मुरासू चक्रीवादळ किनारपट्टीला धडकले, वादळी वाऱ्यासह पाऊस, महाराष्ट्रातील 'या' जिल्ह्यांनाही यलो अलर्ट

बंगालच्या उपसागरात तयार झालेल्या मुरासू चक्रीवादळाचा परिणाम राज्यावर होणार आहे. राज्यात वादळी पावसासाठी पोषक हवामान निर्माण झालं आहे. आज कोकण, मध्य महाराष्ट्र, विदर्भ आणि मराठवाड्यात विजांसह पावसाची शक्यता वर्तवण्यात आली आहे. राज्यातील या विभागांत येलो अलर्ट देण्यात आला आहे. तर, उर्वरित राज्यात मात्र ढगाळ हवामानासह तुरळक ठिकाणी विजांसह पावसाची शक्यता आहे.

आंध्र प्रदेश राज्य आपत्ती व्यवस्थापन प्राधिकरणाने (APSDMA) दिलेल्या माहितीनुसार, चक्रीवादळ मुरासू किनारपट्टीला धडकले असून दोन तास मुसळधार पाऊस बरसणार आहे. तसंच, सध्या किनारपट्टीवर 120 प्रति किमीच्या वेगाने वादळी वारे वाहत आहेत. चक्रीवादळामुळं किनारपट्टीवर 1 ते 1.5 मीटर उंच लाटा उसळल्या आहेत.  या पार्श्वभूमीवर नागरिकांनी घराबाहेर पडू नये आणि सुरक्षित ठिकाणीच थांबावे, असे आवाहन करण्यात आले आहे. तसेच, नागरिकांनी अत्यंत सतर्क राहावे, असे निर्देश आंध्र प्रदेश सरकारने दिले आहेत.

चक्रीवादळाचा परिणाम महाराष्ट्रावर होणार आहे. सिंधुदुर्ग, कोल्हापूर, लातूर, नांदेड, यवतमाळ, चंद्रपूर, गडचिरोली जिल्ह्यांत विजांसह वादळी पावसाची शक्यता आहे. तर, कोकण, मध्य महाराष्ट्र, मराठवाड्यात विजांसह पावसाची शक्यता आहे. मात्र उर्वरित राज्यात अंशतः ढगाळ हवामानासह तापमानात चढ-उतार होण्याचा अंदाज हवामान विभागाने वर्तवला आहे.

नोव्हेंबरमध्येही बसणार उन्हाचे चटके

ऑक्टोबर महिन्यात राज्यातील बहुतांश भागांत नागरिकांना उन्हाच्या तीव्र झळांचा सामना करावा लागला. आता नोव्हेंबर महिन्यातही उकाड्यापासून दिलासा मिळण्याची शक्यता कमी असून, महाराष्ट्रासह देशाच्या पश्चिम किनारपट्टीवरील काही भागांत कमाल तापमान सरासरीपेक्षा अधिक राहण्याचा अंदाज हवामान विभागाने व्यक्त केला आहे. प्रशांत महासागरातील 'एल निनो' स्थितीची तीव्रता आगामी काही दिवसांत वाढण्याची शक्यता आहे. त्याचा परिणाम देशातील तापमानावर होण्याची शक्यता वर्तविण्यात येत आहे. त्यामुळे नोव्हेंबरही तापदायक जाणार आहे.