रणबीर कपूरचा 'रामायण' सिनेमा तब्बल 40 भाषांमध्ये होणार रिलीज

Ramayan Movie : अभिनेता रणबीर कपूरच्या 'रामायण' भाग 1 रिलीज होण्यासाठी आता केवळ 1 महिन्याभराचा अवधी शिल्लक आहे. चित्रपट दिवाळीच्या दरम्यान जगभरातील चित्रपटगृहांमध्ये प्रदर्शित होणार आहे. या चित्रपटाची प्रेक्षकांना अनेक काळापासून प्रतीक्षा आहे. चित्रपटाचा ट्रेलर, टीझर आणि विविध पोस्टर्समुळे या चित्रपटाची चर्चा आता एका वेगळ्याच उंचीवर पोहोचली आहे. निर्माते भारताच्या सीमांच्या पलीकडे जाऊन जगभरात या चित्रपटाचे भव्य स्तरावर प्रदर्शन करण्याचे नियोजन करत आहेत. म्हणूनच हा चित्रपट सुमारे 40 भाषांमधील डब केलेल्या आवृत्त्यांसह प्रदर्शित करण्याबाबत चर्चा सुरू आहे.

मोठ्या प्रमाणात प्रदर्शित करण्याचं नियोजन :

मीडिया रिपोर्ट्सनुसार या रामायण चित्रपटाचे निर्माते नमित मल्होत्रा आणि त्यांची टीम रामायण चित्रपटाला मोठ्या प्रमाणात प्रदर्शित करू इच्छिते. या चित्रपटाला भारताचा आतापर्यंतचा सर्वात मोठा चित्रपट म्हणून जागतिक स्तरावर सादर करावे, अशी निर्मात्यांची इच्छा आहे. या उद्दिष्टासाठी ही टीम बऱ्याच काळापासून प्रयत्नशील आहे. सिनेमाकॉन 2026 आणि 'सॅन दिएगो कॉमिक कॉन'  येथे या चित्रपटाचा प्रचार करण्यामागेही हेच कारण होते. आंतरराष्ट्रीय वितरणासाठी 'सोनी पिक्चर्स'ची निवड करणे हा देखील या योजनेचाच एक भाग असल्याचे सूत्राने सांगितलं आहे.

इतक्या भाषेत प्रदर्शित होणारा पहिला सिनेमा :

मीडिया रिपोर्ट्सनुसार, रामायण हा चित्रपट जगातील प्रेक्षकांपर्यंत पोहोचावा आणि त्यांना मंत्रमुग्ध करण्याचा अनुभव द्यावा यासाठी ‘रामायण’चे सुमारे 40  भाषांमध्ये डबिंग करण्यात आले आहे. सबटायटल्सवर अवलंबून राहण्याऐवजी, प्रेक्षक हा चित्रपट त्यांना समजणाऱ्या भाषेत पाहू शकतील, हा या मागचा उद्देश आहे. सूत्रांनी सांगितल्यानुसार एखाद्या भारतीय चित्रपटाचे इतक्या मोठ्या प्रमाणावर डबिंग होण्याची ही पहिलीच वेळ आहे. हा चित्रपट ज्या भाषांमध्ये डब करण्यात आला आहे, त्यांची संपूर्ण यादी एक-दोन आठवड्यांत जाहीर केली जाईल.

कोण कोण दिसणार या चित्रपटात?

रामायण हा चित्रपट दोन भागांत तयार केला जात आहे. पहिला भाग 5 नोव्हेंबरला प्रदर्शित होईल, तर दुसरा भाग पुढील वर्षी दिवाळीच्या काळात प्रदर्शित होणार आहे. यात रणबीर कपूर प्रभू श्रीरामाच्या, साई पल्लवी सीतेच्या, सनी देओल हनुमानाच्या, यश रावणाच्या, रवी दुबे लक्ष्मणाच्या आणि अरुण गोविल राजा दशरथाच्या भूमिकेत दिसतील. या मुख्य पात्रांवव्यतिरिक्त, बॉलीवूडचे अनेक बडे कलाकारही महत्त्वाच्या भूमिकांमध्ये दिसतील. या चित्रपटाचे दिग्दर्शन नितेश तिवारी यांनी केले असून, संगीत ए.आर. रहमान आणि हॅन्स झिमर यांनी दिले आहे. चित्रपटाचे ॲडव्हान्स बुकिंग 20 ऑक्टोबरपासून सुरू होईल.