'कितीही बुलेटप्रूफ केबिन...', अमिताभ बच्चन यांना जीवे मारण्याची धमकी; मुंबईत 200 जण पोहचल्याचा दावा! शीख समुदायाबद्दलचा हा वाद काय? धमकावणारा गोल्डी ढिल्लोन आहे कोण?
अमिताभ यांच्यावर हल्ला करण्याचा कट रचणाऱ्या दोन शार्पशूटर्सला अटक करण्यात आल्यानंतर आता हे शूटर्स आपल्याच टोळीचे असल्याचं सांगत स्पेनच्या तुरुंगात बसून अमिताभ यांना धमकी देणारा गँगस्टर आहे तरी कोण जाणून घ्या...
बॉलिवूडचे महानायक अमिताभ बच्चन यांना पंजाबमधील एक कुख्यात गँगस्टर असलेल्या गोल्डी ढिल्लोनने जीवे मारण्याची धमकी दिली आहे. सोशल मीडियावरून ही धमकी देण्यात आली असून शीख समुदायासंदर्भात 1984 च्या शीखविरोधी दंगलीनंतर केलेल्या कथित विधानाचा सूड आपण घेणार असल्याचं गोल्डी ढिल्लोनने म्हटलं आहे. विशेष म्हणजे शनिवारीच अमिताभ यांच्या 'जलसा' या निवासस्थानावर गोळीबार करण्याचा कट रचणाऱ्या दोन शार्पशूटरला अटक करण्यात आल्यानंतर हा इशारा देण्यात आला आहे.
200 साथीदार तयार असल्याचा दावा
अमिताभ बच्चन आणि अभिषेक बच्चन यांना गोल्डी ढिल्लोनने जीवे मारण्याची धमकी दिली आहे. गँगस्टर गोल्डी ढिल्लोंच्या नावाने असलेल्या सोशल मिडिया अकाऊंटवरुन धमकीची पोस्ट करण्यात आली आहे. दिल्ली पोलिसांनी अटक केलेल्या विकास ठाकूर आणि दीपक सिंग यांना आपले साथीदार असल्याचं पोस्टमध्ये म्हटलं आहे. दोघांच्या अटकेमुळे कोणताही कट उधळला गेलेला नाही, मुंबईत आणखी 200 साथीदार तयार असल्याचा दावा या पोस्टमधून करण्यात आला आहे.
कितीही बुलेटप्रूफ केबिन उभारले तरी...
शीख समुदायाविरोधात बोलणाऱ्यांना लक्ष्य करण्याची धमकी या पोस्टमधून देण्यात आली आहे. कितीही बुलेटप्रूफ केबिन उभारले तरी अमिताभ आणि अभिषेक बच्चन यांना ठार मारणार असल्याचा पोस्टमध्ये उल्लेख करण्यात आला आहे. 1984 च्या शीखविरोधी दंगलींचा संदर्भ देत धमकी देण्यात आली आहे. मात्र सोशल मीडियावरील पोस्टची स्वतंत्रपणे पुष्टी झालेली नाही. शनिवारी दिल्ली पोलिसांनी दिल्ली आणि मुंबईमधून विकास ठाकूर आणि दीपक सिंग यांना अटक केल्याने अमिताभ यांच्यावरील हल्ल्याच्या कट उधळल्याच्या बातम्या समोर आल्यानंतरही ही धमकी देण्यात आली आहे. अटक करण्यात आलेले दोन्ही आरोपी मूळचे पंजाबचे आहेत.
शीखविरोधी दंगल प्रकरणाशी अमिताभ यांचा संबंध काय?
1984 च्या शीखविरोधी दंगलींबाबत अमिताभ बच्चन यांनी केलेल्या विधानांचा संदर्भ गोल्डी ढिल्लोनच्या पोस्टणध्ये देण्यात आला आहे. मात्र, आपण ही विधाने कधीच केली नव्हती असं अमिताभ यांनी यापूर्वीच स्पष्ट केलं असून शीखविरोधी असल्याचे सर्व आरोप फेटाळून लावलेत. 1984 च्या शीखविरोधी दंगलींबाबत अमिताभ बच्चन यांनी हिंसाचार भडकावल्याचे आरोप करण्यात आले होते. काही शीख संघटना आणि साक्षीदारांनी केलेल्या आरोपानुसार, बच्चन यांनी दूरदर्शनच्या थेट प्रक्षेपणादरम्यान हात उंचावून "खून का बदला खून से लेंगे" अशी घोषणा देऊन जमावाला भडकावलं होतं, असा उल्लेख 'टाइम्स ऑफ इंडिया'च्या वृत्तात आहे.
या वादावर अमिताभ यांनी दिलेलं स्पष्टीकरण
2011 मध्ये अमिताभ बच्चन यांनी शीख धर्माचे सर्वोच्च पीठ असलेल्या श्री अकाल तख्त साहिबचे जथेदार यांना एक पत्र लिहून आपली बाजू स्पष्ट केली होती. हिंसाचार भडकावल्याचे आणि शीखविरोधी घोषणा दिल्याचे सर्व आरोप निराधार आणि धादांत खोटे असल्याचे त्यांनी पत्रात म्हटले होतं. 1984 च्या शीखविरोधी दंगली या धर्मनिरपेक्ष भारताच्या इतिहासातील एक काळा अध्याय आणि कलंक असल्याचे त्यांनी या पत्रात नमूद केले होते. आपली आई तेजी बच्चन या स्वतः शीख कुटुंबातील होत्या. त्यामुळे शीख धर्म आणि परंपरेबद्दल आपल्या मनात नेहमीच नितांत आदर असल्याचे त्यांनी नमूद केले होते.
गोल्डी ढिल्लोन आहे कोण?
गोल्डी ढिल्लोनचे खरे नाव गुरप्रीत सिंह आहे. तो मूळचा पंजाबमधील पटियाला जिल्ह्यातील राजपुरा येथील रहिवासी असून, त्याला 'गोल्डी राजपुरा' या नावानेही ओळखले जाते. सुरुवातीच्या काळात तो लॉरेन्स बिश्नोई आणि गोल्डी ब्रार टोळीचा एक महत्त्वाचा आणि विश्वासू सदस्य मानला जात असे. नंतरच्या काळात त्याचे बिश्नोई गटाशी मतभेद झाल्याने तो रोहित गोदाराच्या टोळीत गेला. 2022 मध्ये तो बेकायदेशीर मार्गाने भारतातून पळून युरोपमध्ये गेला. आधी तो जर्मनी आणि नंतर स्पेन गेला होता. तेथूनच तो पंजाब, चंदीगड, हरियाणा, दिल्ली-एनसीआर आणि कॅनडामध्ये खंडणी, गोळीबार आणि 'टार्गेट किलिंग'चे नेटवर्क चालवतो. त्याच्यावर हत्या, हत्येचा प्रयत्न, खंडणी आणि शस्त्रास्त्र कायद्यांतर्गत डझनभराहून अधिक गंभीर गुन्हे दाखल आहेत. राष्ट्रीय तपास संस्थेने त्याच्यावर 10 लाख रुपयांचे, तर पंजाब पोलिसांनी 5 लाख रुपयांचे बक्षीस जाहीर केले होते. भारतीय गुप्तचर यंत्रणा आणि पंजाब पोलिसांच्या अँटी-गँगस्टर टास्क फोर्सने दिलेल्या माहितीच्या आधारे, जुलै 2026 मध्ये स्पेनच्या सुरक्षा यंत्रणांनी त्याला माद्रिद शहरातून ताब्यात घेतले आहे. त्याला भारतात प्रत्यार्पण करून आणण्याची कायदेशीर प्रक्रिया सुरू आहे.