शुक्रवारी एशियन पॅरा गेम्समध्ये भारतीय खेळाडूंची सुवर्ण कामगिरी, मोना अग्रवालने केला वर्ल्ड रेकॉर्ड
Asian Para Games 2026 : एशियन पॅरा गेम्स 2026 मध्ये शुक्रवारचा दिवस भारतासाठी खूप खास ठरला. यात भारतीय खेळाडूंनी जवळपास 4 सुवर्णपदक जिंकली आहेत. यात भारताची शुटर मोना अग्रवाल हिने वर्ल्ड रेकॉर्ड बनवत अभिमानास्पद कामगिरी केली.
Asian Para Games 2026: जपानमध्ये एशियन पॅरा गेम्स 2026 ही स्पर्धा सुरु असून यात भारताची शुटर मोना अग्रवाल हिने जबरदस्त प्रदर्शन करून पुन्हा एकदा देशाचं नाव मोठं केलं आहे. एशियन पॅरा गेम्स 2026 मध्ये तिने असा निशाणा लगावला की वर्ल्ड रेकॉर्ड मोडला गेला आणि भारताच्या खात्यात अजून एक सुवर्णपदक आलं. महिलांच्या 50 मीटर राइफल थ्री पोजिशंस एसएच1 स्पर्धेत विजयासोबत मोनाने या खेळांमध्ये दुसरं सुवर्णपदक जिंकलं आहे.
मोना अग्रवालने ब्रेक केला वर्ड रेकॉर्ड :
मोना अग्रवालने शुक्रवारी फायनल सामन्यात 357.5 पॉईंट्स मिळवले. या गुणांसह तिने स्वीडनच्या ॲना बेन्सनच्या नावावर असलेला वर्ल्ड रेकॉर्ड मोडला. बेन्सनने जुलै 2026 मध्ये सर्बियातील नोवी साद येथे 356 गुण मिळवून हा विक्रम प्रस्थापित केला होता. मोनाने तिला मागे टाकत नवा वर्ल्ड रेकॉर्ड नोंदवला. मोनाचे यश इथेच थांबले नाही. तिने या स्पर्धेत एशियन गेम्समधील रेकॉर्ड सुद्धा मोडीत काढला. याआधीचा रेकॉर्ड दक्षिण कोरियाच्या ली युन-री हिच्या नावावर होता, जिने सप्टेंबर 2026 मध्ये चांगवॉन येथे 355.7 गुण मिळवले होते. मोनाने 357.5 गुणांची नोंद करत हा रेकॉर्ड मागे टाकला. अशा प्रकारे तिने एकाच स्पर्धेत जागतिक आणि एशियन गेम्समध्ये दोन्ही रेकॉर्ड आपल्या नावावर केले.
शुक्रवारी सुवर्णपदकांचा वर्षाव :
एशियन पॅरा गेम्स 2026 मध्ये शुक्रवार 23 ऑक्टोबर रोजी जवळपास 3 सुवर्णपदक भारतीय खेळाडूंनी पटकावली. यामध्ये खालीलपैकी खेळाडूंचा समावेश होता.
पॅरा आर्चरी: हरविंदर सिंग आणि विजय सुंडी यांनी चीनचा 5-1 असा पराभव करून रिकर्व्ह पुरुष दुहेरी प्रकारात सुवर्णपदक पटकावले.
पॅरा बॅडमिंटन: नितेश कुमारने प्रमोद भगतचा पराभव करून पुरुष एकेरी SL3 गटात विजय मिळवला, नवीन शिवकुमारने फ्रेडी सेतियावानचा पराभव करून पुरुष एकेरी SL4 गटात बाजी मारली, तर थुलसिमथी मुरुगेसन आणि मानसी जोशी यांच्या जोडीने महिला दुहेरी SL3-SU5 गटात विजय मिळवला.
पॅरा ॲथलेटिक्स: संदीपने 52.28 सेकंदांच्या वर्ल्ड रेकॉर्ड सह पुरुषांच्या 400 मीटर (T64) शर्यतीत विजय मिळवला. तर हॅनीने 60.49 मीटरच्या जागतिक विक्रमासह पुरुषांच्या भालाफेक (F37/38) प्रकारात सुवर्णपदक पटकावले.
पॅरा नेमबाजी: मोना अग्रवालने महिलांच्या 50 मीटर रायफल 3 पी एसएच 1 (50m Rifle 3P SH1) प्रकारात 357.5 गुणांसह वर्ल्ड रेकॉर्ड करत सुवर्णपदक पटकावले.
