IT इंजिनीयर, पुण्यातील झांबरे पॅलेच्या मालकाची सून, पायलचा मृत्यू, पती अक्षय झांबरेला अटक

पुणे क्राईम : पुण्यात एका 29 वर्षीय विवाहितेने आत्महत्या केली आहे. सासरच्या जाचाला कंटाळून विवाहितेने राहत्या घरी गळफास घेत आत्महत्या केली. पायल झांबरे असं आत्महत्या केलेल्या विवाहितेचे नाव आहे. पायल झांबरे नामांकित झांबरे पॅलेच्या मालकाची सून असल्याची माहिती आहे. या घटनेनंतर संतप्त नातेवाईकांनी झांबरे पॅलेस मंगल कार्यालयाची तोडफोड केली. कौंटुबिक वादातून आत्महत्या केल्याचा नातेवाईकांचा आरोप आहे. पती अक्षय झांबरेला अटक करण्याकत आली आहे.

मुकुंदनगर परिसरातील अक्षय हाइट्स सोसायटीमधील जुन्या फ्लॅटमध्ये पायल अक्षय झांबरे (वय ३०) या सॉफ्टवेअर अभियंता विवाहितेचा मृतदेह आढळल्याने खळबळ उडाली आहे. पायल यांच्या मृत्यूनंतर माहेरच्या नातेवाइकांनी सासरच्या मंडळींवर हुंडा आणि सोन्याच्या मागणीसाठी शारीरिक व मानसिक छळ केल्याचा गंभीर आरोप केला आहे. या घटनेनंतर संतप्त नातेवाइकांनी झांबरे पॅलेस येथे तोडफोड केल्याचे वृत्त आहे. त्यामुळे या प्रकरणाला आता वेगळे वळण मिळाले आहे.

पायल या एका नामांकित माहिती-तंत्रज्ञान कंपनीत सॉफ्टवेअर अभियंता म्हणून कार्यरत होत्या. त्यांचा अक्षय झांबरे यांच्याशी सुमारे पाच वर्षांपूर्वी विवाह झाला होता. या दाम्पत्याला एक मुलगी आहे.
सोमवारी (२ नोव्हेंबर) मुकुंदनगर येथील अक्षय हाइट्स सोसायटीतील जुन्या फ्लॅटमध्ये पायल यांचा मृतदेह छताच्या पंख्याला लटकलेल्या अवस्थेत आढळला. 

पायल रविवार रात्रीपासून दिसत नसल्याची माहिती नातेवाइकांना मिळाली होती. त्यानंतर त्यांच्या कुटुंबीयांनी घटनास्थळी धाव घेतली. स्वारगेट पोलिसांनी घटनास्थळी पोहोचून मृतदेह ताब्यात घेतला आणि शवविच्छेदनासाठी ससून रुग्णालयात पाठविला.

पायल यांचे चुलत भाऊ जनार्दन पवार यांनी केलेल्या आरोपांनुसार, दर दिवाळीत पाच ते दहा तोळे सोन्याची मागणी केली जात होती. यंदा ही मागणी पूर्ण करणे शक्य नसल्याने माहेरच्या मंडळींनी पुढील वर्षापर्यंत थांबण्याची विनंती केली होती. मात्र, त्यानंतरही पायल यांचा छळ सुरू असल्याचा आरोप नातेवाइकांनी केला आहे.

दरम्यान, या आरोपांमुळे आणि नातेवाइकांच्या संतापामुळे परिसरात तणावाचे वातावरण निर्माण झाले.  या प्रकरणात मृत्यूचे नेमके कारण, छळाच्या आरोपांची सत्यता आणि तोडफोडीच्या घटनेबाबत पोलिस तपासातून पुढील माहिती स्पष्ट होणे अपेक्षित आहे.