पुणेकरांना सावध करणारी बातमी, एनआयव्हीच्या शास्त्रज्ञांनी दिला इशारा, वाचा सविस्तर

पुणेकरांना सावध करणारी एक बातमी समोर येत आहे. पाऊस तर परतला पण त्यानंतर आजारांत वाढ होत असल्याचे समोर आले आहे. त्यातच पुण्यात झिका व्हायरसचा प्रदुर्भाव वाढण्याची शक्यता निर्माण झाली आहे.

पुणे शहरात झिका विषाणूचा प्रादुर्भाव वाढण्याची शक्यता निर्माण झाली आहे. एनआयव्हीच्या शास्त्रज्ञांनी 2024 मध्ये महापालिका हद्दीतील 16 ठिकाणी डासांचे सर्वेक्षण केले. 128 डासांच्या समूहांची तपासणी केली असता 34 समूहांमध्ये म्हणजेच 26.5 टक्के नमुन्यांमध्ये झिका विषाणूचे आरएनए आढळले. प्लॅस्टिक ड्रम, टाक्या, टायर यांसारख्या ठिकाणी डासांची पैदास आढळली.

पुण्यात 2024 मध्ये झिका विषाणूचा उद्रेक झाला होता. सद्यस्थितीत शहराच्या विविध भागांतील 128 डासांच्या समूहाची तपासणी केली असता त्यापैकी  अनेक समुहांमध्ये झिकाचे रेणू आढळले असल्याने पुण्यात झिका विषाणूचा धोका कायम आहे. डासामधील प्रादुर्भावामुळे भविष्यातही झिकाचा प्रादुर्भाव होण्याची दाट शक्यता देखील राष्ट्रीय विषाणू विज्ञान संस्थेच्या वतीने व्यक्त केली आहे.

झिका व्हायरसची लक्षणे कोणती?

झिका व्हायरसची लागण झालेल्या सुमारे 80 टक्के लोकांमध्ये कोणतीही लक्षणे दिसत नाहीत, तर काहींमध्ये सौम्य स्वरूपाची लक्षणे जाणवतात.

ही आहेत प्रमुख लक्षणे

- सौम्य ताप: शरीराचे तापमान थोडे वाढणे.
- अंगावर पुरळ: त्वचेवर लालसर पुरळ किंवा डाग उठणे.
- सांधे आणि स्नायू दुखणे: हाता-पायांच्या सांध्यांमध्ये आणि स्नायूंमध्ये वेदना होणे.
- डोळे लाल होणे: डोळ्यांच्या बुबुळाच्या पुढील भागाचा दाह (नेत्रश्लेष्मलाशोथ / लाल डोळे
- डोकेदुखी: तीव्र किंवा हलके डोकेदुखी व थकवा जाणवणे

संसर्जित डास चावल्यानंतर साधारणपणे 3 ते 14 दिवसांच्या आत ही लक्षणे दिसून येतात आणि ती 2 ते 7 दिवस टिकतात

झिका व्हायरस उपचार

झिका व्हायरसवर कोणतीही विशिष्ट लस किंवा अँटीव्हायरल औषधोपचार उपलब्ध नाही, लक्षणे नियंत्रित करण्यावर भर दिला जातो.

पूर्ण विश्रांतीः शरीराला बरे करण्यासाठी भरपूर आराम करणे आवश्यक आहे.

भरपूर द्रवपदार्थः डिहायड्रेशन टाळण्यासाठी सतत पाणी आणि इतर द्रवपदार्थ पिणे गरजेचे आहे.

ताप आणि वेदना शमवणे: ताप व अंगदुखी कमी करण्यासाठी डॉक्टर पॅरासिटामोल घेण्याचा सल्ला देतात.