52 कोटी ग्राहक, ₹60 लाख कोटींच्या ठेवी असलेल्या भारतीय बँकेवर सायबर हल्ला; ग्राहकांच्या अकाऊंटवरील पैशांचं काय होणार? बँकेनेच सांगितलं; इथं तुमचं खातं तर नाही ना?
बँकेच्या देशभरामध्ये 22500 पेक्षा जास्त शाखा आहेत. तर या बँकेची देशात एकूण 63580 इतक्या मोठ्या संख्येनं एटीएम आहेत. ही देशातील सर्वात मोठी बँक असून तिच्यासोबत नेमकं घडलं काय? खातेदारांच्या पैशाचं काय होणार? जाणून घ्या..
भारतामधील सर्वात मोठी सरकारी बँक असलेल्या भारतीय स्टेट बँकेवर म्हणजेच एसबीआयवर सायबर हल्ला झाला आहे. या बँकेतील 3897 ग्राहकांची खासगी माहिती डार्क वेबवर टाकण्यात आली असून यामुळेच एकच खळब उडाली आहे. सदर प्रकरणामध्ये आता बँकेने चौकशी सुरु केली असून दुसरीकडे हा प्रकार समोर आल्याने ग्राहकांमध्ये चिंतेचे वातावरण आहे. आपल्या खात्यावरील पैसे सुरक्षित आहेत ना? खात्यांवरील पैसे परस्पर कुठे जाणार तर नाहीत ना? अशी भीती कोट्यवधी ग्राहकांना वाटत असून यासंदर्भात आता बँकेनेच आपली भूमिका स्पष्ट केली आहे. या सायबर हल्ल्याचा खातेदारांच्या खात्यावरील पैशावर काही परिणाम झाला आहे का? नेमकं काय झालंय? याबद्दल बँकेने स्पष्टीकरण दिलं असून त्यात काय म्हटलंय ते पाहूयात...
हल्ल्याची माहिती मिळाल्यापासून बँकेने काय केलं?
देशातील वेगवेगळ्या यंत्रणांना सायबर हल्ल्यांसंदर्भात लक्ष ठेवणाऱ्या आणि सेवा पुरवठा करणाऱ्यांकडून तसेच संरक्षण सायबर एजन्सीकडून आणि भारतीय संगण आपत्कालीन प्रतिसाद पथक म्हणजेच सीईआरटी-इनकडून एसबीआयला 16 ऑक्टोबर रोजी झालेल्या सायबर हल्ल्याची माहिती मिळाली. यानंतर बँकेने तातडीने तपास सुरु करतानाच बँकेची सायबर सुरक्षा यंत्रणा सक्रिय केली. माहितीचा संभाव्य गैरवापर रोखण्यासाठी आणि घटनेची व्याप्ती निश्चित करण्यासाठी उपाययोजना सुरू करण्यात आल्या असून ज्या माहितीवर सायबर चोरांनी डल्ला मारला आहे ती कुठून आणि कशी लीक झाली? त्याचा ग्राहकांना आणि बँकेला कसा फटका बसू शकतो याचे मूल्यांकन केलं जात आहे. चोरीला गेलेल्या माहितीचा गैरवापर रोखण्यासाठी बँकेने बँकएण्डमध्ये उपाययोजना सुरु केल्या आहेत. मुख्य बँकिंग व्यवहार, आर्थिक कामगिरी किंवा व्यवसायाच्या सातत्यावर या साऱ्याचा कोणताही मोठा परिणाम झालेला नसल्याचा दावा बँकेने केला आहे. बँकेचे नियमित दैनंदिन कामकाज कोणत्याही व्यत्ययाशिवाय सुरू असल्याचं एसबीआयकडून सांगण्यात आलं आहे.
कोणती माहिती लीक झाली?
एसबीआयच्या ग्राहकांची नावं, लिंग, जन्मतारखा, मोबाइल क्रमांक, ई-मेल आणि घराचे पत्ते असलेल्या डेटावर सायबर हल्लेखोरांनी हात मारला आहे. तसेच बँकेच्या शाखांशी संबंधित तपशील, ग्राहक कस्टमर नंबर्स, कर्ज आणि इतर संबंधित डेटा चोरीला गेला आहे.
ग्राहकांनी काय काळजी घेतली पाहिजे?
ग्राहकांनी अनोळखी क्रमांकावरुन आलेले मेसेज, संशयास्पद फोन कॉल आणि बनावट बैंकिंग वेबसाईट्सपासून सावध राहणे गरजेचे आहे. बँकेच्या नावाने संपर्क साधून गोपनीय माहिती मागितल्यास सत्यता तपासल्याशिवाय माहिती देऊ नये.
ग्राहकांच्या पैशांना धोका? एसबीआय काय म्हणाली?
या हल्ल्यानंतर ग्राहकांना सर्वाधिक सतावणारा प्रश्न म्हणजे त्यांच्या पैशांचं काय होणार? ग्राहकांच्या खात्यातील पैसे पूर्णपणे सुरक्षित असल्याचे बँकेने स्पष्ट केले आहे. याबद्दल बोलताना एसबीआयने, ग्राहकांच्या खात्यातील शिल्लक रक्कम पूर्णपणे सुरक्षित असल्याचं स्पष्ट केलं आहे. तसेच ग्राहकांच्या हिताचे रक्षण करण्यास आवश्यक ती सर्व पावले उचलण्यात येत असल्याचेही बँकेने स्पष्ट केलं आहे. बँकेतून पैसे काढण्यावर कोणतेही निर्बंध नसून ग्राहकांसाठीच्या सर्व सेवा सुरळीत सुरु असल्याने नेहमीसारखे पैसे काढता येत आहेत.
बँकेच्या शाखा किती? एकूण ठेवीचा आकडा काय?
एसबीआयची एकूण ग्राहकसंख्या 50 कोटींहून अधिक (सुमारे 52 ते 53 कोटी) इतकी आहे. बँकेच्या देशभरामध्ये 22500 पेक्षा जास्त शाखा आहेत. तर देशातील एसबीआयच्या एकूण एटीएमची संख्या 63580 इतकी आहे. 2026 मधील उपलब्ध अहवालानुसार या बँकेत ग्राहकांच्या एकूण सुमारे ₹60.1 लाख कोटींच्या ठेवी आहेत. एसबीआयच्या ठेवी भारतातील सर्व खाजगी बँकांच्या एकूण ठेवींपेक्षाही जास्त आहेत.
