भूतानमध्ये ग्लेशियर फुटले; भारतात अलर्ट, घर सोडून पळाले लोक, रातोरात गावं खाली करण्याच्या सूचना

भूतानमधून एक मोठी बातमी समोर येतेय. गुरुवारी रात्री पुनाखा येथे हिमनदी फुटल्याने मोठा हाहाकार माजला आहे. मिळालेल्या माहितीनुसार, रात्री 8च्या दरम्यान हिमनदीचे पाणी संकोष नदीच्या तक्सिमाखांग परिसरात पोहोचले होते. भूतानच्या घटनेने भारतातही अलर्ट जारी करण्यात आला आहे. पश्चिम बंगाल आणि आसामच्या काही जिल्ह्यांत धोक्याची सूचना दिली आहे.

भारत सरकारने एक विशेष अॅडवायजरी जारी केली आहे. या मुळं संकोष नदीच्या जलस्तरमध्ये अचानक वाढले आहे. या दरम्यान बंगालच्या अलीपुरद्वार आणि असमच्या धुबरी जिल्हा प्रशासनाने लोकांना सतर्कता राखण्याचे अवाहन केले आहे. तसंच, प्रशासनाकडून वेळीच कठोर पावलं उचलण्यात येत आहेत.

भूतानच्या गासा जिल्ह्यातील लाया गेवोगच्या लुंगो भागात, वाकिला पर्वताच्या पायथ्याशी असलेल्या शिंताफू सरोवरात गुरुवारी संध्याकाळी हिमनदीच्या पाण्याचा उद्रेक होऊन पूर आल्याची माहिती मिळाली. या माहितीनंतर, नदीकाठावर राहणाऱ्या रहिवाशांना सतर्क करण्यासाठी धोक्याची सूचना देण्यात आली. बाधित झालेल्या लोकांना सुरक्षित स्थळी हलवण्यात आले.

मिळालेल्या माहितीनुसार, शिंताफू सरोवर हे भूतानमधील 17 हिमनदी सरोवरांपैकी एक आहे, जे  धोकादायक मानले जाते. भूतानच्या राष्ट्रीय जलविज्ञान आणि हवामानशास्त्र केंद्राने सांगितले की, ताक्तसिमाखाउंग येथे एक विशेष जलपातळी निरीक्षण केंद्र स्थापन करण्यात आले आहे. प्राथमिक माहितीवरून अद्याप हे स्पष्टपणे दिसून येत नाही की किती पाणी सोडले जाईल आणि त्याचा खालच्या प्रवाहाकडील भागांवर काय परिणाम होईल.

भूतानच्या पुनाखामध्ये मो छू नदीला आलेल्या पुरामुळं संपूर्ण शहरच उद्ध्वस्त झालं आहे. पुरामुळं दोछुका-जोमलिंगथांग-रित्सा-चीवोगामध्ये बसवण्यात आलेल्या सोलर इरिगेशन लिफ्टिंग सिस्टिमचे काही प्रमाणात नुकसान झाले आहे. या पुरानंतर सोलर सिस्टम पूर्णपणे बंद झाला आहे.

या हिमनदी सरोवराच्या उद्रेकाच्या पार्श्वभूमीवर, भारताने एक विशेष सूचना जारी केली आहे, ज्यात म्हटले आहे की पुनात्सांगछू नदीच्या वरच्या भागात अचानक येणाऱ्या पुरामुळे पश्चिम बंगालमधील अलीद्वारपूर जिल्हा आणि आसाममधील धुबरी जिल्ह्यात नदीच्या पाण्याची पातळी वेगाने वाढू शकते. या घटनेनंतर 8 ते 10 तासांच्या आत पुराचे पाणी भारत-भूतान सीमेपर्यंत पोहोचण्याची शक्यता आहे. दोन्ही जिल्ह्यांतील अधिकाऱ्यांना परिस्थितीवर सतत लक्ष ठेवण्यास सांगण्यात आले आहे.

या घटनेनंतर भाजप खासदार राजू बिष्ट यांनी काल रात्री उशिरा धोक्याचा इशारा दिला. त्यांनी एक्स-पोस्टमध्ये सांगितले की, भूतानमधील लेमथांग येथे हिमनदी सरोवराच्या उद्रेकामुळे पूर आला आहे. सरोवरातून वाहणारे पाणी मोफू नदीमार्गे सुनकोश नदीच्या दिशेने खाली वाहत आहे. त्यामुळे, सुनकोश नदी आणि तिच्या सर्व उपनद्यांच्या पाणलोट क्षेत्रात राहणाऱ्या रहिवाशांना सुरक्षेसाठी तात्काळ सुरक्षित ठिकाणी स्थलांतरित होण्याचा सल्ला देण्यात आला आहे. दार्जिलिंग टेकड्या, तराई आणि दुआर्स भागातील सर्व रहिवाशांना सतर्क राहण्याचे आवाहन करण्यात आले आहे.