Breaking Bad मधील प्रसिद्ध अभिनेत्याने उचललं टोकाचं पाऊल, वयाच्या 34 व्या वर्षी निधन

'ब्रेकिंग बॅड' या लोकप्रिय अमेरिकन टीव्ही मालिकेतील वॉल्टर व्हाईट ज्युनियरच्या भूमिकेसाठी ओळखला जाणारा अभिनेता आरजे मिट्टे याचे निधन झाले आहे. तो 34 वर्षांचा होता. त्याने आत्महत्या करत जीवन संपवल्याची माहिती आहे. त्याचा एक व्हिडिओ सध्या सोशल मीडियावर व्हायरल होत आहे.

या व्हिडिओमध्ये, आरजे मिट्टे मेक्सिकोमध्ये त्याचा मित्र आणि 'ब्रेकिंग बॅड'मधील सहकलाकार लुईस मोनकाडासोबत एका हॉट एअर बलूनमध्ये दिसत आहेत. दोघेही खूप मजा-मस्ती करताना दिसत आहेत, पण आरजे मिट्टे मात्र काहीसा निराश दिसत आहे. त्याच्या मृत्यूच्या काही दिवस आधीच हा व्हिडीओ शूट केला होता.

"आम्ही अत्यंत दुःखाने कळवत आहोत की, आमचा लाडका अभिनेता, समाजसेवक आणि दिव्यांग हक्कांचा खंदा समर्थक आरजे मिट्टे याचे दुःखद निधन झाले आहे," असे त्यांच्या प्रतिनिधीने बीबीसीला सांगितले. मिट्टे याचे सोमवारी टेक्सासमधील ब्राउन्सविले येथे निधन झाले. त्यांच्या प्रसिद्धी व्यवस्थापकाने रॉयटर्सला आत्महत्या केल्याचा वृत्ताला दुजोरा दिला आहे.

ब्रेकिंग बॅडमध्ये वडिलांची भूमिका साकारणाऱ्या ब्रायन क्रॅनस्टन यांनी इन्स्टाग्रामवर त्याला श्रद्धांजली वाहिली असून ही बातमी कळल्यानंतर आपण "अत्यंत निराश" झाल्याचे लिहिल आहे. 

वॉल्टर व्हाइट ज्युनियरच्या भूमिकेमुळे प्रसिद्धी

आरजे मिट्टेने 2008 च्या 'ब्रेकिंग बॅड' या मालिकेत वॉल्टर व्हाईटचा मुलगा, वॉल्टर व्हाईट ज्युनियरची भूमिका साकारली. त्याचे पात्र फ्लिन या नावानेही ओळखले जात होते. ही मालिका वॉल्टर व्हाईट नावाच्या एका हायस्कूल शिक्षकाभोवती फिरते, ज्याला एका गंभीर आजाराचे निदान झाल्यानंतर तो गुन्हेगारीच्या जगात प्रवेश करतो. या मालिकेनंतर मिट्टे घराघरात पोहोचला आणि त्याला प्रचंड प्रसिद्धी मिळाली, तसेच त्याच्या अभिनयाचे प्रेक्षकांनी खूप कौतुक केले.

'ब्रेकिंग बॅड' ही मालिका 2008 ते 2013 या काळात प्रसारित झाली. या मालिकेने 16 एमी पुरस्कार जिंकले. 'ब्रेकिंग बॅड' व्यतिरिक्त, तो 2021 च्या 'ट्रायम्फ' या चित्रपटातही दिसला. या चित्रपटात त्याने सेरेब्रल पाल्सीशी झुंज देणाऱ्या एका हायस्कूल कुस्तीपटूची भूमिका साकारली. मिट्टे स्वतः सेरेब्रल पाल्सीने ग्रस्त होता आणि त्याने आयुष्यभर अपंगांच्या हक्कांसाठी काम केले.