लॉरेन्स बिश्नोईला अमित शाह देतात संरक्षण, टायगरवरील हल्ल्यानंतर राऊतांचा खळबळजनक आरोप; 'साबरमतीतून त्याला...'
अभिनेता टायगर श्रॉफवर गोळीबार झाल्यानंतर या हल्ल्याची जबाबदारी बिन्नोई टोळीनं घेतली असून यासंदर्भात बोलताना संजय राऊत यांनी थेट केंद्रीय आणि राज्यातील गृहमंत्र्यांचा उल्लेख करत काय म्हटलं आहे जाणून घ्या सविस्तरपणे...
अभिनेता टायगर श्रॉफवरील हल्ल्यानंतर बिश्नोई टोळी पुन्हा चर्चेत आलेली असतानाच आता बिश्नोई टोळीचा प्रमुख लॉरेन्स बिश्नोईचा उल्लेख करत राज्यसभेचे खासदार तसेच उद्धव ठाकरेंच्या शिवसेनेचे प्रवक्ते संजय राऊत यांनी थेट केंद्रीय गृहमंत्री अमित शाहांवर निशाणा साधला आहे. "शाहांसारखा माफिया गृहमंत्री अतिरेकी पोसतो व राज्य करतो," अशी घणाघाती टीकाराऊत यांनी अभिनेता टायगर श्रॉफवर रविवारी रात्री झालेल्या गोळीबाराच्या घटनेसंदर्भात बोलताना केली आहे. तसेच पत्रकांशी संवाद साधत पुढे बोलताना त्यांनी राज्याचे मुख्यमंत्री तथा गृहमंत्री देवेंद्र फडणवीस यांना एक सल्ला दिला आहे. "फडणवीस सभ्य असतील तर त्यांनी यांच्या बाजूने बोलू नये," असंही राऊत यांनी म्हटलं आहे.
यावर फडणवीस बोलणार का?
लॉरेन्स बिश्नोईची टोळीने टायगर श्रॉफवरील हल्ल्याची जबाबदारी घेतल्याच्या संदर्भातून प्रसार माध्यम प्रतिनिधींनी राऊत यांना प्रश्न केला असता त्यांनी, "अनेक राज्यांत ही टोळी सक्रिय. साबरमतीतून त्याला बाहेर काढत नाहीत अमित शाह. संरक्षण देतात अमित शाह त्याला," अशी टीका केली. "त्यांना (बिश्नोई टोळीला) अमित शाह संरक्षण देत आहेत. त्यावर देवेंद्र फडणवीस बोलणार आहेत का?" असा सवाल राऊत यांनी केला आहे.
लाज वाटली पाहिजे गृहमंत्र्यांना
एवढ्यावरच न थांबता राऊत यांनी सूचक विधान करत, "इथं ही वेगळे बिश्नोई पाळलेत. पुर्णेकर हत्येनंतर फडणवीसांनी वेळ लावला. दुसरं प्रकरण असतं तर अटका झाल्या असत्या," असंही म्हटलं आहे. तसेच बिश्नोई तुरुंगातून व्हिडीओ करतो यावर बोलताना, "लाज वाटली पाहिजे गृहमंत्र्यांना," असं राऊत म्हणाले. "मुंबईत बिल्डरराज कसा सुरु आहे यावर मी पत्र लिहिलंय. बिल्डर लॉबी कशी काम सुरु आहे ते मी सांगितलं आहे," असा उल्लेख राऊत यांनी केलाय.
जंगल रेझिम संपवणार
"मुंबईसह महाराष्ट्रामध्ये जंगलराज निर्माण झाला आहे," अशी टीकाही राऊत यांनी राज्यातील कायदा आणि सुव्यवस्थेसंदर्भात बोलताना केली. महायुतीच्या सरकारच्या कारभारावर निशाणा साधताना, "गँगवॉर, धमक्या, खंडणी हा 90 चा काळ पुन्हा एकदा फडणवीस-शिंदे-पवार यांच्या काळात पाहायला मिळतोय," असं राऊत यांनी म्हटलं आहे. "ही जंगल रेझिम (राजवट) उलथवणार," असा विश्वासही राऊत यांनी व्यक्त केला.
लॉरेन्स बिश्नोई आता आहे कुठे?
गँगस्टर लॉरेन्स बिश्नोई हा ऑगस्ट 2023 पासून गुजरातमधील अहमदाबाद येथील साबरमती मध्यवर्ती तुरुंगात आहे. पूर्वी त्याला दिल्लीच्या तिहार तुरुंगात ठेवण्यात आले होते. मात्र 2023 मध्ये ड्रग्ज तस्करीच्या एका प्रकरणाच्या चौकशीसाठी गुजरातच्या दहशतवाद विरोधी पथकाने त्याचा ताबा घेतला आणि त्यानंतर त्याची रवानगी साबरमती तुरुंगात करण्यात आली. सुरक्षेच्या कारणास्तव त्याला इतर कोणत्याही राज्यात नेण्यास किंवा न्यायालयात प्रत्यक्ष हजर करण्यास मनाई करण्यात आली आहे.
