'पुणेरी मेट्रो' 3 नोव्हेंबरला धावणार, 23 पैकी फक्त 17 स्थानकांतच थांबणार, कोणती असतील ही स्थानके!
पुण्यात तीन नोव्हेंबर रोजी आणखी एक मेट्रो धावणार असून पंतप्रधान मोदींच्या हस्ते उद्घाटन होणार आहे.
पुणे आणि पिंपरी-चिंचवडकरांची बहुप्रतीक्षित हिंजवडी ते शिवाजीनगर मेट्रो अखेर 3 नोव्हेंबरपासून प्रवाशांच्या सेवेत दाखल होणार आहे. पंतप्रधान नरेंद्र मोदी यांच्या हस्ते ऑनलाइन उद्घाटन् होणार आहे. मात्र उद्घाटनाच्या दिवशीच या मार्गावरील २३ पैकी तब्बल सहा स्थानके बंद राहणार आहेत. कशी असेल ही मेट्रो आणि किती स्थानके असतील जाणून घेऊयात.
3 नोव्हेंबरला पुणे मेट्रोचे उद्घाटन होणार आहे मात्र 4 नोव्हेंबरपासून मेट्रो धावणार आहे. माण-हिंजवडी ते शिवाजनगरदरम्यान मेट्रो सेवा प्रवाशांसाठी सुरू होणार आहे. सुरुवातीला या मार्गावरील 23 स्थानकांपैकी 17 स्थानके सुरू होणार आहेत. म्हाळुंगे-बालेवाडी येथील श्री शिवछत्रपती स्पोर्ट्स कॉम्प्लेक्समध्ये 3 नोव्हेंबर रोजी सकाळी 10.30 वाजता उद्घाटन सोहळा सुरू होणार आहे. यावेळी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे, सुनेत्रा पवार उपस्थित राहतील.
जवळपास 23.203 किमी लांबीची ही मेट्रो मार्गिका पूर्णपणे उन्नत असून पुणेरी मेट्रो आणि पिंक लाइन या नावाने ओळखली जाणार आहे. माण येथून सुरू होऊन हिंजवडीच्या राजीव गांधी इन्फोटेक पार्क करुन शिवाजीनगरपर्यंत ही मेट्रो धावणार आहे. या प्रकल्पासाठी एकूण 8,313 कोटींचा खर्च करण्यात आला आहे.
17 स्थानकांवर मेट्रो थांबणार
पहिल्या टप्प्यात केवळ 17 स्थानकांवर मेट्रो थांबणार असून, शिवाजीनगर, बाणेर, बालेवाडी फाटा, बाणेर गाव, बाणेर-पाषाण लिंक रोड आणि भोसलेनगर ही स्थानके सुरू नसणार आहेत. तर,
पहिल्या टप्प्यात खुल्या करण्यात येणाऱ्या 17 स्थानकांमध्ये माण, माण-एमआयडीसी सर्कल फेज-2, माण बस डेपो, हिंजवडी फेज-2 सर्कल-1 आणि 2, पद्मभूषण चौक, शिवछत्रपती शिवाजी महाराज चौक, हिंजवडी फेज-1, वाकड चौक, श्री शिवछत्रपती क्रीडा संकुल, मिटकॉन, आर. के. लक्ष्मण संग्रहालय, औंध, सकाळनगर, सावित्रीबाई फुले पुणे विद्यापीठ, कृषी महाविद्यालय आणि जिल्हा व सत्र न्यायालय स्थानकांचा समावेश आहे.
उर्वरित सहा स्थानकांवरील काम टप्प्याटप्प्याने पूर्ण केले जाईल. यापैकी दोन स्थानके नोव्हेंबर 2026 अखेरपर्यंत पूर्ण होण्याची अपेक्षा आहे, तर उर्वरित चार स्थानके जानेवारी 2027 पर्यंत प्रवाशांसाठी खुली केली जातील. सात स्थानकांवर प्रवाशांसाठी फक्त एकच जिना खुला असेल, तर उर्वरित 10 स्थानकांवर दोन्ही जिने वापरता येतील.
