आणखी एक चक्रीवादळ धडकणार, महाराष्ट्रात हवामान फिरणार; आज 'या' जिल्ह्यांना वादळी पावसाचा इशारा
बंगालच्या उपसागरात कमी दाबाचे क्षेत्र निर्माण झाले आहे. त्यामुळं आणखी एक चक्रीवादळ धडकण्याची शक्यता निर्माण झाली आहे.
बंगालच्या उपसागरात तयार झालेल्या अर्णब चक्रीवादळाचा परिणाम महाराष्ट्रावरही दिसून येतोय. बंगालच्या उपसागराच्या आग्नेय भागात आणि लगतच्या अंदमान समुद्रात कमी दाबाचे क्षेत्र निर्माण झाले आहे. त्याचाच परिणाम मध्य महाराष्ट्र आणि मराठवाड्याच्या काही भागात होणार असून विजांसह पावसाची शक्यता आहे.
काही दिवसांपूर्वी ओडिशा येथे अर्णब चक्रीवादळ धडकले होते. त्यानंतर आता पुन्हा एकदा बंगालच्या उपसागरात 'मुरासू' चक्रीवादळ तयार होण्याचा अंदाज भारतीय हवामानशास्त्र विभागाने वर्तविला आहे. हे चक्रीवादळ 2 नोव्हेंबरला आंध्र प्रदेशच्या किनारपट्टीजवळ पोहचण्याची शक्यता आहे. 'मुरासू'चा अर्थ नगारा असा आहे. 1 नोव्हेंबरला त्याची तीव्रता आणखी वाढून चक्रीवादळाची निर्मिती होऊ शकते, असे हवामान विभागाचे म्हणणे आहे.
पूर्व विदर्भात विजांसह पावसाची शक्यता असल्याने सतर्कतेचा इशारा देण्यात आला आहे. तर उर्वरित राज्यात ढगाळ वातावरण राहणार असल्याचा इशारा देण्यात आला आहे. तर काही ठिकाणी विजांसह पावसाची शक्यता हवामान विभागाने वर्तवली आहे. कोकण, मध्य महाराष्ट्र आणि विदर्भात तुरळक ठिकाणी पावसाच्या सरी कोसळल्या आहेत. आज पूर्व विदर्भातील यवतमाळ, नागपूर, भंडारा, गोंदिया, गडचिरोली आणि चंद्रपूर जिल्ह्यांत विजांसह वादळी पावसाची शक्यता वर्तवण्यात आली आहे.
कोकणातील सिंधुदुर्ग, मध्य महाराष्ट्रातील नाशिक, अहिल्यानगर, पुणे, सातारा, सांगली, कोल्हापूर आणि मराठवाड्यातील धाराशिव, नांदेड या जिल्ह्यांत विजांसह पावसाची शक्यता आहे. उर्वरित राज्यात अंशतः ढगाळ हवामानासह तापमानात चढ-उतार होण्याा अंदाज आहे.
बंगालच्या उपसागराच्या आग्नेय भागात आणि लगतच्या अंदमान समुद्रात कमी दाबाचे क्षेत्र निर्माण झाले आहे. गेल्या सहा तासांत ही प्रणाली ताशी 30 किलोमीटर वेगाने पुढे सरकत आहे. सध्या हे क्षेत्र चेन्नईपासून सुमारे 960 किलोमीटर, विशाखापट्टणमपासून 980 किलोमीटर, मच्छलीपट्टणमपासून 1 हजार 30 किलोमीटर आणि ओंगोलपासून 1 हजार 80 किलोमीटर अंतरावर आहे. मंगळवारी पहाटे हे चक्रीवादळ दक्षिण आंध्र प्रदेशच्या किनारपट्टीजवळ पश्चिम-मध्य बंगालच्या उपसागरात पोहोचण्याची शक्यता आहे. मंगळवारी सकाळी नेल्लोर ते नरसापूरमदरम्यान दक्षिण आंध्र प्रदेशच्या किनारपट्टीवर हे तीव्र चक्रीवादळ धडकण्याचा अंदाज आहे. यावेळी वाऱ्यांचा वेग ताशी 100 ते 110 किलोमीटरपर्यंत पोहोचण्याची शक्यता आहे.
चक्रीवादळाच्या प्रभावामुळे पुढील तीन दिवस दक्षिण किनारपट्टी आंध्र प्रदेश आणि रायलसीमा भागात मुसळधार ते अतिवृष्टी होण्याचा इशारा देण्यात आला आहे. नागरिकांनी सतर्क राहावे, असे आवाहन आंध्र प्रदेश राज्य आपत्ती व्यवस्थापन प्राधिकरणाचे (APSDMA) व्यवस्थापकीय संचालक प्रखर जैन यांनी केले आहे.
