समृद्धी महामार्गावर पुन्हा दरोडा, सरकारी अभियंत्यालाच लुटले, पिस्तुलाचा धाक दाखवला अन् इनोव्हा कार पळवली...

मुंबई-नागपूर समृद्धी महामार्गावर पुन्हा एकदा दरोडा पडल्याची धक्कादायक माहिती समोर आली आहे.  भरदिवसा पिस्तुलाचा धाक दाखवून सरकारी अभियंत्याला लुटल्याची घटना समोर आली आहे. आमने टोलनाक्याजवळ हा थरार घडल्याची प्राथमिक माहिती आहे.

आमने टोलनाक्याजवळ कार आडवी लावून 4 ते 5 मास्कधारी हल्लेखोरांनी सरकारी अभियंता आणि त्यांच्या चालकाला पिस्तूल आणि चाकूचा धाक दाखवला. त्यानंतर 30 हजार रुपयांची रोकड, मोबाइल आणि इनोव्हा कार घेऊन आरोपींनी पळ काढला. सोमवारी सकाळी अकराच्या सुमारास हा प्रकार घडला.

फरीद खान हे छत्रपती संभाजीनगरचे रहिवासी असून, मुंबईतील कळवा येथील मुद्रा व जलसंधारण विभागात कार्यकारी अभियंता म्हणून कार्यरत आहेत. सोमवारी ते चालक कृष्णा बाविस्कर यांच्यासह छत्रपती संभाजीनगरहून ठाण्याकडे जात होते. उंभर्णी बोगद्याजवळ रस्त्याच्या मधोमध एक कार आडवी उभी होती. चालकाने इनोव्हा थांबवताच अर्टिगामधून चार ते पाच मास्कधारी हल्लेखोर उतरले.

दरोडेखोरांनी पिस्तूल आणि चाकूचा धाक दाखवत दोघांनाही खाली उतरवले आणि त्यांच्याकडील रोकड, मोबाइल व इनोव्हा घेऊन पलायन केले. काही अंतरावर इनोव्हा सोडून आरोपींनी अन्य वाहनांतून छत्रपती संभाजीनगरच्या दिशेने पळ काढला. घटनेनंतर चार जिल्ह्यांतील पोलिसांनी समन्वयाने तपासाची सूत्रे हलवली.

या प्रकरणी सोमवारी रात्री उशिरापर्यंत छत्रपती संभाजीनगरमधून दोन संशयितांना ताब्यात घेण्यात आले आहे. या घटनेमुळे समृद्धी महामार्गावरील प्रवाशांच्या सुरक्षेचा प्रश्न पुन्हा ऐरणीवर आला आहे.

महालक्ष्मी एक्स्प्रेसमध्ये दरोडा

मुंबईहून कोल्हापूरकडे जाणाऱ्या महालक्ष्मी एक्स्प्रेसमध्ये मध्यरात्री चोरट्यांनी धुमाकूळ घालत पाच ते सहा महिला प्रवाशांचे सुमारे दोन लाख रुपये किमतीचे सोन्याचे दागिने लंपास केले. सातारा जिल्ह्यातील सालपे स्थानकाजवळ सिग्नल यंत्रणेत बिघाड घडवून रेल्वे थांबवण्यात आली. त्यानंतर आरक्षित डब्यातील महिलांच्या गळ्यातील दागिने हिसकावून चोरट्यांनी पळ काढला. यावेळी चोरट्यांनी एस-२, एस-३ आणि एस-४ डब्यांवर दगडफेकही केली. घटनेमुळे प्रवाशांमध्ये भीतीचे वातावरण निर्माण झाले असून मिरज रेल्वे पोलिसांत गुन्हा दाखल करण्यात आला आहे.या घटनेमुळे रेल्वे प्रवाशांच्या सुरक्षेचा प्रश्न पुन्हा ऐरणीवर आला आहे.