दोन हेलिकॉप्टरची हवेतच एकमेकाला धडक; कॅमेऱ्यात LIVE कैद झाली दुर्घटना, कोसळून खाली प्रवाशांवर पडणार इतक्यात...
नेपाळमध्ये हेलिपॅडवर उतरताना दोन हेलिकॉप्टर एकमेकांवर आदळल्यामुळे झालेल्या भीषण अपघातात एका नागरिकाचा मृत्यू झाला, असून एक जखमी झाला आहे.
नेपाळमध्ये दोन हेलिकॉप्टर एकमेकांवर आदळून भीषण दुर्घटना घडली आहे. ही घटना कॅमेऱ्यात कैद झाली असून व्हिडीओ व्हायरल झाला आहे. सोलुखुम्बु जिल्ह्यात (Nepal's Solukhumbu district) राजधानी काठमांडूपासून सुमारे 250 किमी अंतरावर असलेल्या हेलिपॅडवर ही दुर्घटना घडली. येथे मंगळवारी सकाळी दोन हेलिकॉप्टर्स एकमेकांवर आदळली. या दुर्घटनेत एक परदेशी नागरिक ठार झाला, तर अन्य एक व्यक्ती जखमी झाली आहेे.
फेरिचे (Pheriche) हेलिपॅडवर घडलेल्या या अपघातात 'फिशटेल एअर' (Fishtail Air) आणि 'डायनेस्टी एअर' (Dynasty Air) या कंपन्यांची हेलिकॉप्टर्स एकमेकांवर आदळली. नेपाळच्या नागरी उड्डाण प्राधिकरणाने (Civil Aviation Authority of Nepal) दिलेल्या माहितीनुसार, हेलिपॅडवर लँडिंग करत असताना दोन्ही हेलिकॉप्टर्सचे रोटर ब्लेड्स (पाती) एकमेकांना धडकले.
या घटनेचे सीसीटीव्ही फुटेज समोर आले आहे, ज्यामध्ये दोन्ही हेलिकॉप्टर एकमेकांच्या अत्यंत जवळ आल्याचे आणि त्यांचे रोटर ब्लेड्स एकमेकांना धडकल्याचे कैद झाले आहे.
पोलिसांनी दिलेल्या माहितीनुसार, मृतांपैकी एक व्यक्ती परदेशी नागरिक आहे, परंतु त्यांची ओळख आणि राष्ट्रीयत्व अद्याप स्पष्ट झालेले नाही. मृतदेह नंतर हेलिकॉप्टरद्वारे लुकला येथे नेण्यात आला. या अपघातात जखमी झालेल्या आणखी एका व्यक्तीला उपचारांसाठी दुसऱ्या हेलिकॉप्टरद्वारे हलवण्यात आले.
नागरी उड्डाण प्राधिकरणाचे माहिती अधिकारी ज्ञानेंद्र भुल यांनी या अपघाताला दुजोरा दिला असून, अधिकारी या घटनेबाबत अधिक माहिती गोळा करत असल्याचे सांगितले. अपघात नेमक्या कोणत्या परिस्थितीत घडला, याबाबत अधिक माहिती घेतली जात आहे.
नेपाळमध्ये पर्यटकांना आणि गिर्यारोहकांना ने-आण करण्यासाठी, जीवनावश्यक वस्तूंची वाहतूक करण्यासाठी तसेच आपत्कालीन बचाव कार्यासाठी लहान हेलिकॉप्टरचा मोठ्या प्रमाणावर वापर केला जातो.
