नजर जाईल तिथपर्यंत गुलालाने रंगलेल्या कार्यकर्त्यांची गर्दी अन्... क्षणाचाही विलंब न करता सतेज पाटलांनी पूर्ण केली कार्यकर्त्यांची 'ती' इच्छा; Video तुफान Viral
दोन्ही बाजूने प्रतिष्ठेची करण्यात आलेली ही निवडणूक अगदी शेवटच्या क्षणापर्यंत गाजली. अखेर या निवडणुकीमध्ये सतेज पाटीलच किंगमेकर ठरले असून त्यांनी महायुतीला मोठा धक्का देत एकट्याच्या जीवावर विजयश्री खेचून आणल्यानंतर जंगी सेलिब्रेशन केलं
कोल्हापूर जिल्ह्यातील राजकारणाला कलाटणी देणारा निकाल सोमवारी गोकुळ दूध संघात पाहायला मिळाला. एकीकडे तीन कॅबिनेट मंत्री, दोन खासदार, जिल्ह्यातील दहा आमदार अशी तगडी फळी असताना समविचारी पॅनल प्रमुख काँग्रेस आमदार सतेज पाटील यांनी एकाकी झुंज देत गोकुळची सत्ता काबीज केली आहे. त्यामुळे निवडणूक निकाल जाहीर होताच समविचारी आघाडीच्या कार्यकर्त्यांसोबत आमदार सतेज पाटील यांनी आनंदोत्सव साजरा केला. या विजयोत्सवासाठी सतेज पाटलांच्या घराबाहेर हजारो समर्थकांची गर्दी पाहायला मिळाली. अंगावर गुलाल, जोरजोरात वाजणारं म्युझिक अन् त्यावर थिरकणारे कार्यकर्ते असं चित्र बराच वेळ सतेज पाटलांच्या घराबाहेर पाहायला मिळालं. स्वत: सतेज पाटीलही या सेलिब्रेशनमध्ये सहभागी झाले. विशेष म्हणजे या सेलिब्रेशनदरम्यान त्यांनी कार्यकर्त्यांची एक इच्छाही पूर्ण केली. त्यांचा हा व्हिडीओ सध्या तुफान व्हायरल होतोय.
कार्यकर्त्यांची इच्छा केली पूर्ण
घराबाहेर झालेल्या सेलिब्रेशनदरम्यान समविचारी पॅनलच्या कार्यकर्त्यांनी सतेज पाटील यांना शड्डू ठोकण्याचे आवाहन केले. सतेज पाटील यांनी देखील क्षणाचाही विलंब न लावता लगेच शड्डू ठोकला. सध्या त्यांचा हाच व्हिडिओ कोल्हापूर जिल्ह्यात जोरदार व्हायरल झाला आहे. एकीकडे महायुतीच्या नेत्याची भक्कम फळी आणि दुसरीकडे सतेज पाटील यांची एकाकी झुंज हा कोल्हापूर जिल्ह्याच्या राजकारणात चर्चेचा विषय ठरलेला असतानाच आता हा सतेज पाटलांचा शड्डू ठोकतानाचा व्हिडीओ अनेकांच्या स्टेटसवर दिसत आहे.
सतेज पाटलांना घवघवीत यश
कोल्हापूर जिल्हा दूध उत्पादक संघ अर्थात गोकुळच्या निडणुकीमध्ये सतेज पाटील यांच्या नेतृत्वाखालील समविचारी आघाडीने 25 पैकी 13 जागा मिळावीत बहुमत मिळविले आहे. गोकुळची मतमोजणी ही दुपारी चार वाजताच संपली होती, मात्र त्यानंतर महायुतीच्या शौमिका महाडिक यांनी फेरमतदान घेण्याची मागणी केली. पण त्यानंतर झालेल्या मतमोजणीत देखील महाडिक यांना पराभवाला समोर जावे लागले. त्यानंतर महायुतीचे उमेदवार युवराज पाटील आणि विश्वास पाटील आबाजी यांनी फेर मतमोजणीची मागणी केली, पण निवडणूक निर्णय अधिकारी मोसमी चौगुले यांनी सबळ कारण न देता फेर मतमोजणी मागितल्याने दिलेला अर्ज नामंजूर केला, त्यामुळे गोकुळमध्ये समविचारी आघाडीला 13 आणि महायुतीला पॅनलला 12 जागा मिळाल्या.
35 वर्षांपासून सत्तेत असलेल्यांना केलं पराभूत
दोन्ही बाजूने प्रतिष्ठेचा विषय करण्यात आलेल्या या निवडणुकीत मंत्री हसन मुश्रीफांचे पुत्र नावेद मुश्रीफांचा पराभव झालाय. शौमिका महाडिक यांनीही पराभवाला सामोरं जावं लागलं. गोकुळमध्ये तब्बल 35 वर्षे सत्ता गाजविणाऱ्या विश्वास पाटील आणि अरुण कुमार डोंगळे यांचा देखील पराभव झाला. गोकुळचे राजकारण मुंबईतून करण्याचा प्रयत्न झाला त्यामुळे कोल्हापूरच्या स्वाभिमानी जनतेने मत पेटीतून दाखवून दिले असे समविचारी आघाडीचे नेते सतेज पाटील यांनी म्हटले आहे.
