गोकुळ दूध संघाच्या अध्यक्षनिवडीच्या काही तासाआधी मोठा ट्विस्ट, 350 कर्मचाऱ्यांना कारणे दाखवा नोटीस
गोकुळ दूध संघाचा अध्यक्ष कोण होणार, याकडे साऱ्यांचं लक्ष लागलं असताना 350 कर्मचाऱ्यांना कारणे दाखवा नोटीस देण्यात आली आहे.
कोल्हापूर जिल्हा सहकारी दूध उत्पादक संघ म्हणजे गोकुळच्या निवडणुकीचा निकाल लागल्यानंतर मोठा निर्णय घेण्यात आला आहे. दुसरीकडे अध्यक्ष निवडीवरून राजकीय रणकंदन सुरू असताना गोकुळच्या कर्मचाऱ्यांना मोठा धक्का बसला आहे. गोकुळने 350 कर्मचाऱ्यांनी कारणे दाखवा नोटीस दिली आहे.
नोटीस देण्यामागील नेमकं कारण काय?
गोकुळकडून सांगण्यात आलं की, विनापरवाना गैरहजर राहिलेल्या 350 कर्मचाऱ्यांना ही कारणेदाखवा नोटीस देण्यात आली आहे. या कर्मचाऱ्यांनी निवडणूक प्रचारात सहभागी राहण्यासाठी विनापरवाना गैरहजर राहिले होते. 1 ते 19 ऑक्टोबरदरम्यान हे कर्मचारी कामावर आले नव्हते. रजा न घेता 350 कर्मचारी प्रचाराला गेले होते.
350 कर्मचाऱ्यांमध्ये डेअरी आणि पशुखाद्य विभागातील आहेत. गोकुळने सांगितलं की, हे कर्मचारी न सांगता सुट्टीवर गेल्यामुळे कामाचा प्रश्न निर्माण झाला होता. त्यावेळी ऐनवेळी रोजंदारी कर्मचाऱ्यांकडून काम करुन घेण्याची वेळ आली. त्यासोबत एकाच वेळी 350 कर्मचारी प्रचाराला न सांगता न सु्ट्टी घेता गेल्यामुळे इतर कर्मचाऱ्यांवर कामाचा ताण अचानक वाढला. त्यामुळे या 350 कर्मचाऱ्यांना प्रशासनाने नोटीसमधून सुट्टीबद्दल खुलासा करण्याचे सांगितलं आहे.
गोकुळ दूध संघाच्या अध्यक्षची आज निवड नाहीच
दुसरीकडे गोकुळच्या अध्यक्षपदाचा पेच पाहिला मिळतोय. गोकुळच्या अध्यक्ष निवडी साठी महायुतीचे संचालक गैरहजर राहिल्यामुळे आज (29 ऑक्टोबर) कोरम अभावी सभा तहकूब झाली. त्यामुळे गोकुळच्या दूध संघाच्या अध्यक्षांची निवडणूक झाली नाही. समविचारी पॅनेलचे प्रमुख सतेज पाटील दुपारी 4 वाजता पत्रकार बैठक घेणार आहे. राजर्षी शाहू शेतकरी समविचारी आघाडीकडून अध्यक्षपदासाठी निवडणुकीपूर्वीच गोकुळचे संचालक शशिकांत पाटील चुयेकर यांच्या नावाची घोषणा झाली होती. त्यानुसार अध्यक्ष निवडीसाठी बैठकीचे आयोजन करण्यात आले होते. मात्र, गोकुळ अध्यक्ष पदाची सभा तहकूब केल्यानंतर, उपस्थित 13 संचालकांनी त्यांचे बहुमत असल्याने चेअरमन निवडीची कार्यवाही सुरू करणेबाबत विनंती केली तसे लेखी निवेदन दिले. त्यांचे निवेदन कारणासह निवडणूक निर्णय अधिकाऱ्यांनी अमान्य केले. दरम्यान जर सलग तीन बैठकांमध्ये जर संचालक अनुपस्थित राहिले. अशास्थिती त्यांचे संचालक पद रद्द होतं. त्यामुळे आता अध्यक्षनिवडणुकीबद्दल पुढील दोन बैठकीत काय होणार याकडे सर्वांच लक्ष लागलंय.
