'पैशांमुळे आम्हाला नाटकातून वेगळं केलं', रोहन अन् केतकीला 'आमने सामने' नाटकातून तडकाफडकी काढलं

रंगभूमीवर गाजत असलेल्या आमने-सामने नाटकातून महत्त्वाच्या भूमिकेत दिसणाऱ्या दोन कलाकारांना नाटकातून तडकाफडकी काढण्यात आल्याची माहिती समोर येतेय. अभिनेता रोहन गुजर आणि अभिनेत्री केतकी विलास यांची जोडी आता नाटकाच्या पुढच्या प्रयोगांमध्ये दिसणार नाहीत. स्वतः कलाकरांनीच सोशल मीडियावर व्हिडिओ शेअर करुन याची माहिती दिली. तसंच, निर्मात्यांबाबत नाराजीदेखील व्यक्त केली आहे.

आमने सामने नाटकात लीना भागवत आणि मंगेश कदम यांच्यासोबत रोहन गुजर आणि केतकी विलास हे दोघही महत्त्वाच्या भूमिकेत होते. मात्र नाटकाचा प्रयोग पार पडल्यानंतर अचानक दोघांनाही हा शेवटचा प्रयोग असल्याचे सांगण्यात आले, असं कलाकारांनी व्हिडिओत म्हटलं आहे.

रोहन गुजर आणि केतकी विलास यांनी शेअर केलेल्या व्हिडिओत म्हटलं की, आता आपण भेटुयात आमने-सामने हे वाक्य आम्ही कधीच बोलू शकणार नाही. कारण आता इथून पुढे आम्ही दोघही आमने-सामने या नाटकाचा भाग नसणार आहोत. मी सात ते आठ वर्ष हे नाटक करत आहे त्याचे 670 प्रयोग. आणि केतकी साडेचार वर्ष 520 प्रयोग. 18 ऑक्टोबरला रवींद्र नाट्यमंदिरला आमचा प्रयोग झाला. त्यानंतर आमची एक मीटिंग झाली ते आता मला सांगितलं की हा तुमचा शेवटचा प्रयोग होता, असं  रोहन गुजर याने म्हटलं आहे.

'या नाटकाने आम्हाला भरपूर काही दिलं. प्रेक्षकांचं प्रेम दिलं. म्हणजे प्रेक्षक अगदी 25-25 वेळा येऊन हे नाटक पाहत होते. आमच्या नाटकाचे तिकीट्स ब्लॅक झाले आहेत असंही आम्ही ऐकलेलं. पण त्या बदल्यात आम्हाला नीट गुडबायही दिला नाही. आम्ही आमचा शेवटचा प्रयोग नीट एन्जॉय केला नाही, आम्हाला आमचा शेवटचा प्रयोग सेलिब्रेट करता आला नाही. जर आम्हाला माहित असतं की हा आमचा शेवटचा प्रयोग आहे तर आमचे कुटुंबीय सुद्धा तो प्रयोग बघायला आले असते. तिथल्या लोकांबरोबर संवाद साधून त्यांना छान गुडबाय करता आलं असतं. म्हणजे एखाद्याने तुमच्या सुरळीत चाललेल्या आयुष्यातून पूर्वकल्पना न देता अगदी सहज उचलून फेकून देणे इतकं हे त्रासदायक होतं. लाईफ ऑफ पाय मध्ये इरफान म्हणतो की तो वाघ साधा त्याला वळून बघत नाही त्याला नीट बाय म्हणत नाही त्याचा त्याला खूप त्रास झाला तसंच काहीसं आता आपल्याला होत आहे, असंही रोहन याने म्हटलं आहे.

'आम्ही साधारण पाच ते सात वर्ष या नाटकात काम करत आहोत पण आम्हाला आमच्या निर्मात्यांनी छान गुडबायही दिलं नाही. पैशांमुळे आम्हाला या नाटकातून वेगळं केलं गेलं. पैसे या विषयावरून आपण अनेकदा एखाद्या प्रोजेक्ट सोडतो ‌ पण तो छान नोटवर सोडला जातो. प्रयोग झाल्यावर अचानक आम्हाला सांगितले गेले की आता आपण थांबतोय. आता जो झाला तो तुमचा शेवटचा प्रयोग होता हे खूपच वाईट होतं. मध्ये कोविडमध्ये दोनदा नाटक बंद झालेलं. जेव्हा ते पुन्हा सुरू झालं तेव्हा आम्ही अर्ध्या पाकिटात काम करत होतो. त्यानंतर मध्ये निर्मात्यांमध्ये वाद झाले तेव्हाही नाटक बंद झालेलं पण आम्ही आमने-सामने या नाटकासोबत कायम होतो.'

आम्हाला प्रेक्षकांचे खूप आभार मानायचे आहेत कारण त्यांनी आमच्यावर भरपूर प्रेम केलं. पण सॉरी आता आम्ही या नाटकात यापुढे नसणार आहोत. आम्हाला कधीच वाटलं नव्हतं की आम्ही या गोष्टीसाठी हा व्हिडिओ करू. ही खूप दुःख देणारी गोष्ट आहे. आमच्याकडून एक फॉर्मल व्हिडिओ किंवा मेसेज बाहेर येणे गरजेचे होतं. आता या नाटकाच्या नवीन टीमला ऑल द बेस्ट. आमचं नाटकावर खूप प्रेम आहे त्यामुळे नवीन पात्रात, नवीन रूपात आम्ही तुम्हाला भेटायला येऊ, असंही त्यांनी म्हटलं आहे.