कर्जतपाठोपाठ आता मुंबईत वृक्षतोडीला परवानगी; 8 प्रोजेक्टला मान्यता! किती झाडांचा बळी जाणार? समोर आला आकडा
मुंबईत असलेलं संजय गांधी राष्ट्रीय उद्यान आधीच अतिक्रमणाच्या विळख्यात सापडले आहे. असं असताना आता येथील 468 झाडांची कत्तल होणार आहे. नेमकी कशासाठी या झाडांची कत्तल होणार हे जाणून घ्या सविस्तरपणे...
कर्जतमध्ये टोरंट कंपनीच्या प्रकल्पासाठी जंगतोडीमुळे राजकीय वातावरण तापलेलं असतानाच शहरी भागामध्ये असलेल्या जगातील सर्वात मोठ्या जंगलामधील म्हणजेच 'मुंबईचे फुफ्फुस' अशी ओळख असलेल्या संजय गांधी राष्ट्रीय उद्यानामधील शेकडो झाडांवरही कुऱ्हाड पडणार आहे. यासंदर्भात वन्यजीव मंडळाने परवानगी दिली असून वृक्षतोडीचा मार्ग मोकळा झाला आहे.
पर्यावरणदृष्ट्या संवेदनशील क्षेत्रातील वृक्षतोडीस मंजुरी
सध्या महाराष्ट्रामध्ये विविध प्रकल्पांमुळे मोठ्या प्रमाणावर वृक्षतोड केली जात आहे. त्यामुळे ग्रीन झोन म्हणजेच वनक्षेत्र बऱ्याच प्रमाणात बाधित होणार. म्हणूनच पर्यावरणवादी आणि निसर्गप्रेमींकडून या अशा मोठ्या प्रकल्पांना विरोध होतोय. मात्र या विरोधाला फारसं न जुमानता पुन्हा प्रोजेक्टसाठी पर्यावरणदृष्ट्या संवेदनशील क्षेत्रातील वृक्षतोडीस मंजुरी देण्यात आली आहे. संजय गांधी राष्ट्रीय उद्यानातील आठ प्रकल्पांना महाराष्ट्र वन्यजीव मंडळाने मंजुरी दिली आहे. या प्रकल्पांमुळे एकूण 468 झाडे बाधित होणार असून यातील निम्म्याहून अधिक झाडे ठाण्यातील माजिवडा येथील एका खासगी बांधकाम प्रकल्पासाठी तोडली जाणार आहेत. तसेच, 476 झाडे कायम ठेवली जाणार असून 372 झाडांचे पुनर्रोपण केले जाणार आहे.
आधीच अतिक्रमणाचा त्रास
खरं तर वेगाने शहरीकरण होत असलेल्या मुंबईत असलेलं संजय गांधी राष्ट्रीय उद्यान आधीच अतिक्रमणाच्या विळख्यात सापडले आहे. असं असताना आता येथील 468 झाडांची कत्तल होणार असल्याने पर्यावरण संवर्धनासाठी कार्य करणाऱ्या संस्थांकडून तीव्र संताप व्यक्त होत आहे.
कोणत्या कामांसाठी देण्यात आलीये परवानगी?
वन्यजीव मंडळाने कांदिवलीत खटाऊ मिलच्या जागेवर एका बांधकाम प्रकल्पाला मंजुरी दिली असून यासाठी 228 झाडे तोडली जाणार आहेत. त्यातील 92 झाडांचे पुनर्रोपण होणार आहे. या भूखंडावर जुन्या चाळी असून त्यांचा पुनर्विकास करणे आवश्यक आहे, असे मंडळाने म्हटले आहे. तसेच, राज्य सरकारच्या एका झोपु प्रकल्पासाठी पर्यावरणदृष्ट्या संवेदनशील क्षेत्रातील बोरिवलीच्या देवीचापाडा येथे तीन झाडे तोडली जाणार आहेत. वृक्षतोडीची मंजुरी मिळालेल्यांमध्ये ठाणे, भाईंदर, विहार तलावाजवळील 'आयआयएम' च्या पुनर्विकास प्रकल्पाचाही समावेश आहे. या वृक्षतोडीला पर्यवरणवाद्यांकडून विरोध केला जात असला तरी वन्यजीव मंडळाने परवानगी दिल्याने ही वृक्षतोड अटळ असल्याचं मानलं जात आहे.
32490 झाडे तोडण्याची परवानगी
रायगड जिल्ह्यातील कर्जत येथे टोरेंट पॉवरच्या 3000 मेगावॅट क्षमतेच्या जलविद्युत प्रकल्पासाठी एकूण 32490 झाडे तोडण्याची परवानगी वनविभागाने दिली आहे. स्थानिक नागरिक आणि पर्यावरणप्रेमींच्या तीव्र विरोधामुळे कर्जत येथील वृक्षतोड तूर्तास थांबवण्यात आली आहे. काम थांबवले जाण्यापूर्वी सुमारे 2700 झाडे तोडण्यात आल्याची माहिती समोर येत आहे.
