्या तपासासाठी अजनी रेल्वे सुरक्षा दलाचे पथक गठित केले. पथकाने बोरखेडी रेल्वेस्थानक, ब्राह्मणी गाव व बुटीबोरी परिसरात तपास सुरू केला. पोलिस बोरखेडीत दगडफेकीची चौकशी करीत असल्यामुळे आरोपीने तेथून पलायन करून नागपूर शहरात बांधकाम मिस्त्रीकडे काम सुरू केले. आरोपी नागपुरात ऑटोमोटिव्ह चौकात असल्याची माहिती मिळताच रेल्वे सुरक्षा दलाने त्यास बेड्या ठोकल्या.
नेमकं त्या दिवशी झालं काय?
25 सप्टेंबरला नरेंद्रचे पत्नीसोबत जोराचे भांडण झाले. रागाच्या भरात त्याने तीन वेळा मद्यपान केलं. त्यानंतर मद्यधुंद अवस्थेत तो रात्री साडेआठ वाजता बोरखेडी रेल्वेस्थानकाच्या बाजूला असलेल्या परिसरात आला. आरोपीने मोठमोठे दगड घेतले अन् दुरांतो एक्स्प्रेसवर भिरकावले. यात दुरांतो एक्स्प्रेसच्या ए 2, बी 1 आणि बी 5 या कोचच्या काचा फुटल्या. या घटनेमुळे संबंधित कोचमधील प्रवासी घाबरले. दुरांतो एक्स्प्रेस वर्धा रेल्वेस्थानकावर पोहोचल्यानंतर प्रवाशांनी घटनेची माहिती रेल्वे पोलिस व रेल्वे सुरक्षा दलाला दिली. अर्ध्या तासानंतर ही गाडी पुढील प्रवासासाठी रवाना करण्यात आली होती.
