डोंगराळे अत्याचार व खून प्रकरण: नराधम विजय खैरनार दोषी, जन्मठेप होणार की मृत्यूदंड?

मालेगाव तालुक्यातील डोंगराळे येथे साडेचार वर्षीय बालिकेवर लैंगिक अत्याचार करुन तिची निर्घृण हत्या करण्यात आल्याचे प्रकरण घडले होते. या प्रकरणात आता आरोपीवर गुन्हा सिद्ध झाला आहे. आरोपीवर वेगवेगळे चार गुन्हे सिद्ध झाले आहेत. बुधवारी न्यायालयाने मोठा निकाल दिला आहे. येथील जलदगती न्यायालयाने आरोपी विजय खैरनार याला अपहरण, लैंगिक अत्याचार आणि खुनाच्या आरोपांखाली दोषी ठरवले. अप्पर जिल्हा न्यायाधीश के. जी. पालेदार यांनी हा निकाल जाहीर केला असून आरोपीला काय शिक्षा होणार, याचा फैसला 7 ऑक्टोबरच्या सुनावणीनंतर होणार आहे.

आरोपी विजय खैरनार याच्यावर चार गुन्ह्यात दोष निश्चिती झाली आहे. या गुन्ह्यात जन्मठेप किंवा मृत्यूदंडाची शिक्षा आहे. तसंच, मरेपर्यंत जन्मठेप किंवा फाशीची शिक्षेची तरतूद आहे. सर्वोच्च न्यायालयाच्या आदेशान्वये आरोपीवर सिद्ध झालेले गुन्हे व शिक्षेबद्दल आरोपी व आरोपीच्या वकिलांना त्यांचे म्हणणे मांडण्याची एक आठवड्याची संधी दिली आहे.

यावेळी आरोपीची मागील एक वर्षात जेलमधील वागणूक त्याची गावातील वागणूक याबद्दल माहिती घेण्यात येणार आहे. तसंच, गुन्हे व शिक्षेबद्दल लेखी किंवा तोंडी म्हणणे न्यायालयाला सादर करण्याचे आदेश देण्यात आले आहेत.

आरोपीवर दोष सिद्ध झाला असून जन्मठेप किंवा मृत्युंदंडाची शिक्षा द्यायची यावर पुढील 7 ऑक्टोबरला अहवाल सादर करण्याचे आदेश न्यायालयाला देण्यात आले आहेत.  पुढील सुनावणी 7 ऑक्टोबरला असून शिक्षा सुनावण्यात येणार आहे.

काय आहे नेमकं प्रकरण?

मागीच वर्षी 16 नोव्हेंबर रोडी डोंगराळे गावातून साडेचार वर्षांच्या चिमुरडीचे अपहरण करण्यात आले होते. त्यानंतर तिच्यावर लैंगिक अत्याचार करुन तिची हत्या करण्यात आली. या घटनेने राज्यभरात संतापाची लाट उसळली होती.  आरोपीला तात्काळ फाशीची शिक्षा देण्यात यावी, अशी मागणी जोर धरू लागली होती. पोलिसांनी तपासाची चक्रे वेगात फिरवत अवघ्या काही तासांत गावातील विजय खैरनार याला अटक केली. गेल्या 10 महिन्यांपासून या प्रकरणाची सुनावणी जलदगती न्यायालयात सुरू होती.