'महाराष्ट्रात पाण्याचा आणि BJP मध्ये समजूतदारपणाचा भीषण दुष्काळ', राज ठाकरे संतापले! '...तर भाजपाने पण सहन करायला शिकले पाहिजे'
भारतीय जनता पार्टीने सुरु केलेल्या आंदोलनावर बोलताना राज यांनी, "हे जगातील एकमेव उदाहरण असेल जिथे सत्ताधारी पक्ष विरोधी पक्षाच्या विरोधात मोर्चा काढतो," असा खोचक टोला लगावला आहे.
"भारतीय जनता पक्ष हा एक अजब पक्ष आहे. जो खालपासून वरपर्यंत सत्तेत आहे तरीही लोकशाही वाचवा म्हणून मोर्चे काढत आहे. हे जगातील एकमेव उदाहरण असेल जिथे सत्ताधारी पक्ष विरोधी पक्षाच्या विरोधात मोर्चा काढतो," असा टोला महाराष्ट्र नवनिर्माण सेनेचे अध्यक्ष राज ठाकरेंनी लगावला आहे. विशेष म्हणजे राज यांनी भाजपाच्या मोर्चांवरुन निशाणा साधताना 'गोकुळ' प्रकरणावरही भाष्य केलं आहे.
,,,तर हा असला प्रकार तुम्ही केला नसता
भाजपाला लक्ष्य करताना राज यांनी, "बरं लोकशाहीची बूज राखायची खरोखर इतकी इच्छा असेल तर गोकुळ प्रकरणात तुमच्या भाजप पॅनलचे 12 विरोधात सतेज पाटील पॅनलचे 13 जण निवडून आल्यावर लगेच तुम्ही सरकारचे (म्हणजे तुमचेच) 5 संचालक का नेमले? आणि त्यांना मतदानाचा अधिकार देऊन काय सिद्ध करताय तुम्ही? बरं ते बॅलेट मतदान पद्धतीने आणि लोकशाही मार्गाने निवडणूक लढवून निवडून आले. तुम्हाला खरंच लोकशाहीची पर्वा किंवा काळजी वाटत असती तर हा असला प्रकार तुम्ही केला नसता," अशा शब्दांमध्ये सुनावलं आहे.
भाजपामध्ये समजूतदारपणाचा भीषण दुष्काळ
"गोकुळवर तुम्हाला सत्ता मिळवता नाही आली म्हणून तुम्ही लगेच तुमची सगळी तत्त्वं बाजूला ठेवणार आणि म्हणे लोकशाही वाचवा म्हणून मोर्चे काढणार. सध्या महाराष्ट्रात पाण्याचा भीषण दुष्काळ आणि भारतीय जनता पक्षात समजूतदारपणाचा भीषण दुष्काळ एकाच वेळी कसा यावा, याचंच आश्चर्य वाटतं," असा टोला राज यांनी आपल्या एक्स पोस्टमधून लगावला आहे.
अर्थव्यवस्था वाचवासाठी पण मोर्चे काढतील
"सत्तेत असताना ते लोकशाही वाचवा म्हणून मोर्चे काढतील आणि स्वतःच लोकशाहीचा गळा आवळतील. यांच्या काळात अतिरेकी हल्ले झाले, कायदा सुव्यवस्था बिघडली म्हणून दहशतवादापासून देश वाचवा यासाठी मोर्चे काढतील. देशाची अर्थव्यवस्था गाळात गेली आहे म्हणून आता अर्थव्यवस्था वाचवासाठी पण मोर्चे काढतील," असा टोमणा मनसे प्रमुखांनी पोस्टमधून मारलाय.
यापुढे भाजपाने पण...
"भारतीय जनता पक्षाने रडीचा डाव खेळणं बंद करावं. कुठल्या का मार्गाने तुम्ही जे बहुमत मिळवलं ते सर्व विरोधी पक्षांनी 12 वर्षे सहन केलं मग आता विरोधी पक्षांकडे या देशातील जनता झुकायला लागली आहे तर त्यापुढे भाजपाने पण सहन करायला शिकले पाहिजे," अशी अपेक्षा पोस्टच्या शेवटी राज ठाकरेंनी व्यक्त केली आहे.
