वैष्णवी हगवणे प्रकरणात मोठी अपडेट; तिघांना जामीन मंजूर, कोर्टाने घातलेल्या अटी वाचल्या का? पुढले 6 महिने...

पुण्यातील विवाहिता वैष्णवी हगवणे आत्महत्या प्रकरणात मोठी अपडेट समोर आली आहे. मुंबई उच्च न्यायालयाने या प्रकरणातील तीन आरोपींना सशर्त जामीन मंजूर केला आहे. तिघांनाही प्रत्येकी २५ हजार रुपयांच्या वैयक्तिक जातमुचलक्यावर जामीन मंजूर करण्यात आला आहे. न्यायमूर्ती मिलिंद एन. जाधव यांनी प्रत्येक अर्जदाराची भूमिका, उपलब्ध पुरावे आणि तपासाची प्रगती यांचा आढावा घेतल्यानंतर हा आदेश दिला आहे.

वैष्णवी मृत्यू प्रकरणातील तिन्ही आरोपींना प्रत्येकी 25 हजारांना वैयक्तिक जातमुचकल्यावर आणि तेवढ्याच रकमेच्या एक किंवा दोन जामीनदारांवर सोडण्याचे आदेश देण्यात आले आहे. जामीनदारांची पूर्तता करण्यासाठी चार आठवड्यांची मुदत देण्यात आली असून तोपर्यंत तात्पुरत्या रोख जामिनावर सुटका करण्याची मुभा दिली आहे.

न्यायालयाने काय म्हटलं?

साक्षीदारांवर प्रभाव टाकू नये, पुराव्यांमध्ये हस्तक्षेप करुन नये, अशा कडक अटी कोर्टाने घातल्या आहेत. इतकंच नव्हे तर, पुढील सहा महिने दर महिन्याच्या पहिल्या रविवारी बावधन पोलीस ठाण्यात हजर राहणे बंधनकारक आहे. जामीन आदेशाला तीन आठवड्यांची स्थगिती देण्याची तक्रारदाराची मागणी न्यायालयाने फेटाळली असून जामीन म्हणजे निर्दोष मुक्तता नाही, मुख्य खटला सुरू राहणार असं न्यायालयाने स्पष्ट केले आहे.

पुण्यातील विवाहिता वैष्णवी हगवणे हिने 16 मे 2025 रोजी गळफास घेत जीवन संपवले होते. या प्रकरणी तिचा पती शशांक राजेंद्र हगवणे, सासरा राजेंद्र तुकाराम हगवणे, सासू लता राजेंद्र हगवणे, नणंद करिश्मा राजेंद्र हगवणे आणि दीर सुशील राजेंद्र हगवणे यांच्याविरोधात गुन्हा दाखल करण्यात आला आहे. तसंच, या प्रकरणात,  लग्नामध्ये ५१ तोळे सोने आणि एक एसयूव्ही गाडी मिळाल्यानंतरही, जमीन खरेदीसाठी 2 कोटी रुपयांची मागणी केल्याचा उल्लेख होता.

कुटुंबीयांकडून छळाचे आरोप

लग्नात 51 तोळे सोने आणि लक्झरी SUV गाडी दिल्यानंतरही जमिनीच्या खरेदीसाठी सासरच्या मंडळींकडून 2 कोटी रुपयांच्या अतिरिक्त हुंड्याची मागणी होत होती, ज्यासाठी तिचा शारीरिक व मानसिक छळ केला जात असल्याचा आरोप तिच्या माहेरच्यांनी केला.

दरम्यान, शवविच्छेदन अहवालात वैष्णवीच्या शरीरावर मारहाणीच्या सुमारे 30 खुणा आढळल्याने या प्रकरणाला अधिक गंभीर वळण मिळाले व हत्येचा संशय व्यक्त केला गेला.