'नेत्यांनी माझा गेम केला,' कराळे गुरुजींची शरद पवारांच्या NCP मधून 6 वर्षासाठी हकालपट्टी; ढसाढसा रडले

नितेश कराळेंना नागपूर पदवीधर मतदारसंघात बंडखोरी करणं चांगलचं भोवलं आहे. नितेश कराळेंची शरद पवारांच्या राष्ट्रवादीतून हकालपट्टी करण्यात आली आहे. अपक्ष म्हणून त्यांनी उमेदवारी दाखल केली होती. त्यांना अभिजीत वंजारींना पाठिंबा देण्याची विनंती केली होती. मात्र, कराळे निवडणूक लढण्यास ठाम असल्यानं त्यांच्यावर पक्ष शिस्तभंगाची कारवाई करण्यात आली आहे. राष्ट्रवादी SP पक्षामधून कराळेंची 6 वर्षांसाठी हकालपट्टी करण्यात आली आहे. या कारवाईनंतर नितेश कराळे आक्रमक झालेत. मतदार मतदानातून उत्तर देईल आणि 27 तारखेला त्याचे परिणाम दिसतील, असा इशारा त्यांनी महाविकास आघाडीला दिला आहे.

कराळे गुरुजींनी महाविकास आघाडीचे अधिकृत उमेदवार अभिजीत वंजारी यांच्या विरोधात त्यांनी अर्ज भरला होता. पक्षाचे सरचिटणीस रवींद्र पवार यांनी 22 ऑक्टोबर 2026 रोजी याबद्दलचे पत्र काढले. अभिजीत वंजारी यांना पक्षाचा पाठिंबा असतानाही कराळे यांनी अपक्ष अर्ज भरला. उमेदवारी कायम ठेवल्यामुळे पक्षशिस्त आणि महाविकास आघाडीच्या निर्णयांचे उल्लंघन झाले. कराळे मतदारांमध्ये ‘शरदचंद्रजी पवार साहेब यांचा मला पाठिंबा आहे,’ असा संभ्रम निर्माण करत असल्याच्या तक्रारी पक्षाला मिळाल्या होत्या. याची दखल घेऊन, वरिष्ठ नेत्यांच्या सूचनेनुसार कराळे यांना पक्षातून काढण्याचा निर्णय घेण्यात आला.

कराळे गुरुजींची पदवीधर मतदारसंघातील ही दुसरी निवडणूक आहे. 2020 मध्येही त्यांनी अपक्ष उमेदवारी दाखल केली होती. त्यावेळी त्यांना 6889 मते मिळाली होती. ‘खदखद सर’ म्हणूनही ते ओळखले जातात.

हकालपट्टी केल्यानंतर नितेश कराळे यांना अश्रू अनावर

पक्षाने हकालपट्टी केल्यानंतर नितेश कराळेंना अश्रू अनावर झाले. राष्ट्रवादी पक्षासाठी एवढं काम केलं असताना अनेक सभा मी लोकसभेसाठी, विधानसभेसाठी घेतल्या. महाविकास आघाडीसाठी काम केलं. माझ्यावर अनेक गुन्हे दाखल झाले. मी जेलात होतो तेव्हा माझ्या बायकोला एकाही मोठ्या नेत्याचा फोन आला नाही अशी खंत त्यांनी व्यक्त केली.

हकालपट्टी झाली हा माझा पुरस्कार समजतो. परंतु सगळ्या नेत्यांनी मिळून माझा गेम केला. येत्या काळात मी सगळे नेत्यांची पोलखोल करणार आहे असा इशाराही त्यांनी दिला आहे. मला जर अशी वागणूक मिळत असेल तर दाद कुठे मागायची अशी विचारणाही त्यांनी केली.

मतदार आपल्या मतदानातून उत्तर देतील. 27 तारखेला मतमोजणी सुरु झाल्यावर सगळ्या पक्षाच्या लोकांना समजेल की, विद्यार्थ्यांसाठी लढणाऱ्या सामान्य शेतकऱ्याच्या मुलाचं तिकीट कापलं तर काय परिमाण होतात असंही ते म्हणाले आहेत.