₹230 कोटींचा नफा मिळून दिल्यानंतरही 'या' बँकेने एकाच वेळी 5000 कर्मचाऱ्यांना नोकरीवरुन काढलं; नोकरकपातीचं कारणही सांगितलं

एआय म्हणजेच आर्टिफिशीएल इंटेलिजन्स शाप की वरदान असा प्रश्न निर्माण होण्यासारख्या बातम्या मागील काही काळात समोर येत आहेत. आधी एआयमुळे लोकांच्या नोकऱ्या जाऊ लागल्या आणि नंतर एआयच भविष्यात मानवाचा सर्वात मोठा शत्रू ठरु शकतो अशी शक्यताही व्यक्त करण्यात येत आहे. यापैकी दुसऱ्या गोष्टीला अजून वेळ असला तरी एआयमुळे नोकऱ्या जाण्याचा प्रकार आताच घडू लागला आहे. आयटी क्षेत्रामध्ये तर एआयमुळे अनेक नोकऱ्या जात असतानाच आता नोकऱ्या जाण्याचा हा ट्रेण्ड थेट बँकिंग क्षेत्रात दिसू लागला आहे. एका जगप्रसिद्ध बँकने एकाच वेळी एक, दोन नाही तर तब्बल 5 हजार कर्मचाऱ्यांना कमावरुन काढून टाकलं आहे. 

कोणती बँक आणि कर्मचारी कपात का केली?

ज्या कंपनीने 5 हजार कर्मचाऱ्यांची कपात केली आहे ती बँक ब्रिटनमधील आहे. बार्कलेज या कंपनीने ही मोठी नोकरकपात केली असून भविष्यात या कंपनीमधून अजून कर्मचाऱ्यांच्या नोकऱ्या जाण्याची भीती व्यक्त केली जात आहे. सध्या समोर आलेल्या माहितीनुसार, बार्कलेज बँक यंदाच्या वर्षी आपल्या कर्मचारी संख्येपैकी अंदाजे 5 टक्के कर्मचाऱ्यांना नारळ देणार आहे. बँकेच्या दैनंदिन कामकाजावरील खर्च करण्यासाठी हा निर्णय घेण्यात आल्याचं सांगितलं जात आहे. खर्च कमी करून परतावा सुधारण्याचं लक्ष्य बँक व्यवस्थापनाने समोर ठेवलं आहे. बँकेकडून खर्च कमी करण्याचे प्रयत्न सुरु असल्याचा दावा केला जात असला तरी बँक नफ्यात असल्याचा दावा या निर्णयाला विरोध करणाऱ्यांकडून केला जातोय. मात्र कर्मचारी कपात करुन एआयच्या मदतीने दैनंदिन कामं पूर्ण करण्याचा बँक व्यवस्थापनाचा मानस आहे. म्हणजेच या 5 हजार नोकऱ्यासुद्धा एआयमुळेच गेल्या आहेत.

230 कोटी रुपयांचा नफा

बार्कलेजने यापूर्वीच सध्या नोकरकपात केलेल्या पदांपैकी एक हजार पदं कमी करत असल्याची घोषणा केली होती. त्यानंतर आता उर्वरित कर्मचाऱ्यांच्या कपातीसंदर्भातील तांत्रिक बाबींचं काम सुरु करण्यात आलं आहे. विशेष म्हणजे खर्चाचं कारण दिलं जात असलं तरी बार्कलेज बँकेने तिसऱ्या तिमाहीमध्ये 2.3 अब्ज पाउंड म्हणजेच 230 कोटी रुपये नफा कमवला आहे. उच्च व्याजदरांमुळे बँकेच्या नफ्यातही वाढ झाल्याचं सांगितलं जातंय. मागील वर्षाच्या तुलनेत हा नफा अधिक असला तरी तो अपेक्षा इतका नसल्याचा दावा केला जातोय. सध्या बँकेची स्थिती पाहता अधिक नफा होईल असा अंदाज तज्ज्ञांकडून व्यक्त केला जात होता. फिक्स्ड-इन्कम ट्रेडिंग व्यवसायामध्ये बँकेला फटका बसला असून समाधानकारक कामगिरी करण्यात बँकेला अपयश आलं आहे. त्यामुळेच बँकेच्या खर्चासंदर्भातील गणित बिघडल्याचा दावा केला जातोय. हाच तोटा भरुन काढण्यासाठी आता कर्मचाऱ्यांवर होणारा खर्च कमी करण्याच्या उद्देशाने कर्मचारीकपातीचा मार्ग निवडण्यात आल्याची चर्चा आहे. 

शेअर्सही पडले

'बार्कलेज'चे सीईओ सी. एस. व्यंकटकृष्णन यांनी कर्मचारी कपातीबद्दल बोलताना, या विषयाबद्दल बोलताना मला फार खंत वाटतेय. मी निराश आहे, असं नमूद केलं. तसेच बँकेच्या फिक्स्ड-इन्कम ट्रेडिंगच्या सुमार कामगिरीसंदर्भात चिंता वाटत असल्याचंही ते म्हणाले. खरं तर मागील अनेक वर्षांची आकडेवारी पाहिली तर फिक्स्ड-इन्कम ट्रेडिंग हे 'बार्कलेज'च्या यशामागील प्रमुख घटकांपैकी एक राहिलेलं आहे. एवढ्या मोठ्याप्रमाणात नोकरकपात केल्याने बार्कलेज बँकेच्या शेअर्समध्ये मोठी घसरण झाल्याचं दिसत आहे. बँकेचे शेअर्स 14 टक्क्यांनी घसरले आहेत.