बुलढाण्यातील सरपंचपुत्राचा दुर्दैवी मृत्यू, विहिरजवळ निसटलेला पाईप दुरुस्त करायला गेला अन्, धरणातच...
पाणीपुरवठा योजनेच्या विहिरजवळ निसटलेला पाईप जोडण्यासाठी धरणात उतरला. मसरूळच्या सरपंच पुत्राचा धरणात बुडून दुर्दैवी मृत्यू.
बुलढाणा तालुक्यातील मासरूळ येथे धरणाच्या पाण्यात बुडून 48 वर्षीय मधुकर महाले यांचा दुर्दैवी मृत्यू झाल्याची घटना घडली आहे. मधुकर महाले हे मासरूळच्या विद्यमान सरपंच शकुंतलाबाई महाले यांचे पुत्र होते.
गावाच्या पाणीपुरवठा योजनेच्या विहिरीजवळ पाईप जोडण्याचे काम आटोपून परतत असताना ते धरणाच्या पाण्यात बुडाले आणि त्यांचा मृत्यू झाला, अशी माहिती समोर येतेय. या घटनेमुळे मासरुळ गावावर शोककळा पसरली आहे. मासरुळ येथील पाणीपुरवठा योजनेची विहीर पद्मावती धरणात असल्याने पाण्यात बुडालेली आहे. मात्र मोटारपंपचा पाईप निघाल्याने सरपंच पुत्र आणि इतर दोन सहकारी हे पाण्यातून विहिरीपर्यंत गेले.
काम पूर्ण करुन परत येताना पाण्यातून पोहत असताना मधुकर महाले यांचा पोहताना दम तुटला आणि मधुकर पाण्यात बुडाले. सोबतच्या दोन लोकांनी पाण्यातून बाहेर येण्यात यश मिळवले. मात्र मधुकर महाले यांना वाचवता आले नाही. घटनेची माहिती मिळताच आपत्ती व्यवस्थापन पथकाने घटनास्थळी धाव घेतली. आपत्ती व्यवस्थापनाने शोध मोहीम राबवून त्यांचा मृतदेह बाहेर काढला. मधुकर महाले यांच्या निधनाने महाले कुटुंबावर दुःखाचा डोंगर कोसळला असून मासरूळसह संपूर्ण पंचक्रोशीत शोककळा पसरली आहे.
बुलढाण्यात अवैध गर्भलिंग निदानाचा पर्दाफाश
बुलढाणा जिल्ह्यात अवैध गर्भलिंग निदानाचा गंभीर प्रकार उघडकीस आला असून, आरोग्य विभागाने मोठी कारवाई केली आहे.अमडापूर–लवाळा मार्गावरील एका शेतातील पत्र्याच्या गोठ्यात पोर्टेबल सोनोग्राफी मशीनच्या माध्यमातून बेकायदेशीर गर्भलिंग तपासणी सुरू असल्याचा पर्दाफाश झाला आहे
अकोला, वाशिम आणि बुलढाणा जिल्ह्यांच्या पीसीपीएनडीटी विभागाने संयुक्तपणे रचलेल्या सापळ्यात एका बोगस डॉक्टरसह तिघांना रंगेहात ताब्यात घेतलं आहे. विशेष म्हणजे, तब्बल आठ तास संशयित डॉक्टरचा माग काढल्यानंतर डिकॉय केसच्या माध्यमातून ही कारवाई करण्यात आली. घटनास्थळावरून पोर्टेबल सोनोग्राफी मशीन आणि तपासणीसाठी वापरण्यात येणारं साहित्य जप्त करण्यात आलं आहे.