'टाळी एका हाताने वाजत नाही...'; आमने-सामने वादावर प्रशांत दामले स्पष्टचं बोलले, म्हणाले, 'दोघांचेही म्हणणं...'

मराठी रंगभूमीवरील आमने-सामने या नाटकातील कलाकार आणि निर्मात्यांचा वाद विकोपाला गेला आहे. निर्मात्या लीना भागवत आणि मंगेश कदम यांनी  रोहन गुजर आणि केतकी विलास यांच्या आरोपांवर प्रत्युत्तर दिल्यानंतर मराठी सिनेसृष्टीतील अनेक कलाकारांनी या वादावर आपल्या प्रतिक्रिया दिल्या आहेत. वंदना गुप्ते यांनी निर्माते आणि कलाकार यांचे कान टोचले. तर, आता प्रशांत दामले यांनीही उत्तर दिलं आहे.

'प्रत्येक नाट्यनिर्माता आणि त्याच्या नाटकातील कलाकार यांचे संबंध हे सौहार्दाचे असले पाहिजेत. संवादातून प्रश्न सुटू शकतात,' असं प्रशांत दामले यांनी म्हटलं आहे. एका वृत्तपत्राला दिलेल्या मुलाखतीत त्यांनी हे म्हटलं आहे.

ते पुढे म्हणाले की, 'टाळी एका हाताने वाजत नाही हे लक्षात घेतले पाहिजे. त्यामुळे याबाबतीत दोघांचंही म्हणणं जाणून घ्यायला हवं. नाटकाचा प्रयोग सादर होताना कलाकारांची बांधिलकी ही शेवटी प्रेक्षकांशी असते. बाहेरच्या कुठल्याही गोष्टीचा परिणाम प्रयोगावर व्हायला नको याची खबरदारी मात्र घेतली गेली पाहिजे.'

केतकी विलास आणि रोहन गुजर यांना तडकाफडकी नाटकातून काढण्यात आल्यानंतर अनेक कलाकारदेखील व्यक्त झाले आहेत. शशांक केतकर, मयूरी देशमुख, ऋतुजा बागवे यांसारख्या कलाकारांनी रोहन आणि केतकी यांना पाठिंबा दिला आहे. तर, अभिनेत्री वंदना गुप्ते यांनीही स्पष्टपणे मत मांडली आहेत.

वंदना गुप्ते काय म्हणाल्या?

'लीना आणि मंगेश मी तुमचा व्हिडिओ पाहिला. मला खरंच फार वाईट वाटलं, मलाही भरून आलं. पण आपणही कलाकार आहोत आणि आपण या सगळ्यातून गेलेलो आहोत. मलाही आठवतंय... सुरुवातीला मला 80 रुपये मिळायचे, ते शंभर रुपये करा यासाठी मी मोहन काकांना जवळपास 15 वेळा तरी सांगितलं होतं. तेव्हा मग त्यांनी शंभराव्या प्रयोगाला माझं मानधन वाढवलं. हे सगळं ठिक आहे, पण आपण असं करत नाही ना गं, अचानक त्या कलाकारांना थांबवायचं आणि सांगायचं नाही हा तुमचा शेवटचा प्रयोग आहे. असा आपला कोणी अपनान केला तर, आपल्याला सहन होईल का? मंगेशलाही सहन होणार नाही. एक पद्धत असते सांगायची. विचार करुन या गोष्टी करायला हव्या होत्या, असं माझं स्पष्ट म्हणणं आहे,'' असं वंदना गुप्ते यांनी सोशल मीडियावर व्हिडिओ पोस्ट केला आहे.

अभिनेता रोहन गुजर आणि अभिनेत्री केतकी विलास यांना मानधनाच्या वादावरुन नाटकातून तडकाफडकी रिप्लेस करण्यात आले होते. दोघांनीही इन्स्टाग्रामवर एक व्हिडिओ शेअर करत निर्मात्यांवर आरोप केले होते. '18 ऑक्टोबरला रवींद्र नाट्यमंदिरला प्रयोग झाला. त्यानंतर एक मीटिंग घेऊन आम्हाला सांगितलं की हा तुमचा शेवटचा प्रयोग. आम्हाला नीट गुडबायही करता आला नाही, आम्ही आमचा शेवटचा प्रयोग नीट एन्जॉय केला नाही, आम्हाला शेवटचा प्रयोग सेलिब्रेट करता आला नाही' असं दोघांनी म्हटलं होतं.

मात्र रोहन आणि केतकीच्या आरोपांवर नाटकाचे निर्माते आणि कलाकार लीना भागवत आणि मंगेश कदम यांनी दोघांना प्रत्युत्तर देत, तिसऱ्यांदा मागितलेली मानधनवाढ परवडणारी नसल्यामुळे आम्ही थांबण्याचा निर्णय घेतला, असं लीना भागवत यांनी स्पष्ट केलं होतां.