बॉलिवूडमध्ये खळबळ! तुषार कपूरनंतर आता आयुष्मान खुरानाला धमकीचा मेसेज, लॉरेन्स गँगचा उल्लेख

बॉलिवूड अभिनेता टायगर श्रॉफवर झालेल्या गोळीबाराच्या घटनेनंतर बॉलिवूडकरांनी धसका घेतला आहे. अनेक कलाकारांनी आपल्या घराबाहेरची सुरक्षा वाढवली आहे. पोलिसांकडून या घटनेचा सखोल तपास केला जात आहे. मात्र अद्यापही कलाकारांना मिळणाऱ्या धमकीचे सत्र थांबले नाहीये. अभिनेता तुषार कपूर  याला धमकी मिळाल्यानंतर आता अभिनेता आयुष्मान खुरानालादेखील धमकीचा ऑडिओ मेसेज आला आहे. लॉरेन्स गँगकडून ही धमकी आल्याचा दावा करण्यात येत असून पोलिसांकडून तपास सुरू आहे.

बॉलिवूड अभिनेता टायगर श्रॉफवरील गोळीबाराच्या घटनेनंतर आता अभिनेता आयुष्मान खुरानालाही धमकी मिळाल्याची माहिती समोर आली आहे. सूत्रांनी दिलेल्या माहितीनुसार, आयुष्मान खुरानाला धमकीचा ऑडिओ क्लिप पाठवण्यात आला आहे. या ऑडिओ क्लिपमध्ये धमकी देणाऱ्या व्यक्तीने स्वतःची ओळख लॉरेन्स गँगचा सदस्य असल्याचे सांगितल्याचा दावा करण्यात येत आहे. तसेच, कोट्यवधी रुपयांची खंडणी मागितल्याची केल्याचीही माहिती सूत्रांकडून मिळत आहे.

दरम्यान, धमकी देणाऱ्या व्यक्तीने ऑडिओमध्ये सांगितलेले नाव आणि पोलिसांच्या रेकॉर्डवरील संबंधित आरोपीचा आवाज यांची पडताळणी केली जात आहे. आवाजाचे नमुने जुळतात का, याचा तपास पोलीस करत आहेत. काही दिवसांपूर्वी अभिनेता तुषार कपूरलाही धमकीचा ऑडिओ मेसेज मिळाल्याची माहिती समोर आली होती. या मेसेजमध्ये धमकी देणाऱ्याने स्वतःची ओळख हॅरी बॉक्सर अशी सांगितली होती. मात्र, प्राथमिक तपासात हा ऑडिओ बनावट असल्याचा संशय व्यक्त केला जात आहे.

बॉलिवूड कलाकारांना धमक्या देणे, त्यांची रेकी करणे आणि दहशत निर्माण करण्यामागे नेमका कोणाचा हात आहे, याचा शोध घेण्यासाठी पोलीस यंत्रणा तपास करत आहे.

तुषार कपूरलाही धमकीचा मेसेज

बॉलिवूड अभिनेता तुषार कपूर यांना कथितरित्या एक फोन आला, ज्यामध्ये फोन करणाऱ्याने स्वतःची ओळख लॉरेन्स बिश्नोई टोळीचा सदस्य हॅरी बॉक्सर म्हणून सांगितली आणि 5 कोटी (50 दशलक्ष रुपये) रुपयांची खंडणी मागितली. अभिनेत्याने या प्रकरणाची माहिती मुंबई पोलिसांना दिली, ज्यांनी नंतर हा तपास खंडणीविरोधी पथक आणि गुन्हे शाखेकडे वर्ग केला. गुन्हे शाखेच्या तांत्रिक पथकाने धमकीच्या फोनमधील ऑडिओ रेकॉर्डिंग तपासले असून, त्यांच्या डेटाबेसमधील हॅरी बॉक्सरच्या अधिकृत ऑडिओ नमुन्यांशी आवाजाची जुळवणी करत आहेत. वरिष्ठ पोलीस सूत्रांनुसार, हे नमुने जुळले नाहीत, त्यामुळे हा फोन बनावट होता किंवा कोणीतरी धमकावण्यासाठी टोळीच्या नावाचा वापर केला होता, असा संशय बळावला आहे. पोलीस आता हे ऑडिओ रेकॉर्डिंग पाठवणाऱ्या व्यक्तीचा शोध घेत आहेत. या प्रकरणात अद्याप कोणतीही एफआयआर दाखल करण्यात आलेली नाही. तुषार कपूर यांनी सुमारे आठवडाभरापूर्वी ही तक्रार दाखल केली होती.