'... मग ते ₹500 कोटी गेले कुठे? हा प्रश्न शाह, फडणवीस, शिंदे यांना...', जरांगेंच्या आरोपावरुन राऊतांचे प्रश्न; 'एका दगडात तीन...'
मनोज जरांगे पाटलांनी पत्रकार परिषदेमध्ये ऐकवलेल्या ऑडिओ क्लिपमध्ये कथितरित्या भाजपाच्या नेत्यांनी अंतर्गत चर्चेदरम्यान जरांगेंना 500 कोटी रुपये देण्यात आल्याबद्दल भाष्य केल्याचा दावा केला. यावरुन राजकारण तापलेलं असतानाच त्यात आता ठाकरेंच्या शिवसेनेनं उडी घेतली आहे.
मराठा आंदोलक मनोज जरांगे पाटील यांनी गुरुवारी प्रसारमाध्यमांसमोर ऑडिओ बॉम्ब फोडला. जरांगेंनी सादर केलेल्या या ऑडिओमध्ये 500 कोटी रुपये उपमुख्यमंत्री एकनाथ शिंदेंचे खासदारपुत्र श्रीकांत शिंदेंच्या माध्यमातून भाजपाने आपल्याला दिलेले अशी चर्चा भारतीय जनता पार्टीच्या गोटात सुरु असल्याचा दावा जरांगेंनी केला. यावरुन आता शिंदेंची शिवसेना आणि भाजपामध्ये आरोप प्रत्यारोपाच्या फैरी सुरु असतानाच खासदार संजय राऊत यांनी सदर प्रकरणात एका दगडात तीन पक्षी मारले जात आहेत असं सूचक विधान केलं आहे.
जरांगे खोटं बोलत आहेत का हे भाजपने सांगायला पाहिजे
"त्यांच्यावर झालेले सगळे खोटे आणि आमच्यावर केलेले आरोप खरे. भाजपवर केलेले आरोप खोटे, फॅब्रिकेटेड आणि आमच्यावर खरा आरोप केला होता. महाविकास आघाडीवर, नेत्यांवर जे आरोप झाले ते खरे हा कोणता न्याय?" असा सवाल संजय राऊत यांनी उपस्थित केला. तसेच, "जरांगे खोटं बोलत आहेत का हे भाजपने सांगायला पाहिजे," अशी मागणीही राऊत यांनी केली.
ते 500 कोटी रुपये गेले कुठे?
"पात्र परिचय हा काल झालेला आहे. 500 कोटी कोणाला दिले तर श्रीकांत शिंदेना दिले. हे कोण बोले? भाजपचे लोक. भाजप फोन टॅप करते. सगळे भाजप करते त्यांच्याकडे यंत्र आहेत. असं असताना एआय जनरेटेड आहेत असं सांगितलं जातं. श्रीकांत शिंदेंना 500 कोटी दिले हे भाजपकडून सांगितले गेले. मनोज जरांगे म्हणतात आमच्याकडे आले नाही मग गेले कुठे? हा प्रश्न शाह, फडणवीस, शिंदे यांना पडला पाहिजे. हा प्रश्न ईडी आणि सीबीआयला पडला पाहिजे. काल मुंबई महाराष्ट्रात स्त्रीबीज प्रकरणात धाडी झाल्या आणि 29 लाख जप्त केले. आहो पण इथे 500 कोटींचा विषय आहे," असंही राऊत म्हणाले.
रोज 5-6 एसआयटी स्थापन करतात
"निवडणूक आयोग गुलाम आहे तसेच या संस्था सुद्धा झाल्या आहेत. आम्हाला यांच्या विरोधात आंदोलन घ्यावे लागेल. आता त्या 500 कोटींची तपासणी कोण करणार? तर एसआयटी स्थापन करणार. आतापर्यंत शेकडो एसआयटी स्थापन केल्या आहेत. ते रोज 5 ते 6 एसआयटी स्थापन करतात. खेळ सुरू आहे सगळा," असा टोला राऊतांनी लगावला. "शिंदे, अजित पवार गटाकडून सुरू असलेल्या गोष्टींचा स्फोट जरांगे यांनी केला हे अतिशय महत्वाचे काम केले आहे," असंही राऊत म्हणाले. "आम्ही जर याविरोधात आंदोलन केले तर आम्हाला देशद्रोही ठरवले जाईल. जेलात टाकले जाईल. आम्हाला चिरडले जाईल," असं राऊत यांनी पत्रकारांशी संवाद साधताना म्हटलं.
कोण कोणाचा गेम करतंय?
कोण कोणाचा गेम करतंय असं विचारलं असता राऊत यांनी, "शिंदे आणि फडणवीस हे एकमेकांवर तलवार चालवत आहेत. इथे एका दगडात तीन पक्षी मारायचे असे सुरू आहे. जरंगेना बदनाम करायचे आणि शिंदे फडणवीस यांच्यात वाद आहे," असा दावा केला.
