महाराष्ट्रात घडली अजब घटना! ना पाऊस, ना धुकं तरीही आकाशातून कोसळला 7 किलोचा बर्फाचा गोळा, कारण ऐकून शॉक व्हाल
थेट अवकाशामधून भल्या मोठ्या गारा पडल्याची घटना घडली आहे. सांगलीच्या शिराळा तालुक्यातील मांगले येथे एक अजब प्रकार घडला आहे.
अवकाळी पाऊस, अतिवृष्टी किंवा चक्रीवादळ आल्यांनंतर गारांचा पाऊस पडताना तुम्ही पाहिला असेलच. पण आकाश निरभ्र असताना आणि प्रचंड उकाडा असताना आणि पावसाची काहीच चिन्हे नसताना आकाशातून बर्फाचा गोळा कोसळल्याची अजब घटना महाराष्ट्रात घडली आहे. इतकंच नव्हे तर हा बर्फाचा गोळा तब्बल 6-7 किलो इतक्या वजनाचा आहे. निसर्गाच्या या चमत्कारामुळं आश्चर्य व्यक्त करण्यात येत आहे.
थेट अवकाशामधून भल्या मोठ्या गारा पडल्याची घटना घडली आहे ती सांगलीच्या शिराळा तालुक्यातील मांगले येथे एका शेतात 5 ते 7 किलो वजनाचा बर्फाचा गोळा पडला आहे. प्रचंड वेगाने आणि मोठया आवाजासह बर्फाचा गोळा जमिनीवर आदळल्याने शेतात तब्बल 1 फुटाचा मोठा खड्डा पडला.
विशेष म्हणजे, हा बर्फाचा गोळा वितळण्यासाठी सहा ते सात तास लागले. मांगले येथील मोरणा नदीकाठावर असणाऱ्या एका शेतात हा बर्फाचा गोळा अवकाशातून येऊन पडला. बर्फाचा गोळा खाली आदळला तेव्हा मोठा आवाज झाल्याचंही शेतकरी सांगतात.
मोठ्या आवाजासह हा गोळा शेतात येऊन पडल्यानंतर गावातल्या शेतकऱ्यांनी त्या ठिकाणी धाव घेऊन पाहिले असता हा बर्फाचा गोळा आढळून आला. रविवारी सकाळी साडेआठ वाजता सुमारास ही घटना घडली आहे. दुर्मिळ घटनेमुळे परिसरात आश्चर्य आणि कुतूहल व्यक्त होत आहे.
घटनेचे प्रत्यक्षदर्शींनी दिलेल्या माहितीनुसार, आकाशातून सुरुवातीला ड्रोनसारखी एक वस्तू खाली येताना दिसली. त्यानंतर काही क्षणांतच ती वस्तु प्रचंड वेगाने शेतात आदळळी. त्याचा आवाज इतका मोठा होता की परिसरातील शेतकरीही हादरले. तिथे जाऊन पाहिल्यावर मोठा बर्फाचा गोळा होता. शेतात तिथे मोठा खड्डा पडला होता.
नोव्हेंबर महिन्यात सध्या धुके आणि कडाक्याची थंडी नसतानाही आकाशातून बर्फाचा गोळा पडल्याने नागरिकांमध्ये चर्चेला उधाण आलं आहे. तर, तज्ज्ञांनी दिलेल्या माहितीनुसार, काही वेळा पावसाळी ढगांशिवाय वातावरणातील बाष्प एकत्र येऊन बर्फाचे मोठे गोळे तयार होतात. त्याचे वजन काही ग्रॅमपासून ते 50 किलोपर्यंत असू शकते. त्याला मेगाक्रायोमोटिओर असं म्हणतात. निरभ्र आकाशातील वातावरणातील विशिष्ट दुर्मिळ बदलांमुळं ते तयार होत असतात.
दरम्यान, काहींना हवामानातील अनपेक्षित बदलांमुळं अशा घटना होऊ शकतात, असं म्हटलं आहे. वातावरणाच्या वरच्या थरातील अत्यंत कमी तापमानामुळं निर्माण झालेले बर्फाचे गोळे गुरुत्कर्षणामुळं खाली आदळण्याची शक्यता असते.