अदानीचा महाराष्ट्रातील सर्वात मोठा प्रकल्पावर दुहेरी संकट; वनविभागानंतर प्रदूषण नियंत्रण मंडळाकडून दणका, 5675 कोटींचा प्रकल्प झाला बंद
अदानी ग्रीन एनर्जी लिमिटेडकडून उभारला महाराष्ट्रातील सर्वात मोठा प्रकल्प हा सातारा जिल्ह्याच्या पाटण तालुक्यात आहे. या प्रकल्पाला एकापाठोपाठ दोन फटका बसला आहे.
महाराष्ट्रातील कर्जत-भीमाशंकरमधील टोरेंट प्रकल्पाला विरोध होत असताना आता साताऱ्यातील अदानीचा महाराष्ट्रातील सर्वात मोठा प्रकल्प दुहेरी अडचणीत सापडला आहे. सातारा जिल्ह्यातील तारळी पंप स्टोरेज प्रकल्पाच्या अडचणी वाढताना दिसून येत आहे. यापूर्वी राष्ट्रीय वन्यजीव मंडळाने कंपनीला प्रकल्पाचे काम थांबवण्याचे आदेश दिले होते. आता महाराष्ट्र प्रदूषण नियंत्रण मंडळानेही या प्रकल्पाला काम बंद करण्याचे आदेश देत मोठा दणका दिला आहे. महाराष्ट्र प्रदूषण नियंत्रण मंडळाने सांगितलं की, प्रकल्पावर आवश्यक परवानगी आणि पर्यावरणीय मंजुरीशिवाय काम सुरू असल्याचे समोर आलंय. त्यामुळे महाराष्ट्र प्रदूषण नियंत्रण मंडळाने उत्खनन आणि बांधकामाची कामे तात्काळ थांबवण्याचे आदेश दिले आहेत. महाराष्ट्र प्रदूषण नियंत्रण मंडळाने मौजे सावरघर इथल्या गट क्रमांक 33 आणि 34 मध्ये पाहणी केली. तेव्हा असं दिसून आलं की, आवश्यक परवानग्यांशिवाय उत्खनन आणि विकासकाम सुरू आहे. त्यामुळे सध्या सुरू असलेली तसंच प्रस्तावित उत्खनन आणि बांधकामाची कामे तात्काळ बंद करण्याचे आदेश महाराष्ट्र प्रदूषण नियंत्रण मंडळाने दिले आहेत.
हेसुद्धा वाचा - पुण्यातील धक्कादायक घटना! 19 वर्षीय लेक सकाळी कॉलेजला गेली, मध्यरात्री पोलिसांकडे बेपत्ता असल्याची तक्रार अन् मग 14 तासानंतर लिफ्टमध्ये...
वनविभागाने 13 नोव्हेंबरला अदानी प्रकल्पाच्या अधिकृत स्वाक्षरीदाराला नोटीस बजावली होती. या नोटीसमध्ये प्रकल्पाचे काम तात्काळ बंद करण्याचे आदेश दिले. राष्ट्रीय वन्यजीव मंडळाची आवश्यक पूर्वपरवानगी न घेतल्यामुळे ही कारवाई करण्यात आली आहे. रोहन भाटे यांनी या प्रकल्पाबद्दल तक्रारी केल्यानंतर हा प्रकल्प पुन्हा चर्चेत आलाय.
ह्या प्रकल्पामुळे वृक्षांची तोड करण्यात येत आहे. ज्यामुळे या प्रकल्पामुळे पर्यावरणास नुकसानदायक आहे, त्यामुळे याला विरोध करण्यात येत आहे. दरम्यान अभिनेते सयाजी शिंदे आणि प्रकल्पविरोधी लढ्याचे युवक आंदोलक विवेकानंद पाटील यांनी 15 नोव्हेंबरला प्रत्यक्ष प्रकल्पस्थळी भेट देऊन इथल्या प्रकल्पाची पाहणी केली. परिसरातील कामाची पाहणी केल्यावर हे काम अनधिकृत असून त्याबद्दल पाटण पोलीस ठाण्यात तक्रारही दाखल केली. त्यामुळे तारळी प्रकल्पाचा वाद आता अधिकच चिघळला.
नेमका काय आहे हा प्रकल्प?
अदाणी ग्रीन एनर्जी लिमिटेडचा हा प्रकल्प साताऱ्यातील तारळी नदीच्या खोऱ्यात आहे. इथे 1500 मेगावॉट क्षमतेचा पंप्ड स्टोरेज जलविद्युत तारळी पंप्ड स्टोरेज प्रकल्प उभारण्यात येत आहे.