EPFO वेबसाइटची गरज नाही; व्हॉट्सअ‍ॅपवर PF बॅलन्स कसा तपासायचा? सोप्या स्टेप्स!
EPFO ची नवी व्हॉट्सअ‍ॅप सेवा सुरू झालीय. आता पीएफ बॅलन्स, पासबुक आणि मागील 5 व्यवहार मोबाईलवर पाहता येणार आहेत. अधिकृत क्रमांक आणि वापरण्याची स्टेप-बाय-स्टेप प्रक्रिया जाणून घेऊया.
नोकरी करणाऱ्या कोट्यवधी कर्मचाऱ्यांसाठी महत्त्वाची बातमी आहे. कर्मचारी भविष्य निर्वाह निधी संघटना म्हणजेच ईपीएफओने आपल्या 74 व्या स्थापना दिनानिमित्त व्हॉट्सअ‍ॅप वरून पीएफ खात्याची माहिती मिळवण्याची सुविधा सुरू केलीय. केंद्रीय कामगार आणि रोजगारमंत्री मनसुख मांडविया यांनी या सेवेचे उद्घाटन केले. त्यानंतर आता पीएफ बॅलन्स, पासबुक आणि खात्यातील अलीकडील व्यवहार पाहण्यासाठी प्रत्येक वेळी ईपीएफओ वेबसाइटवर लॉगिन करण्याची गरज कमी होणार आहे.
व्हॉट्सअ‍ॅपवर कोणत्या सुविधा मिळणार?
या नव्या सुविधेमुळे कर्मचाऱ्यांना चार प्रकारे मदत मिळणार आहे. पीएफ बॅलन्स:खात्यात सध्या किती रक्कम जमा आहे, हे पाहता येईल. खात्यात जमा झालेल्या योगदानाची माहिती मिळेल. खात्यातील अलीकडील पाच व्यवहार तपासता येतील. प्रधानमंत्री विकसित भारत रोजगार योजनेशी संबंधित पात्रता आणि आवश्यक प्रक्रिया पूर्ण करण्यासाठी वैयक्तिक मार्गदर्शन मिळेल.
व्हॉट्सअ‍ॅपवर PF बॅलन्स तपासण्याची स्टेप-बाय-स्टेप प्रक्रिया
ही सुविधा वापरण्यासाठी पुढील प्रक्रिया करा.
मोबाईलमध्ये व्हॉट्सअ‍ॅप सुरू करा.
EPFO चा अधिकृत व्हॉट्सअ‍ॅप क्रमांक +91 8796441800 सेव्ह करा.
त्या क्रमांकाचे व्हेरिफाइड व्हॉट्सअ‍ॅप अकाउंट उघडा.
संबंधित क्रमांकावरून ‘Hi’ असा मेसेज पाठवा.
स्क्रीनवर दिसणाऱ्या सूचनांनुसार भाषा निवडा.
PF बॅलन्स, पासबुक किंवा मागील पाच व्यवहार यांपैकी आवश्यक पर्याय निवडा.
आवश्यक पडताळणी पूर्ण केल्यानंतर खात्याची माहिती मिळवा. ही प्रक्रिया करताना ईपीएफओच्या खात्याशी जोडलेल्या मोबाईल क्रमांकावरूनच मेसेज करणे महत्त्वाचे आहे.
महाराष्ट्रातील नोकरदारांनाही मोठा फायदा
मुंबई, पुणे, ठाणे, नाशिक, छत्रपती संभाजीनगर आणि राज्यातील औद्योगिक क्षेत्रांत काम करणाऱ्या कर्मचाऱ्यांसाठी ही सुविधा उपयोगी ठरू शकते. विशेषतः नोकरी बदलल्यानंतर पीएफ खात्यातील जमा रक्कम तपासायची असल्यास किंवा कंपनीकडून नियमित योगदान जमा होत आहे का?, हे पाहायचे असल्यास ही सुविधा सोयीची ठरेल.
फसवणुकीपासून सावध राहा
EPFO च्या नावाने बनावट व्हॉट्सअ‍ॅप अकाउंट किंवा मेसेजद्वारे फसवणूक होण्याची शक्यता लक्षात घ्या. त्यामुळे केवळ अधिकृत क्रमांक आणि व्हेरिफाइड अकाउंटच वापरण्याचे आवाहन करण्यात आले आहे. कोणालाही यूएएन पासवर्ड, ओटीपी, बँक खात्याचा पासवर्ड किंवा इतर गोपनीय माहिती देऊ नका. तसेच, सेवा सुरू झाल्यानंतर काही सदस्यांनी ओटीपी न मिळणे किंवा तांत्रिक अडचणी येत असल्याच्या तक्रारी केल्या आहेत. त्यामुळे पर्याय दिसत नसल्यास किंवा प्रतिसाद मिळत नसल्यास काही वेळाने पुन्हा प्रयत्न करा, असे आवाहन करण्यात आलंय.
