श्री चरणीची आयसीसीची ऐतिहासिक कामगिरी, ऑस्ट्रेलियन दिग्गजाचा मोडला रेकॅार्ड

भारताची युवा स्टार क्रिकेट संघातील श्रीचर्णी हिने आंतरराष्ट्रीय स्तरावर कमी वयामध्ये खळबळ उडवली आहे. नुकत्याच झालेल्या आशियाई खेळांमध्ये महिला क्रिकेट संघामध्ये श्री चरणीने कमालीची कामगिरी केली होती, आता तिच्या आशियाई खेळांमधील कामगिरीनंतर तिच्या नावावर नवा रेकॅार्ड प्रस्तापित झाला आहे. आयसीसीने नवी महिला गोलंदाजी क्रमवारी जाहीर केली आहे. यामध्ये भारताच्या युवा गोलंदाजाने आतंरराष्ट्रीय स्तरावर कमालीची कामगिरी केली आहे. आयसीसी (आंतरराष्ट्रीय क्रिकेट परिषद) महिला टी२० आंतरराष्ट्रीय गोलंदाजी क्रमवारीत, चरणीने असा विक्रम प्रस्थापित केला आहे जो यापूर्वी कोणत्याही गोलंदाजाने केलेला नाही. ८१७ रेटिंग गुणांसह, ती महिला टी२० आंतरराष्ट्रीय क्रमवारीच्या इतिहासातील सर्वोच्च मानांकन असलेली गोलंदाज ठरली आहे.

भारताच्या संघाने आठव्यांदा आशिया कप जिंकला त्याचबरोबर टीम इंडियाने आशियाई खेळांमध्ये गोल्ड मेडल देखील नावावर केले. या दोन्ही स्पर्धेंमधील कामगिरीनंतर श्री चरणीने कमालीची कामगिरी केली याचा फायदा तिला आता आयसीसी रॅंकिंगमध्ये झाला आहे. दीप्ती शर्माच्या साथीने श्री चरणीने संपूर्ण स्पर्धेत वर्चस्व गाजवले. चरणीने आशिया कपमध्ये १२ बळी घेतले, ज्यात श्रीलंकेविरुद्धच्या अंतिम सामन्यातील चार बळींचा समावेश आहे. तिने यावर्षी आतापर्यंत टी-२० आंतरराष्ट्रीय सामन्यांमध्ये ३९ बळी घेतले आहेत. आशियाई क्रीडा स्पर्धेतही चरणीने उत्कृष्ट गोलंदाजी करत जपानविरुद्ध चार बळी घेतले होते. श्रीलंकेविरुद्ध दोन बळी घेऊन सुवर्णपदक जिंकण्यातही तिने महत्त्वाची भूमिका बजावली होती.

श्री चरणीने ऑस्ट्रेलियाची स्टार गोलंदाज मेगन शटचा विक्रम मोडला आहे. शटने नोव्हेंबर २०१८ मध्ये आयसीसी महिला टी२० आंतरराष्ट्रीय गोलंदाजी क्रमवारीत ८०६ रेटिंग गुण मिळवले होते. चरणीचे सध्याचे रेटिंग तिच्यापेक्षा ११ गुणांनी जास्त आहे. २०२६ च्या ऐची-नागोया आशियाई खेळांमधील तिच्या प्रभावी कामगिरीनंतर , तिने आपल्या नावावर आणखी एका ऐतिहासिक कामगिरीची नोंद केली आहे. श्रीलंकेविरुद्धच्या आशियाई क्रीडा स्पर्धेच्या अंतिम सामन्यात श्री चरणीने आपल्या गोलंदाजीने महत्त्वाची भूमिका बजावली. तिने १३ धावांत २ बळी घेतले. या सामन्यात भारताने श्रीलंकेला १४७ धावांनी हरवून सुवर्णपदक जिंकले.

चरणीच्या कामगिरीने केवळ भारताच्या विजयातच योगदान दिले नाही, तर तिची रँकिंगही नव्या उंचीवर नेली. आपल्या सातत्यपूर्ण कामगिरीने तिने महिलांच्या टी२० आंतरराष्ट्रीय क्रिकेटमध्ये आपले स्थान पक्के केले आहे. गोलंदाजांच्या टी-२० क्रमवारीत भारतीय खेळाडूंचे वर्चस्व कायम आहे. दमदार कामगिरीसह दीप्ती शर्मा ७५४ गुणांसह दुसऱ्या क्रमांकावर आहे. टीम इंडियाची सलामीवीर स्मृती मंधानाला टी-२० फलंदाजीच्या यादीत फायदा झाला असून, ती ७५४ गुणांसह अव्वल पाचमध्ये पोहोचली आहे. ती सध्या पाचव्या क्रमांकावर आहे. मंधानाने आशियाई क्रीडा स्पर्धेत चांगली कामगिरी केली होती. शेफाली वर्मा तिच्या पुढे चौथ्या क्रमांकावर आहे. ऑस्ट्रेलियाची अनुभवी फलंदाज बेथ मूनी यादीत अव्वल स्थानी कायम आहे.