रविवार ठरला घातवार! बीड आणि अमरावतीत झालेल्या भीषण अपघातात 8 जणांचा मृत्यू

आजचा रविवारचा दिवस हा घातवाराचा दिवस ठरला आहे. महाराष्ट्रात विविध ठिकाणी झालेल्या अपघातात 8 जणांचा मृत्यू झाला आहे. बीड येथे झालेल्या अपघातात 5 जणांचा मृत्यू झाला तर अमरावतीतील अपघातात तीन जणांनी जीव गमावला आहे.

बीड येथे स्विफ्ट कार आणि एसटीचा भीषण अपघात झाला. हा अपघात इतका भीषण होता की अपघातात कारमधील पाच जणांचा मृत्यू झाला आहे. माजलगाव तेलगाव रस्त्यावरील शिंदेवाडी फाट्यावरील ही घटना आहे.

मिळालेल्या माहितीनुसार, कार चालकाचे नियंत्रण सुटल्याने कार थेट एसटीला जाऊन धडकली. कारची धडक इतकी भीषण होती की. अपघातातील कारचा अक्षरशः चेंदामेंदा झाला. तर, एसटीतील सर्व प्रवासी मात्र सुखरूप आहेत. प्राथमिक माहितीनुसार, कारमधील भाविक तुळजापूरला दर्शनासाठी जात होते. तेव्हाच कारचा अपघात झाला. मृतांमध्ये एका लहान मुलाचा समावेश असल्याचंही समोर येतेय. तसंच, अपघातानंतर काही काळ वाहतूक सेवा विस्कळीत झाली होती.

अमरावतीत अपघात

अमरावती जिल्ह्यातील यावली शहीद-अडगाव मार्गावर क्रेनने पायी चालणाऱ्या पाच मजूरांना धडक दिली. भीषण अपघातात तिघांचा जागीच मृत्यू, दोघे जखमी झाले आहेत. अडगावकडून यावली शहीदकडे पायी जात असताना हा अपघात घडला.

प्राथमिक माहितीनुसार, मागून आलेल्या हायड्रा क्रेनने पाच जणांना उडवले. मृतांमध्ये राजेश बायस्कर, दिनेश आणि मदारी यांचा समावेश आहे. जखमी पिंटू चव्हाण आणि राजू पानसे यांना जिल्हा सामान्य रुग्णालयात दाखल केले. सर्व मृत आणि जखमी मध्यप्रदेशातील बक्की चिखली येथील रहिवासी असून माहुली जहागीर पोलीस ठाण्याच्या हद्दीतील घटना आहे.

नांदुरीत भरधाव कारची पोलिसांसह भाविकांना धडक

नवरात्रोत्सवासाठी सप्तशृंगी गडावर जाणाऱ्या भाविकांच्या सुरक्षिततेसाठी तैनात असलेल्या पोलिसांसह भाविकांनाच भरधाव कारने धडक दिल्याची धक्कादायक घटना समोर आली आहे.

नाशिक जिल्ह्यातील नांदुरी येथे मध्यरात्री दोन वाजेच्या सुमारास वणीच्या दिशेने येणाऱ्या सियाज कारने अभोणा वळण रस्त्यावर बंदोबस्तासाठी तैनात असलेल्या पोलिसांसह दर्शनासाठी आलेल्या भाविकांना जोरदार धडक दिली. या अपघातात तीन पोलीस अधिकारी-कर्मचारी आणि सात भाविक जखमी झाल्याची प्राथमिक माहिती आहे.

दरम्यान, धडक दिल्यानंतर कारचालक घटनास्थळावरून फरार झाल्याचे सांगण्यात येत आहे. विशेष म्हणजे, या कारने यापूर्वीही इतर वाहनांना धडक दिल्याची माहिती समोर येत आहे