महालक्ष्मीचं दर्शन घेऊन परत येताना कार अपघातात मित्राचा मृत्यू, तर मैत्रिणीचं वसतीगृहात धक्कादायक पाऊल
महालक्ष्मीचं दर्शन घेऊन परताना कराडजवळ पुणे-बेंगळुरू महामार्गावरील अपघातात दोन दिवसांपूर्वी चार तरूणांचा मृत्यू झाला. यात पूजा मानेचा खास मित्राचा मृत्यू झाल्यामुळे तिने वसतीगृहात धक्कादायक पाऊल उचललं आहे.
साताऱ्यातून एक धक्कादायक घटना समोर आली आहे. पूजा माने या तरुणीने साताऱ्यातील यशोदा टेक्निकल कॅम्पसच्या वसतिगृहात आत्महत्या केली आहे. पूजा ही खटाव तालुक्यातील मानेवाडी रहिवासी होती. तिने हे धक्कादायक पाऊल उचलण्यामागेही कारण अतिशय भयानक आहे. दोन दिवसांपूर्वी कोल्हापूरच्या महालक्ष्मी देवीचं दर्शन घेऊन परताना अपघात झाला. या अपघातात तिचा खास मित्राचा मृत्यू झाला. या घटनेचा पूजाला जोरदार मानसिक धक्का बसला होता. या धक्क्यामुळे पूजाने वसतीगृहात आपलं जीवन संपवलं. या घटनेमुळे पूजाच्या गावात आणि साताऱ्यातील तिच्या यशोदा टेक्निकल कॅम्पसमध्ये हळहळ व्यक्त करण्यात येत आहे.
नेमकं काय घडलं?
पोलिसांनी दिलेल्या माहितीनुसार दसऱ्यानिमित्त सात - आठ तरूण - तरूणी कोल्हापूरच्या महालक्ष्मी देवीच्या दर्शनाला गेले होते. त्यानंतर परतच्या प्रवासात ट्रक आणि स्कॉर्पिओ कारचा भीषण अपघात झाला. या अपघातात साताऱ्या खटाव तालुक्यातील कातरखटाव गावातील चार तरुणांचा जागीच मृत्यू झाला. या भीषण अपघातात स्कॉर्पिओची अवस्था अतिशय भयानक होती. काही दिवसापूर्वीच वाहतुकीस खुल्या झालेल्या कराड शहराजवळ उभारलेल्या नवा सहापदरी उड्डाणपूलावर हा अपघात झाला होता.
मृत तरुणांचं नाव तेजस देशमुख (वय 25 वर्षे), सागर निंबाळकर (वय 23 वर्षे), सुयश चिंचकर (वय 20 वर्षे) आणि रोहित धोत्रे (वय 21 वर्षे) असं होतं. तर ऋतुराज दुबळे (वय 21 वर्षे), शंतनू शिंगाडे (वय 20 वर्षे) आणि अमन तांबोळी (वय 23 वर्षे) हे गंभीर जखमी झाले होते. या अपघाताच्या वेळी तेजस देशमुख हा स्कॉर्पिओ गाडी चालवत होता, अशी माहिती पोलिसांनी दिली आहे. हा अपघात रविवारी रात्री 11 वाजताच्या सुमारास झाला होता.
मुंबईत आयसीटीच्या विद्यार्थ्याची आत्महत्या
दरम्यान माटुंगा येथील आयसीटीमध्ये इंजिनिअरिंगच्या द्वितीय वर्षात शिकणाऱ्या सिद्धेश पाटील या विद्यार्थ्याने 21 ऑक्टोबरला आत्महत्या केली. रात्री साडेदहाच्या सुमारास हॉस्टेलमध्ये गळफास घेऊन त्याने टोकाचे पाऊल उचलले. सिद्धेश मूळचा नाशिकचा होता आणि मागील काही दिवसांपासून नैराश्यावरील उपचार सुरू होते, अशी प्राथमिक माहिती समोर आली आहे. आत्महत्येचे विचार येत असल्याचा मेसेज सिद्धेशने डॉक्टरांना केला होता. डॉक्टरांनी तातडीने कुटुंबीयांना कळवलं होतं. कुटुंबीयांनी हॉस्टेलमधील मित्रांना संपर्क साधला. मात्र, मदत पोहोचण्यापूर्वीच सिद्धेशने हे पाऊल उचलले.
