अभिजित बिचुकलेंना किती मतं पडली पाहिलं का? पुण्यात प्रचारादरम्यान, 'शिक्षकांसाठी वाटेल तो संघर्ष करेन' असा दिलेला शब्द
अभिजित बिचुकले यांनी यापूर्वीही अनेक निवडणुका लढवल्या असून ते अत्यंत जोमाने प्रचार करताना दिसतात. यंदाही त्यांनी शिक्षक मतदारसंघासाठी जोरदार प्रचार केला होता. मात्र निवडणुकीत त्यांना किती मतं मिळाली पाहिलं का?
पुणे शिक्षक मतदारसंघात भारतीय जनता पार्टीचे कौस्तुभ गावडे यांचा मोठा विजय झाला आहे. कौस्तुभ गावडे यांनी शिंदे शिवसेनेनं पुरस्कृत केलेले उमेदवार सचिन सानप यांचा पराभव केला आहे. अटीतटीच्या लढतीत गावडे यांचा मोठ्या मताधिक्यांनी विजय झाला आहे. एकीकडे गावडे आणि सानप यांच्यातील चुरस चर्चेत असतानाच याच मतदारसंघातून अभिजित बिचुकलेही निवडणुकीच्या रिंगणात होते. अभिजित बिचुकलेंना या निवडणुकीमध्ये नेमकी किती मतं मिळाली? याचा नेमका आकडा समोर आला आहे.
आक्रमक भूमिका
आपल्या अनोख्या व चित्रविचित्र विधानांमुळे, कपड्यांच्या स्टाईलमुळे आणि प्रत्येक निवडणुकीत अपक्ष म्हणून अर्ज भरणारे अभिजीत बिचुकलेंना पुणे शिक्षक मतदारसंघाच्या निवडणुकीमध्येही अर्ज भरला होता. त्यांनी आक्रमक प्रचारदेखील केला होता. शिक्षकांच्या प्रश्ननांसंदर्भात आक्रमक भूमिका मांडणाऱ्या अभिजीत बिचुकलेंनी शिक्षकांच्या प्रश्नांसाठी आपण लढा देऊ असं सांगितलं होतं. शिक्षकांसाठी वाटेल तो संघर्ष करण्यास आपण तयार असल्याचं नमूद केलेलं. "मी निवडून आलो तर तुम्हाला (शिक्षकांना) रस्त्यावर आंदोलन करावं लागणार नाही. तुमचे नेतृत्वचं लेचेपेचे आहे. नेता हा डॉ. अभिजित बिचुकलेसारखाच असावा," असं बिचुकलेंनी भाषणामध्ये म्हटलं होतं.
बिचुकलेंना किती मतं मिळाली?
शिक्षकांसाठी उभं राहण्याचा शब्द देणाऱ्या बिचुकलेंना प्रत्यक्ष निवडणुकीमध्ये मात्र मोठा धक्का बसला आहे. बिचुकलेंना अवघी 19 मतं मिळाली आहेत. अपक्ष उमेदवार म्हणून बिचुकलेंचं आवाहन पहिल्या काही फेऱ्यानंतरच संपुष्टात आलं. बिचुकले यापूर्वी अनेकदा विधानसभा तसेच लोकसभा निवडणुकीलाही उभे राहिले आहेत. मात्र त्यांच्या पदरी कायम निराशाच आली आहे. असं असलं तरी त्यांनी निवडणूक लढवण्याची जिद्द सोडली नाही हेच आजच्या निकालामधूनही दिसून येत आहे.
बिचुकले उभ्या राहिलेल्या मतदारसंघात आरोप-प्रत्यारोपांच्या फैरी
पुण्यातील मतदान केंद्रावरून बाहेर पडताना शिवसेना शिंदे गट पुरस्कृत अपक्ष उमेदवार सचिन सानप यांच्या समोरच भाजप कार्यकर्त्यांकडून घोषणाबाजी केल्याचं पाहायला मिळालं. "येऊन येऊन येणार कोण... कौस्तुभ गावडेंशिवाय आहेच कोण," अशा आशयाच्या घोषणा देण्यात आल्या. शिक्षक मतदार संघाच्या निवडणुकीत भारतीय जनता पक्षाचे उमेदवार कौस्तुभ गावडे यांनी आचारसंहितेच्या नियमांचा भंग केलाय, असा आरोप सचिन सानप यांनी केलेला. "भारतीय जनता पक्षाचा गमछा घालून त्यांनी मतदान केंद्रात प्रवेश केला व मतदान केले. या सर्व प्रक्रियेत त्यांना कोणत्याही यंत्रणेने अथवा निवडणूक आयोगाने अडवले नाही. तसेच भोर येथील एका केंद्रावर संग्राम थोपटे पैसे वाटप करत असल्याचे आढळून आल्याचा आरोपही सानप यांनी केला होता.
