तृणमूल काँग्रेस पक्षाचे नाव आणि चिन्ह कोणाचे? 4 महिन्यात निकाल लागणार? निवडणूक आयोग काय निर्णय देणार?

तृणमूल काँग्रेस पक्ष : पश्चिम बंगालच्या राजकारणावर तब्बल 15 वर्ष एकहाती वर्चस्व असलेल्या तृणमूलच्या प्रमुख नेत्या ममता बॅनर्जी यांचा 2026 च्या विधानसभा निवडणूकीत मोठा पराभव झाला. त्या पराभवानंतर ममता बॅनर्जी यांना 15 वर्षानंतर मुख्यमंत्रीपदाच्या खुर्चीवरून पायउतार व्हावं लागलं.  सत्ता गेल्यानंतर ममतांच्या टीएमसीला फुटीचं ग्रहण लागल्याचं पाहायला मिळालं. तृणमूलमध्ये उभी फुट पडलीय.ऋतब्रत बॅनर्जी यांच्या नेतृत्वात आमदारांनी बंडखोरी करत आम्हीच मूळ पक्ष असल्याचा दावा केला. जसा महाराष्ट्रात शिवसेना फुटीनंतर एकनाथ शिंदे यांनी केला होता आणि राष्ट्रवादीच्या फुटीनंतर अजित पवारांनी केला होता. तशीच अवस्था टीएमसीची झाली. यामुळे हे प्रकरण निवडणूक आयोगात पोहोचले. निवडणूक आयोगाने तृणमूल काँग्रेसच्या नाव आणि चिन्हावर अंतरिम बंदी घातली. सुप्रीम कोर्टानं याबाबत महत्वाचे आदेश दिले. सुप्रीम कोर्टानं  निवडणूक आयोगाला 4 महिन्यांत निकाल देण्याचे निर्देश दिले आहेत.
 

तृणमूल काँग्रेसच्या नाव आणि चिन्हावर बंदी घातल्यानंतर दोन्ही गटांना तीन नावं आणि तीन चिन्हांचा पर्याय देण्यास सांगण्यात आलं. दिलेल्या पर्यांयांपैकी एक नाव आणि एक चिन्ह हे दोन्ही गटांना देण्यात आलं.  'ममता ऑल इंडिया टीएमसी' ला फुटबॉल खेळाडू चिन्ह देण्यात आले आहे.  ऋतब्रत बॅनर्जी गटाला  डेमॉक्रॅटिक तृणमूल काँग्रेस नाव देण्यात आले असून लिफाफा चिन्ह देण्यात आले आहे. 
 

ऑल इंडिया तृणमूल काँग्रेसमधील (AITC) अंतर्गत फुटीनंतर पक्षाचे नाव आणि मूळ पक्षचिन्ह गोठवण्याच्या निवडणूक आयोगाच्या निर्णयाला सर्वोच्च न्यायालयात आव्हान देण्यात आले आहे. या प्रकरणी सोमवारी सुनावणी करताना सर्वोच्च न्यायालयाने केंद्रीय निवडणूक आयोगाला पक्षनाव आणि चिन्हाबाबतचा हा विवाद चार महिन्यांच्या आत सोडवण्याचे स्पष्ट निर्देश दिले आहेत. 
 

न्यायालयाने दोन्ही गटांना आपापले म्हणणे मांडण्यासाठी चार आठवड्यांची मुदत दिली आहे. त्यानंतर पुढील तीन महिन्यांत निवडणूक आयोगाने यावर अंतिम निर्णय घ्यावा, असे निर्देश देण्यात आले आहेत. त्यामुळे एकंदरीत आगामी चार महिन्यांत तृणमूल काँग्रेसच्या मूळ चिन्हाचा निर्णय लागणार आहे.
 

पश्चिम बंगालच्या माजी मुख्यमंत्री ममता बॅनर्जी यांनी निवडणूक आयोगाच्या अंतरिम निर्णयाविरोधात सर्वोच्च न्यायालयात याचिका दाखल केली होती. पक्षात अंतर्गत बंडखोरी झाल्यानंतर निवडणूक आयोगाने ‘ऑल इंडिया तृणमूल काँग्रेस’ हे नाव आणि पक्षाचे अधिकृत चिन्ह ‘जोडाफूल’ (फूल आणि गवत) वापरण्यास अंतरिम स्थगिती दिली होती.
 

दरम्यान तृणमूल पक्ष आणि चिन्ह गोठवल्यानंतर काँग्रेस नेते राहुल गांधींनी निवडणूक आयोगावर गंभीर आरोप केलेत... भाजप आणि निवडणूक आयोग मिळून पक्ष फोडत असल्याचा दावा राहुल गांधींनी केला आहे.