PNB मध्ये 10.24 कोटींचा घोटाळा? महिला कर्मचाऱ्याने सहकाऱ्यांचे लॉगिन वापरून पैसे वळवले? एका पासबुकमुळे प्रकरण उघड!
ग्रेटर नोएडातील PNB शाखेत 10.24 कोटींच्या कथित गैरव्यवहाराचा आरोप आहे. महिला कर्मचारी दीपांशी आणि खातेधारक अशुतोष पाठक यांच्याविरोधात CBI ने गुन्हा दाखल केला.
पंजाब नॅशनल बँक म्हणजेच पीएनबीच्या ग्रेटर नोएडा येथील शाखेत ग्राहकांच्या बचत खात्यांसह मुदत ठेवींमधून 10.24 कोटी रुपयांचा कथित गैरव्यवहार झाल्याचे समोर आले आहे. बँकेच्या प्राथमिक तपासात एका महिला कर्मचाऱ्याने इतर अधिकाऱ्यांचे लॉगिन तपशील वापरून अनधिकृत व्यवहार केल्याचा आरोप आहे. या प्रकरणी केंद्रीय अन्वेषण विभाग म्हणजेच सीबीआयने गुन्हा दाखल केला. एका ग्राहकाने पासबुक अपडेट केल्यानंतर संशयास्पद व्यवहार उघडकीस आल्याचे सांगण्यात येत आहे. काय घडलंय नेमकं? याचा इतर ग्राहकांवर काय परिणाम होणार? याबद्दल सविस्तर जाणून घेऊया.
पासबुक अपडेट करताना संशयास्पद व्यवहार उघड
ग्रेटर नोएडातील सेक्टर पाई परिसरातील पीएनबी शाखेत संगीता नावाच्या ग्राहक पासबुक अपडेट करण्यासाठी गेल्या होत्या. त्यावेळी त्यांच्या खात्यात 16 सप्टेंबर रोजी झालेले तीन व्यवहार त्यांच्या निदर्शनास आले. हे व्यवहार आपण केले नसल्याचे त्यांनी बँकेला सांगितले. त्यानंतर शाखा व्यवस्थापकांनी तपास सुरू केला. व्यवहारांशी संबंधित आवश्यक व्हाउचर उपलब्ध नसल्याने संशय अधिक गडद झाला.
महिला कर्मचाऱ्यावर गंभीर आरोप
बँकेच्या तक्रारीनुसार, शाखेत कार्यालयीन सहाय्यक म्हणून काम करणाऱ्या दीपांशीवर अनधिकृत व्यवहार केल्याचा आरोप आहे. तिने शाखेतील इतर सहा अधिकाऱ्यांचे सीबीएस म्हणजेच कोअर बँकींग सिस्टिममधील यूजर आयडी आणि पासवर्ड वापरल्याचा प्राथमिक तपासात संशय व्यक्त करण्यात आला आहे.
अशुतोष पाठक यांच्याशी आर्थिक व्यवहारांचा संबंध?
CBI च्या FIR मध्ये अशुतोष पाठक यांचे नाव खातेधारक म्हणून समाविष्ट आहे. ग्राहकांच्या खात्यांमधून वळवलेली रक्कम विविध लाभार्थी खात्यांमार्फत पाठक यांच्याशी संबंधित खात्यांपर्यंत पोहोचवण्यात आल्याचा संशय आहे. बँकेने यासंदर्भात तक्रार दाखल केलीय. काही मुदत ठेवींची माहिती बदलणे, त्या मुदतीपूर्वी बंद करणे आणि त्यातून मिळालेली रक्कम दुसऱ्या खात्यांत वळवणे असे प्रकारही प्राथमिक तपासात समोर आले आहेत.
तीन वर्षांपासून गैरव्यवहार सुरू?
बँकेच्या तक्रारीनुसार, गेल्या सुमारे तीन वर्षांपासून वेगवेगळ्या ग्राहकांच्या खात्यांत अनधिकृत व्यवहार होत असल्याचा संशय आहे. बचत खात्यांमधील रक्कम, मुदत ठेवींचे तपशील आणि ग्राहकांना मिळणारे व्यवहारांचे मोबाइल अलर्ट यामध्ये फेरफार झाल्याची प्राथमिक माहिती समोर आली आहे. आतापर्यंत सुमारे 10.24 कोटी रुपयांचे अनधिकृत व्यवहार बँकेने ओळखले असून अंतिम नुकसान किती आहे, याची पडताळणी अद्याप सुरू आहे.
ग्राहकांना PNB ने काय दिले आश्वासन?
PNB च्या तक्रारीनंतर CBI च्या गाझियाबाद येथील भ्रष्टाचार प्रतिबंधक शाखेने गुन्हा दाखल केला. दीपांशी, अशुतोष पाठक आणि अन्य अज्ञात व्यक्तींविरोधात भारतीय न्याय संहिता, माहिती तंत्रज्ञान कायदा आणि भ्रष्टाचार प्रतिबंधक कायद्यातील तरतुदींनुसार तपास सुरू आहे. बँकेने तीन ग्राहकांचे एकूण 43 लाख रुपयांचे दावे निकाली काढल्याचे सांगितले असून, वैध दाव्यांची पूर्तता करण्याचे आश्वासन दिले आहे.
