'सुप्रिया आणि आम्ही...', पंतप्रधान नरेंद्र मोदींचा शरद पवारांना फोन

शरद पवार यांना पुण्यातील रुबी रुग्णालयात दाखल करण्यात आलं होतं. उपचारानंतर आज दोन दिवसांनी त्यांना डिस्चार्ज देण्यात आला आहे. रुग्णालयातून त्यांनी घरी नेण्यात आलं असून, यावेळी त्यांच्या कन्या आणि खासदार सुप्रिया सुळेही उपस्थित होत्या. दरम्यान शरद पवारांच्या तब्येतीची विचारपूस करण्यासाठी पंतप्रधान नरेंद्र मोदी यांनी त्यांना फोन केला होता. यावेळी त्यांनी शरद पवारांनी तब्येतीची काळजी घेण्यास सांगितलं. यावेळी शरद पवारांनीही त्यांचे आभार मानले.

पंतप्रधान नरेंद्र मोदी यांनी सकाळी शरद पवारांना फोन केला होता. तब्येतीच्या कारणास्तव 2 ऑक्टोबरला शरद पवारांनी पुण्यातील रुबी रुग्णालयात दाखल करण्यात आलं होतं. शरद पवारांचे डॉक्टर परवेझ ग्रँड यांनी शरद पवारांच्या फुफ्फुसात पाणी भरल्याची माहिती दिली होती. दरम्यान आज रुग्णालयातून डिस्चार्ज मिळाल्यानंतर पंतप्रधान नरेंद्र मोदींनी शरद पवारांना फोन केला होता. यावेळी नरेंद्र मोदींनी शरद पवारांना "तुम्ही काळजी घ्या सुप्रिया आणि आम्ही देश सांभाळू" असं सांगितलं.

रुग्णालयात दाखल केल्यानंतर डॉक्टरांनी काय सांगितलं होतं?

डॉक्टर परवेझ ग्रँड यांनी शरद पवारांना रुग्णालयात दाखल केल्यानंतर माहिती दिली होती की, "शरद पवार यांना आज दुपारी 3 वाजता रुग्णालयात दाखल करण्यात आलं आहे. त्यांना छातीत दुखत असल्याने रुग्णालयात दाखल झाले आहेत. सगळ्या चाचण्या झाल्या आहेत. त्यांच्या छातीत दुखत आहे. एक-दोन दिवसात त्यांना घरी सोडण्यात येईल. काळजी करण्याची गरज नाही शरद पवार बरे आहेत. त्यांच्या तब्येतीबाबत चिंता नसावी. सिटी स्कॅन करण्यात आलं आहे. कसल्याही प्रकारच्या सर्जरीची गरज नाही औषधाने तब्येत बरी होईल".

यानंतर दुसऱ्या दिवशी त्यांनी सांगितलं होतं की, शरद पवार यांच्या फुफ्फुसात पाणी भरलं आहे.  शरद पवार यांच्यावर औषधोपचार सुरू आहेत. शरद पवार यांची सकाळी तपासणी केली असून, अँटिबायोटिक दिले आहेत. लवकरच त्यांना डिस्चार्ज दिला जाईल". त्यानुसार आज त्यांना डिस्चार्ज देण्यात आला.